ആരോഗ്യം വീണ്ടെടുത്ത്​ സുൽത്താൻ അൽ നിയാദി

ദുബൈ: ബഹിരാകാശ ദൗത്യം കഴിഞ്ഞ്​ തിരിച്ചെത്തിയ സുൽത്താൻ അൽ നിയാദി ആരോഗ്യം വീണ്ടെടുത്തു. ഭൂമിയിലെത്തിയശേഷം ആദ്യമായി സാമൂഹിക മാധ്യമങ്ങളിലൂടെ വിശേഷങ്ങൾ പങ്കുവെച്ചുകൊണ്ടാണ്​ ഇക്കാര്യം അദ്ദേഹം വ്യക്​തമാക്കിയത്​. ബഹിരാകാശത്തുനിന്ന്​ തിരിച്ചെത്തിയശേഷം യു.എസിലെ ഹൂസ്റ്റണിൽ നിലവിൽ ആരോഗ്യ പരിചരണത്തിലാണ്​ നിലവിൽ അൽ നിയാദി. പിന്തുണയും സഹായവുമായി കൂടെനിന്നവർക്ക്​ നന്ദിയറിയിക്കുന്നതായും അദ്ദേഹം എക്സിൽ(പഴയ ട്വിറ്റർ) കുറിച്ചു. ബഹിരാകാശത്തേക്ക്​ പോയി മടങ്ങിയെത്തിയിരിക്കുന്നു. ഇപ്പോഴിത്​ കുറിക്കുന്നത്​ പാദങ്ങളിൽ ഗുരുത്വാകർഷണവും നിങ്ങളെല്ലാവരും നൽകിയ സ്​നേഹത്താൽ ഹൃദയത്തിന്​ ലഭിച്ച ആശ്വാസവും ആസ്വദിച്ചുകൊണ്ടാണ്​. എന്‍റെ യാത്രക്കൊപ്പം കൂടെയുണ്ടായിരുന്ന എല്ലാവർക്കും നന്ദിയറിയിക്കുന്നു. സുഹൃത്തുക്കളെ, ഞാനിപ്പോൾ പൂർണ ആരോഗ്യവാനാണ്​ വൈകാതെ നിങ്ങളെ കണ്ടുമുട്ടാമെന്ന്​ കരുതുന്നു -അദ്ദേഹം കൂട്ടിച്ചേർത്തു.

അറബ്​ ലോകത്തെ ആദ്യ ദീർഘദൂര ബഹിരാകാശ ദൗത്യം പൂർത്തിയാക്കി തിങ്കളാഴ്ച ഭൂമിയിൽ വന്നിറങ്ങിയ അൽ നിയാദി 14 ദിവസം ഹൂസ്റ്റണിൽ തന്നെ കഴിയും. പിന്നീട്​ ഒരാഴ്ചയോളം മാതൃരാജ്യത്ത്​ ചെലവഴിക്കാനായി എത്തിച്ചേരുമെന്നാണ്​ അറിയിച്ചിട്ടുള്ളത്​. പിന്നീട്​ ശാസ്ത്ര പരീക്ഷണങ്ങൾ തുടരുന്നതിന്​ ഹൂസ്റ്റണിലേക്ക്​ തന്നെ മടങ്ങുകയും ചെയ്യും. അതിനിടെ, തിരിച്ചെത്തുന്ന രാജ്യത്തിന്‍റെ അദ്ദേഹത്തിന്​ സമുചിതമായ സ്വീകരണം ഒരുക്കുന്നതിന്​ അണിയറയിൽ ഒരുക്കങ്ങൾ പുരോഗമിക്കുന്നുണ്ട്​. നേരത്തേ ഹസ്സ അൽ മൻസൂരിക്ക്​ നൽകിയതിന്​ സമാനമായ രീതിയിൽ ഗംഭീര സ്വീകരണ ചടങ്ങുകളാണ്​ ഒരുക്കുക. രാഷ്ട്രനേതാക്കളെ സന്ദർശിക്കൽ, ദൗത്യ വിജയാഘോഷം, പൊതുജനങ്ങളുമായുള്ള സംവാദം, ജന്മനാടായ അൽ ഐനിൽ പ്രത്യേക സ്വീകരണം എന്നിവ സംഘടിപ്പിക്കും. അൽ നിയാദിക്ക്​ ആശംസകൾ അറിയിക്കുന്നതിന്​ അബൂദബി അടക്കം രാജ്യത്തെ വിവിധ ഭാഗങ്ങളിൽ അലങ്കാര വിളക്കുകളും മറ്റും സ്ഥാപിച്ചിട്ടുണ്ട്​.