പു​ര​സ്​​കാ​രം ആ​ഗ്ര​ഹി​ച്ചി​രു​ന്നു; നി​രാ​ശ​യി​ല്ല –റ​ഷീ​ദ്​ പാ​റ​ക്ക​ൽ

ദുബൈ: പ്രവാസ ലോകത്തി​െൻറ കഥ പറഞ്ഞ്​ തിയറ്ററിൽ കൈയടി നേടിയ സിനിമയാണ്​ 'സമീർ'. അൽഐനിലെ അൽ ഹൈറിൽ ചിത്രീകരിച്ച സിനിമ സംസ്ഥാന ചലച്ചിത്ര പുരസ്​കാരത്തിന്​ പരിഗണിക്കപ്പെട്ടിരുന്നു​. പ്രവാസ പശ്ചാത്തലം ഉപയോഗിച്ച്​ ഫാൻറസിയും ഇമോഷൻസും പ്രകൃതിയുമൊക്കെ കടന്നുവന്ന ചിത്രം എഴുത്തുകാരനും ഗാനരചയിതാവുമായ റഷീദ്​ പാറക്കൽ ആദ്യമായി സംവിധാനം ചെയ്​ത സിനിമയാണ്​​. പുതിയ ചിത്രത്തി​െൻറ അണിയറ ​പ്രവർത്തനത്തിന്​​ ദുബൈയിൽ എത്തിയ റഷീദ്​ സംസ്ഥാന ചലച്ചിത്ര പുരസ്​കാര നിർണയത്തെ കുറിച്ചും പുതിയ പദ്ധതികളെ കുറിച്ചും 'ഗൾഫ്​ മാധ്യമ'വുമായി സംസാരിക്കുന്നു.

ആദ്യ സംരംഭമായിരുന്നല്ലോ 'സമീർ'. സംസ്ഥാന ചലച്ചിത്ര അവാർഡിനായി പരിഗണിക്കുന്ന അവസാന പട്ടികയിലും സമീറി​െൻറ പേര്​ പരാമർശിച്ചു കേട്ടിരുന്നു. അവാർഡ്​ പ്രഖ്യാപനം കഴിഞ്ഞപ്പോൾ എന്ത്​ തോന്നുന്നു?

എല്ലാവർക്കും തൻകുഞ്ഞ്​ പൊൻകുഞ്ഞാണല്ലോ. സ്വാഭാവികമായും എ​െൻറ ചിത്രത്തിന്​ അവാർഡ്​ കിട്ടണമെന്ന്​ ആഗ്രഹിച്ചിരുന്നു. പ്രതീക്ഷിക്കുകയും ചെയ്​തു. അവാർഡ്​ ലഭിച്ചില്ലെങ്കിലും കടുത്ത നിരാശയില്ല. കാരണം, ഞാൻ തുടങ്ങിയി​ട്ടേയുള്ളൂ. ആദ്യ ചിത്രത്തിന്​ തന്നെ അവാർഡ്​ കിട്ടണമെന്ന്​ വാശിപിടിക്കാൻ കഴിയില്ലല്ലോ. തിയറ്ററിൽ മികച്ച പ്രതികരണമാണ്​ ചിത്രത്തിന്​ ലഭിച്ചത്​. അതുതന്നെയല്ലേ ഏറ്റവും വലിയ അംഗീകാരം. ഈ വർഷത്തെ പ്രേം നസീർ അവാർഡും മലയാളം പുരസ്​കാരവും ചിത്രത്തിന്​ കിട്ടിയിരുന്നു.

അവാർഡിനുള്ള ഘടകങ്ങൾ ചി​ത്രത്തിൽ ഉണ്ടായിരുന്നല്ലോ?

