അബൂദബിയിൽ ആരോഗ്യ ഇൻഷുറൻസ്​ പ്രീമിയം വർധിപ്പിച്ചു

അബൂദബി: അബൂദബി എമിറേറ്റിൽ ആരോഗ്യ ഇൻഷുറൻസ്​ വാർഷിക പ്രീമിയത്തിൽ വർധന വരുത്തി. പ്രവാസികളുടെ വീട്ടുജോലിക്കാര്‍, പ്രവാസികളുടെ ആശ്രിതര്‍, സ്​ഥാപനങ്ങളിലെ മുതിര്‍ന്ന ജീവനക്കാര്‍ എന്നിവര്‍ക്കുള്ള നിരക്കുകളിലാണ് വലിയ വര്‍ധന. മേയ്​ ഒന്ന്​ മുതലാണ്​ പുതുക്കിയ നിരക്ക്​ പ്രാബല്യത്തിലാവുക. ഇതു സംബന്ധിച്ച സർക്കുലർ ഏപ്രിൽ 18ന്​ അബൂദബി ആരോഗ്യ വകുപ്പ്​ ഇൻഷുറൻസ്​ കമ്പനികൾക്ക്​ അയച്ചിട്ടുണ്ട്​. 
ഗ്രൂപ്പ്​ പോളിസിയിൽ 18^40 പ്രായക്കാരായ തൊഴിലാളികളുടെ പ്രീമിയം തുക 75 ദിർഹം വർധിപ്പിച്ചു. ഇതോടെ പ്രീമിയം തുക 800ൽനിന്ന്​ 875 ആയി. 41^59 പ്രായക്കാരുടെ പ്രീമിയം തുകയിൽ 400 ദിർഹത്തി​​​​െൻറ വർധനയുണ്ട്​. 1200 ദിർഹമാണ്​ ഇനി അടക്കേണ്ടത്​. 

നിലവിൽ ഇത്​ 800 ദിർഹമാണ്​. 60നും അതിന്​ മുകളിലും പ്രായമുള്ളവരുടെ പ്രീമിയം തുകയിൽ മാറ്റമില്ല. ഇത്​ 5500 ദിർഹമായി തുടരും. ചെറുകിട നിക്ഷേപകരുടെ പ്രീമിയം തുക സർക്കുലറിൽ ഇത്തവണ പ്രത്യേകം ഉൾപ്പെടുത്തിയിട്ടുണ്ട്​. 18-40 പ്രായക്കാരായ ചെറുകിട നിക്ഷേപകരുടെ പ്രീമിയം തുക 2700 ദിർഹമാണ്​. 41^59 പ്രായക്കാർ 3000 ദിർഹവും 60നും അതിന്​ മുകളിലുമുള്ളവർ 7800 ദിർഹവും അടക്കണം.

ആശ്രിതരുടെ (ഭാര്യ, 18 വയസ്സിന്​ താഴെയുള്ള മൂന്ന്​ വരെ കുട്ടികൾ) ഇൻഷുറൻസ്​ പോളിസിയിൽ 17 വയസ്സ്​ വരെയുള്ളവരുടെ പ്രീമിയം തുക 800 ദിർഹത്തിൽനിന്ന്​ 1000 ദിർഹമായും 18-40 പ്രായക്കാരുടേത്​ 1500ൽ നിന്ന്​ 2000 ആയും 41-59 പ്രായക്കാരുടേത്​ 3000ത്തിൽ നിന്ന്​ 3600 ആയും കൂട്ടി. 60നും അതിന്​ മുകളിലും പ്രായക്കാരുടേത്​ നിലവിലെ 10500 ദിർഹമായി തുടരും. വ്യക്​തിപരമായി സ്​പോൺസർ ചെയ്യുന്ന ആശ്രിതരുടെ (നാലാമത്തെ കുട്ടി, 18 വയസ്സിന്​ മുകളിലുള്ള മക്കൾ, മാതാപിതാക്കൾ, മറ്റു ബന്ധുക്കൾ) ഇൻഷുറൻസ്​ പോളിസിയിൽ 17 വയസ്സ്​ വരെയുള്ളവരുടെ പ്രീമിയം തുകയിൽ മാത്രമാണ്​ വർധന. ഇത്​ 800 ദിർഹത്തിൽനിന്ന്​ 1000 ദിർഹമായി വർധിപ്പിച്ചു. 18-40 (പ്രീമിയം തുക- 2000 ദിർഹം), 41-59 (5700), 60ഉം അതിന്​ മുകളിലും (10500) പ്രായക്കാരുടേത്​ നിലവിലെ നിരക്ക്​ തന്നെ തുടരും.

പ്രവാസികളുടെ സ്​പോൺസർഷിപ്പിലുള്ള തൊഴിലാളികളുടെ ഇൻഷുറൻസ്​ പോളിസിയിലും​ വലിയ വർധനയുണ്ട്​​. 18^40 പ്രായക്കാരുടെ പ്രീമിയം തുക 800 ദിർഹത്തിൽനിന്ന്​ 875 ആയും 41^59 പ്രായക്കാരുടേത്​ 800ൽ നിന്ന്​ 1200 ആയും ഉയർത്തി. 60നും അതിന്​ മുകളിലുമുള്ളവരുടേത്​ 5500 ആയി തുടരും. 
അതേസമയം, സ്വദേശികളുടെ സ്​പോൺസർഷിപ്പിലുള്ള തൊഴിലാളികളുടെ ഇൻഷുറൻസ്​ പ്രീമിയം തുകയിൽ മാറ്റം വരുത്തിയിട്ടില്ല. ഇത്​ എല്ലാ പ്രായക്കാർക്കും 600 ദിർഹമാണ്​. 18^50 പ്രായക്കാരായ വിവാഹിതരായ സ്​ത്രീകൾക്ക്​ പ്രസവവുമായി ബന്ധപ്പെട്ട അധിക തുക നിലവിലെ 750 ദിർഹം എന്നത്​ മാറ്റമില്ലാതെ തുടരും.