വാഹനങ്ങളിൽ കുട്ടികളെ തനിച്ചാക്കുന്ന സംഭവങ്ങൾ വർധിക്കുന്നു

ദുബൈ: വാഹനങ്ങളിൽ കുട്ടികളെ തനിച്ചാക്കി ഷോപ്പിങ്ങിനും മറ്റും പോകുന്ന സംഭവങ്ങൾ വർധിക്കുന്നു. ദുബൈ പൊലീസ്​ നിരവധി തവണ ഇതിനെതിരെ മുന്നറിയിപ്പ്​ നൽകുകയും ബോധവത്​കരണ പരിപാടികൾ നടത്തുകയും ചെയ്​തിട്ടുണ്ട്​. എങ്കിലും ദിനംപ്രതി മൂന്നു സംഭവങ്ങളെങ്കിലും ശ്രദ്ധയിൽപെടുന്നുണ്ടെന്ന്​ അധികൃതർ പറയുന്നു. ബുധനാഴ്​ച രണ്ടും നാലും വയസ്സുള്ള കുട്ടികളെ ഇത്തരമൊരു സംഭവത്തിൽ പൊലീസ്​ രക്ഷപ്പെടുത്തി.

പിതാവ്​ ഇവരെ കാറിൽ ഇരുത്തി ഷോപ്പിങ്ങിന്​ പോവുകയായിരുന്നു. വഴിയാത്രക്കാരായ ചിലർ പൊലീസി​നെ അറിയിച്ചതിനെ തുടർന്നാണ്​ പൊലീസ്​ എത്തിയത്​. സ്​ഥിരമായി ഷോപ്പിങ്ങിനായി പോകുന്നത്​ ഇത്തരത്തിലാണെന്നാണ്​ പൊലീസിനോട്​ പിതാവ്​ വെളിപ്പെടുത്തിയത്. ഇത്തരം സംഭവങ്ങൾ ഏറെയും ഷോപ്പിങ്​ മാളുകൾക്ക്​ പുറത്താണ്​ റിപ്പോർട്ട്​ ചെയ്യപ്പെടുന്നത്​.കുട്ടികൾ ഇത്തരം അപകടത്തിൽപെട്ട സംഭവങ്ങൾ ഈ വർഷം മാത്രം 95 എണ്ണം റിപ്പോർട്ട്​ ചെയ്​തതായി ലഫ്.​ കേണൽ അബ്​ദുല്ല ബിഷ്​വ പറഞ്ഞു. ഇതിൽ 36 എണ്ണവും കുട്ടികൾ കാറിൽ കുടുങ്ങിയ സംഭവങ്ങളാണ്​.

ലിഫ്​റ്റിൽ അകപ്പെട്ടതാണ്​ മറ്റു ചില സംഭവങ്ങൾ. കാറിൽ അകപ്പെടുന്ന സംഭവങ്ങൾ മാതാപിതാക്കളുടെ വലിയ അശ്രദ്ധമൂലമാണെന്ന്​ അധികൃതർ പറയുന്നു. വേനൽക്കാലത്ത്​ കുട്ടികളെ കാറിൽ ഉപേക്ഷിക്കുന്നത്​ വളരെ അപകടകരമാണ്​.വെയിലിൽ നിർത്തിയിട്ട വാഹനങ്ങൾക്കകത്ത്​ 60 ഡിഗ്രി സെൽഷ്യസ്​ വരെ ചൂട്​ ഉണ്ടാകാമെന്നാണ്​ വിദഗ്​ധർ അഭിപ്രായപ്പെടുന്നത്​.

പത്തുമിനിറ്റിലേറെ കുട്ടികൾക്ക്​ ഇത്തരം സാഹചര്യത്തിൽ നിൽക്കാൻ കഴിയില്ല. അതിനാൽ കുട്ടികളുടെ ജീവന്​ ഭീഷണിയാകാമെന്ന്​ ഇവർ അഭിപ്രായപ്പെടുന്നു.