ചിത്രത്തിലെ നായകൻ ആനന്ദ്​ റോഷ​െൻറ അഭിനയം ഏറെ ​ശ്രദ്ധേയമായിരുന്നു. 20 കിലോയോളം ഭാരം കുറച്ച ശേഷമാണ്​ അദ്ദേഹം കഥാപാത്രത്തിനായി ഒരുങ്ങിയത്​. വിദ്യാധരൻ മാഷി​െൻറ ഗാനവും അവാർഡിന്​ യോഗ്യമായിരുന്നു. പ്രവാസ സിനിമ എന്ന നിലയിൽ പ്രോത്സാഹനം പ്രതീക്ഷിച്ചിരുന്നു. ഏറ്റവും കൂടുതൽ നവാഗത സംവിധായകർ വന്ന വർഷമാണ്​ കഴിഞ്ഞുപോയത്​. വലിയ താരനിരപോലുള്ള ആകർഷക ഘടകങ്ങൾ ചിത്രത്തിൽ ഇല്ലായിരുന്നു.

അർഹരായവരിലേക്ക്​ തന്നെയാണോ ​പുരസ്​കാരം എത്തിയത്​?

വിവാദമാക്കാൻ മാത്രം ഒന്നും ഇത്തവണത്ത അവാർഡ്​ നിർണയത്തിൽ ഇല്ല. എല്ലാവർക്കും അവാർഡ്​ കൊടുക്കാൻ കഴിയില്ലല്ലോ. അർഹതപ്പെട്ടവർക്കു​ തന്നെയാണ്​ പുരസ്​കാരം ലഭിച്ചിരിക്കുന്നത്​. സമാന്തര സിനിമകൾക്ക്​ അവാർഡ്​ ലഭിക്കുന്നു എന്നത്​ ഏറ്റവുമധികം സന്തോഷം പകരുന്നു. ആൻഡ്രോയ്​ഡ്​ കുഞ്ഞപ്പൻ, വികൃതി എന്നീ സിനിമകളിൽ സുരാജി​െൻറ അഭിനയം ഗംഭീരമായിരുന്നു. നിഷ്കളങ്കമായി കണ്ടിരിക്കാവുന്ന ചിത്രങ്ങളായിരുന്നു അത്​.

പ്രവാസികളുടെ കഥ പറയുന്ന 'സമീറി​'ലേക്ക്​ എത്തിപ്പെട്ടത്​ എങ്ങനെയാണ്​?​

എ​െൻറ സ്വന്തം ജീവിതമാണ്​ സമീർ. രണ്ടര വർഷത്തോളം അൽഐനിലെ അൽഹൈറിൽ തക്കാളിത്തോട്ടത്തിലായിരുന്നു എനിക്ക്​ ജോലി. രണ്ടു​ ബംഗാളികൾ മാത്രമാണ്​ കൂടെയുണ്ടായിരുന്നത്​. മറ്റു മനുഷ്യരെയൊന്നും കാണാതെ ഞാൻ അനുഭവിച്ചുതീർത്ത വർഷങ്ങളുടെ കഥയാണ്​ തിരശ്ശീലയിലെത്തിച്ചത്​. അതേ ലൊക്കേഷനിൽ തന്നെ ചിത്രീകരണം നടത്താൻ കഴിഞ്ഞുവെന്നതും നേട്ടമായി കരുതുന്നു. തലതാഴ്​ത്തി നടന്ന അതേ മണ്ണിൽ തല ഉയർത്തിപ്പിടിച്ച്​ നടക്കാൻ കഴിയുന്നത്​ അഭിമാനകരമല്ലേ. അതുകൊണ്ടുതന്നെ കിട്ടിയതൊക്കെ പോസിറ്റിവാണ്​. ഉള്ളതുകൊണ്ട്​ സന്തോഷമായി ജീവിക്കാൻ ​ആഗ്രഹിക്കുന്ന കലാകാരനാണ്​ ഞാൻ. സിനിമ പാരമ്പര്യമില്ലാതെയാണ്​ ഇവിടെ വരെയെത്തിയത്​. ഷോർട്ട്​​ ഫിലിമുകളിലൂടെയായിരുന്നു തുടക്കം. 'ഒരു തക്കാളിക്കാര​െൻറ സ്വപ്​നങ്ങൾ' എന്ന പേരിൽ നോവലാക്കിയ ശേഷമാണ്​ 'സമീർ' സിനിമയാക്കിയത്​. എ​​െൻറ എല്ലാ പ്രോജക്​ടുകളും അങ്ങനെയാണ്​. നോവലാക്കിയ ശേഷമാണ്​ തിരക്കഥയെഴുതുന്നത്​. കൊതിച്ചാൽ നടക്കും എന്ന ആത്മവിശ്വാസമാണ്​ എന്നെ തക്കാളിത്തോട്ടത്തിൽനിന്ന്​ സംവിധായകനാക്കിയത്​.

