തിരികെയാത്ര തുടങ്ങി

മക്ക: സഫലമായ തീർഥാടന ദിനങ്ങൾ കഴിഞ്ഞ്​ 24 ലക്ഷത്തോളം ഹാജിമാർ മിന താഴ്​വരയോട്​ വിടപറയുന്നു. അഞ്ചാം ദിവസം തന്നെ കർമങ്ങൾ പൂർത്തിയാക്കി ഭൂരിഭാഗം ഹാജിമാരും വ്യാഴാഴ്​ച രാത്രിയോടെ  മക്കയിലെ താമസ കേന്ദ്രങ്ങളിലെത്തി. ആഭ്യന്തര ഹാജിമാരും വീടണഞ്ഞു. ബാക്കിയുള്ളവർ വെള്ളിയാഴ്​ച ദുൽഹജ്ജ്​ 13 ലെ അവസാനത്തെ കല്ലേറ്​ കർമം പൂർത്തിയാക്കി മടങ്ങും.

ഹജ്ജ്​ കമ്മിറ്റി വഴി എത്തിയ ഇന്ത്യയിൽ നിന്നുള്ളവർ വ്യാഴാഴ്​ച തിരിച്ചെത്തി. സ്വകാര്യ ഗ്രൂപിൽ വന്നവർ വെള്ളിയാഴ്​ച വരെ മിനയിൽ തുടരും.  പ്രതീക്ഷിച്ചതിലേറെ സംതൃപ്​തമാണ്​ ഇൗ വർഷത്തെ ഹജ്ജ്​ എന്ന്​ തീർഥാടകർ പറഞ്ഞു. ഹജ്ജ്​ ഒാപറേഷൻ വൻവിജയമായി എന്ന്​ മക്ക ഗവർണറും ഹജ്ജ്​ ഉന്നതാധികാര സമിതി ചെയർമാനുമായ ഖാലിദ്​ അൽ ഫൈസൽ പ്രഖ്യാപിച്ചു.

മുൻവർഷങ്ങളെ അപേക്ഷിച്ച്​ കുടുതൽ കുറ്റമറ്റ രീതിയിലായിരുന്നു ഹജ്ജി​​​െൻറ സംഘാടനം. കഴിഞ്ഞ വർഷത്തേക്കാൾ ഒന്നര ലക്ഷത്തിലധികം തീർഥാടകർ ഇത്തവണ ഹജ്ജ്​ നിർവഹിച്ചു. അതിൽ പത്തര ലക്ഷത്തോളം സ്​ത്രീകളാണ്​. 17,58,722 വിദേശികളും 6,12,953 ആഭ്യന്തര തീർഥാടകരുമുണ്ടായിരുന്നു. അറഫ^മിന ഗതാഗത ഒാപറേഷൻ റെക്കോർഡ്​ വിജയമാണെന്ന്​ ഹജ്ജ്​ മന്ത്രി മുഹമ്മദ്​ ബിൻ ബന്ദൻ പറഞ്ഞു. ഹജ്ജ്​ കൂടുതൽ സൗകര്യപ്രദവും സുരക്ഷിതമാക്കുന്നതിന്​  അറഫ, മുസ്​ദലിഫ, മിന എന്നിവിടങ്ങളിൽ അടിസ്​ഥാനപരവും സമഗ്രവുമായ പരിഷ്​കരണപദ്ധതികൾ വൈകാതെ നടപ്പിലാക്കുമെന്നും ഹജ്ജ് ​മന്ത്രി പറഞ്ഞു.  

ഇന്ത്യയിൽ നിന്ന്​ 1,75,025 പേരാണ് വന്നത്​. ഏറ്റവും കൂടുതൽ വിദേശ ഹാജിമാർ പ​െങ്കടുത്ത രാജ്യങ്ങളുടെ പട്ടികയിൽ മൂന്നാം സ്​ഥാനത്താണ്​ ഇന്ത്യ. ഇന്ത്യയിൽ നിന്നുള്ള തീർഥാടകരുടെ തിരികെ യാത്ര ആഗസ്​റ്റ്​ 27 മുതൽ തുടങ്ങും. കേരളത്തിൽ നിന്ന്​ ഹജ്ജ്​ കമ്മിറ്റി വഴി എത്തിയവരുടെ തിരിച്ചുപോക്ക് സെപ്​റ്റംബർ 11 മുതലാണ്​. ആദ്യസംഘം 12^ന്​ നാട്ടിലെത്തും. മദീന വിമാനത്താവളത്തിൽ നിന്നാണ്​ കേരള ഹാജിമാർ നാട്ടിലേക്ക്​ പുറപ്പെടുക. അവരുടെ മദീന സന്ദർശനം സെപ്​റ്റംബർ മുന്നിന്​ തുടങ്ങും.