ഹോപ്പ്​ ചൊവ്വയിലെ രാത്രികാല 'അറോറ' പകർത്തി

ദുബൈ: യു.എ.ഇയുടെ ചൊവ്വാദൗത്യ പേടകമായ ഹോപ്പ്​ ചൊവ്വയുടെ അപൂർവ ചിത്രം പകർത്തി. ഗ്രഹത്തി​െൻറ രാത്രികാല അന്തരീക്ഷത്തിലെ വ്യത്യസ്​തമായ അറോറ (ധ്രുവദീപ്​തി) യുടെ ചിത്രമാണ്​ പകർത്തിയത്​.

ഭൂമിയിൽ സംഭവിക്കുന്ന ഉത്തരധ്രുവത്തിലെ അറോറ​ പ്രതിഭാസത്തിന് സമാനമായ പ്രകാശത്തി​െൻറ ചിത്രമാണ്​ ലഭിച്ചത്​​. സൗരവികിരണം, ചൊവ്വയുടെ കാന്തികഭാഗങ്ങൾ, അന്തരീക്ഷം എന്നിവ തമ്മിലുള്ള ബന്ധം മനസ്സിലാക്കാൻ ശാസ്ത്രജ്ഞരെ ഈ കണ്ടെത്തൽ സഹായിക്കുമെന്നാണ്​ വിലയിരുത്തപ്പെടുന്നത്​.

സൂര്യനും ചൊവ്വയും തമ്മിലെ പഠനത്തി​െൻറ മേഖലയിൽ ശാസ്ത്രത്തിന് വലിയ സാധ്യതകൾ തുറക്കുന്ന കണ്ടെത്തലാണിതെന്ന്​ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ട്വിറ്ററിൽ കുറിച്ചു.

കണ്ടെത്തൽ ആഗോളതലത്തിൽ വളരെ സുപ്രധാനമാണെന്നും ആദ്യമായാണ്​ ഈ വിഷയത്തിൽ വ്യക്​തമായ നിരീക്ഷണത്തിന്​ സാധിക്കുന്നതെന്നും ഹോപ്പ്​ ദൗത്യത്തി​െൻറ മേധാവി ഹെസ്സ മത്രൂഷി പറഞ്ഞു. പത്ത് മിനിറ്റ് നിരീക്ഷണത്തിലൂടെ ചൊവ്വയുടെ അറോറകളെക്കുറിച്ച പത്തുവർഷത്തെ പഠനം പൂർണമായും മറികടക്കാൻ സാധിച്ചതായി ചിത്രത്തെ കുറിച്ച്​ ഇമാറാത്ത്​ ചൊവ്വാ ദൗത്യത്തി​െൻറ ഡെപ്യൂട്ടി സയൻസ്​ ലീഡ്​ ആയ ജസ്​റ്റിൻ ഡീഗൻ പറഞ്ഞു.

നേരത്തെ സ്വപ്​നം കാണാൻ മാത്രം കഴിഞ്ഞിരുന്ന ചൊവ്വാ പഠനത്തി​െൻറ മേഖലകളിലേക്ക്​ നയിക്കാൻ പര്യാപ്​തമായ കണ്ടുപിടിത്തമാണിതെന്നും അദ്ദേഹം പറഞ്ഞു. യു.എ.ഇയുടെ പ്രോബ്​ ദൗത്യത്തി​െൻറ യഥാർഥ ഉദ്ദേശ്യത്തിനും അപ്പുറമുള്ള അത്ഭുതപ്പെടുത്തുന്ന നിരീക്ഷണമാണ്​ നടത്തിയിരിക്കുന്നതെന്നും അദ്ദേഹം വ്യക്​തമാക്കി.

ചൊവ്വക്ക്​ മൂന്നുതരം അറോറകളുണ്ടെന്ന്​ നേരത്തെ നാസ കണ്ടെത്തിയിരുന്നു.ഇവയിലെ പകൽനേരത്തെ പ്രതിഭാസം മാത്രമാണ്​ വിശദമായി പഠിക്കാൻ സധിച്ചിട്ടുള്ളത്​. അപൂർവമായി മാത്രമാണ്​ രാത്രികാല അറോറ പകർത്താൻ സാധിക്കുന്നത്​. ഹോപ്പ്​ പ്രോബി​െൻറ പ്രത്യേക സവിശേഷതയാണ്​ ഇതിന്​ സഹായകമായത്​.

അറോറ അഥവാ ധ്രുവദീപ്​തി

സൂര്യനിൽ നിന്നുള്ള കണവികിരണങ്ങൾ കാരണമായി സംഭവിക്കുന്ന പ്രത്യേക പ്രകാശമാണ്​ അറോറ.ഭൂമിയിൽ സാധാരണ രാത്രിയുടെ അവസാനത്തിൽ ഈ വെളിച്ചം കാണാറുണ്ട്​. ആകാശത്ത്​ പടർന്നുനിൽക്കുന്ന ഈ വെളിച്ചം പലപ്പോഴും മനോഹരമായ കാഴ്​ചയായിരിക്കും.

ചൊവ്വയിലെ അറോറ പകർത്തുന്നതിലൂടെ സൂര്യനും ചൊവ്വയും തമ്മിലുള്ള ബന്ധത്തെ കുറിച്ച പഠനത്തിൽ ഏറെ മുന്നോട്ടുപോകാൻ കഴിയും.