ഏതൊക്കെയാണ്​ പുതിയ പ്രോജക്​ടുകൾ?

പുതിയ ചിത്രത്തി​െൻറ ലൊക്കേഷൻ നിർണയത്തിനായാണ്​ ദുബൈയിൽ എത്തിയത്​. ചിത്രത്തിന്​ പേരിട്ടിട്ടില്ല. ലൊക്കേഷൻ ദുബൈ ആണെങ്കിലും പ്രവാസ ലോകവുമായി കഥക്ക്​ വലിയ ബന്ധമില്ല. വിദേശത്തെ ഒരു ഫ്ലാറ്റിൽ നടക്കുന്ന സംഭവങ്ങളാണ്​ സിനിമയാകുന്നത്​. ഡിസംബറിൽ തുടങ്ങാമെന്ന്​ കരുതുന്നു. താരങ്ങൾ ആരൊക്കെയാണെന്ന്​ അന്തിമ തീരുമാനമായിട്ടില്ല. മുഖ്യധാരയിലെ ചില താരങ്ങളെയും പ്രതീക്ഷിക്കാം. എന്തും സ്വാഗതം ചെയ്യുന്ന നഗരമാണ്​ ദുബൈ. അതുകൊണ്ട്​ തന്നെ ചിത്രീകരണം വെല്ലുവിളിയാവില്ല. ഞാൻ തിരക്കഥയെഴുതിയ 'താമര'യും പാ​ട്ടെഴുതിയ ചിത്രങ്ങളും പുറത്തിറങ്ങാനുണ്ട്​. സിനിമയിലേക്ക്​ വൈകിയാണെത്തിയത്​. ആഴത്തിലേക്ക്​ ഇറങ്ങാൻ കഴിഞ്ഞിട്ടില്ല.

തിയറ്റർ പോലും കിട്ടാത്ത ഈ സാഹചര്യത്തിൽ സിനിമയെടുക്കുന്നത്​ വെല്ലുവിളിയല്ലേ?

ഇപ്പോഴത്തെ സാഹചര്യത്തിൽ തിയറ്ററിന്​ രണ്ടാം സ്ഥാനമാണ്​. ഒ.ടി.ടി പോലുള്ള പ്ലാറ്റ്​ഫോം ലക്ഷ്യമിട്ടാണ്​ സിനിമ ​ചെയ്യേണ്ടത്​. പുതിയ സിനിമ അത്തരത്തിൽ ഒന്നായിരിക്കും. വരാനിരിക്കുന്നത്​ ഒ.ടി.ടിയുടെ കാലമാണ്​. ലോകത്തി​െൻറ ഏത്​ ഭാഗത്തും സിനിമക്ക്​ സ്വീകാര്യത കിട്ടുമെന്നതാണ്​ ഇതി​െൻറ പ്രത്യേകത. സബ്​ ടൈറ്റിലുണ്ടെങ്കിൽ ഏത്​ ഭാഷക്കാരനും ചിത്രം ആസ്വദിക്കാൻ കഴിയും. തിയറ്ററുകൾ തുറന്നാലും ചെറിയ ചിത്രങ്ങൾക്ക്​ ഇടംകിട്ടാൻ ക്യൂ നിൽക്കേണ്ടിവരും. ഒ.ടി.ടിയിൽ ആസ്വദിക്കാവുന്ന സാ​ങ്കേതിക വിദ്യകളാണ്​ പുതിയ ചിത്രത്തിൽ പരീക്ഷിക്കാൻ ഒരുങ്ങുന്നത്​.