ദുബൈയിൽ ഇന്ത്യൻ ദമ്പതികളുടെ കൊലപാതകം; പാകിസ്താനിക്ക്​ വധശിക്ഷ

ദുബൈ: ഗുജറാത്ത്​ സ്വദേശികളായ ദമ്പതികളെ കൊലപ്പെടുത്തിയ കേസിൽ പാകിസ്താൻ സ്വദേശിക്ക്​ വധശിക്ഷ. ദുബൈ അറേബ്യൻ റാഞ്ചസിലെ വില്ലയിൽ ഇന്ത്യൻ ദമ്പതികളായ ഹിരൺ ആദിയ (48), വിധി ആദിയ (40) എന്നിവരെ തല​ക്കടിച്ച്​ കൊലപ്പെടുത്തിയ കേസിൽ 26കാരനായ പാകിസ്താനിക്കാണ്​ ദുബൈ ക്രിമിനൽ കോടതി വധശിക്ഷ വിധിച്ചത്​. 2020 ജൂൺ 17ലാണ്​ സംഭവം.

ഷാർജയിൽ ബിസിനസ്​ നടത്തിയിരുന്ന ഹിരൺ ആദിയയെയും വിധിയെയും മോഷ്ടിക്കാനെത്തിയ ഇദ്ദേഹം മകളുടെ മുന്നിലിട്ട്​ കൊലപ്പെടുത്തുകയായിരുന്നു. അറ്റകുറ്റപ്പണിക്കായി മുമ്പ്​ ഈ വീട്ടിലെത്തിയതിന്‍റെ പരിചയത്തിലാണ്​ ഇയാൾ മോഷണത്തിന്​ പദ്ധതിയിട്ടത്​. വീട്ടിലുള്ളവർ ഉറങ്ങിക്കിടക്കുന്ന സമയത്ത്​ മതിൽചാടി മുകളിലത്തെ നിലയിലൂടെ വീടിനുള്ളിൽ പ്രവേശിച്ചു. 18, 13 വയസുള്ള ​പെൺമക്കളും വീട്ടിലുണ്ടായിരുന്നു. മുകളിലെ നിലയിലായിരുന്നു ദമ്പതികൾ ഉറങ്ങിയിരുന്നത്​.

ഇവരുടെ മുറിയിലെത്തി തിര​ച്ചിൽ നടത്തുന്നതിനിടെ ശബ്​ദം ​കേട്ട്​ ദമ്പതികൾ ഉണർന്നു. ഇതോടെ അവരെ ആക്രമിക്കുകയായിരുന്നു. കത്തികൊണ്ട്​ കുത്തിയാണ്​ ഇരുവരെയും പരിക്കേൽപിച്ചത്​. കരച്ചിൽകേട്ട്​ ഓടിയെത്തിയപ്പോഴാണ്​ മൂത്തമകളെയും ആക്രമിച്ചത്​. പെൺകുട്ടി അലാറം മുഴക്കിയതനുസരിച്ച്​ പൊലീസ്​ എത്തിയപ്പോഴേക്കും പ്രതി രക്ഷപ്പെട്ടിരുന്നു. എന്നാൽ, മണിക്കൂറുകൾക്കുള്ളിൽ ഷാർജയിൽനിന്ന്​​ പ്രതിയെ പൊലീസ്​ പിടികൂടി. ഹിരണിന്‍റെ തലയിലും നെഞ്ചിലും അടിവയറ്റിലും പത്ത്​ തവണ അടിയേറ്റതായി ഫോറൻസിക്​ റിപ്പോർട്ടിൽ തെളിഞ്ഞു.

ഭാര്യയുടെ തല, കഴുത്ത്​, നെഞ്ച്​, മുഖം, ചെവി, വലംകൈ എന്നിവിടങ്ങളിലായി 14 തവണ മർദനമേറ്റു. വില്ലയുടെ 500 മീറ്റർ അകലെ നിന്ന്​ കത്തി കണ്ടെടുത്തു. പിന്നീട്​ നടന്ന ചോദ്യം ചെയ്യലിൽ പ്രതി കുറ്റം സമ്മതിച്ചു. അമ്മയു​ടെ ചികിത്സക്കായി പണം ആവശ്യം വന്നതിനാലാണ്​ മോഷണത്തിന്​ ശ്രമിച്ചതെന്നും അതാണ്​ കൊലപാതകത്തിലേക്ക്​ നയിച്ചതെന്നുമായിരുന്നു പ്രതിയുടെ വാദം. ഇയാൾക്ക്​ 15 ദിവസത്തിനുള്ളിൽ അപ്പീൽ നൽകാം.

അതേസമയം, കൊല്ലപ്പെട്ടവരുടെ കുടുംബത്തിന്​ ദുബൈ സർക്കാർ പത്തു വർഷത്തെ ഗോൾഡൻ വിസ നൽകിയിരുന്നു. രണ്ട്​ ​മക്കൾക്കും ദമ്പതികളുടെ രക്ഷിതാക്കൾക്കുമാണ്​ ഗോൾഡൻ വിസ നൽകിയത്​. കുട്ടികളുടെ സൗജന്യ വിദ്യാഭ്യാസത്തിന് പൂർണമായും​ സ്​കോളർഷിപ്പും നൽകിയിരുന്നു. ദുബൈ പൊലീസും എമിഗ്രേഷൻ വിഭാഗവുമാണ്​ (ജി.ഡി.ആർ.എഫ്​.എ)​ ഇതിനാവശ്യമായ സംവിധാനങ്ങൾ ഏർപ്പെടുത്തിയത്​.