'ജെറ്റ്​മാൻ' വിൻസൻറ്​ റെഫെ ദുബൈയിൽ അപകടത്തിൽ മരിച്ചു

ദുബൈ: പ്രശ്സ്​ത ജെറ്റ്​മാൻ പൈലറ്റ്​ വിൻസൻറ്​ റഫെ (36) അപകടത്തിൽ മരിച്ചു. ദുബൈയിൽ പരിശീലനത്തിനിടെയാണ്​ ഫ്രാൻസുകാരനായ വിൻസിയുടെ മരണം. ചൊവ്വാഴ്​ച രാവിലെയാണ്​ അപകടം. മരുഭൂമിയിൽ പരിശീലനപറക്കലിനിടെ അപകടത്തിൽപെടുകയായിരുന്നു.

മാസങ്ങൾക്ക്​ മുൻപ്​ ദുബൈയിലെ ജുമൈറ ബീച്ചിൽ നിന്ന്​ 1800 മീറ്റർ ഉയരത്തിലേക്ക്​ പറന്നുയർന്ന വിൻസിയുടെ വീഡിയോ വൈറലായിരുന്നു. മലയാളികൾ അടക്കം പങ്കാളികളായ ജെറ്റ്​മാൻ സംഘത്തി​െൻറ നേതൃത്വത്തിലായിരുന്നു ഈ പരീക്ഷണപറക്കൽ. അത്​ ചരിത്രത്തിലെ നാഴികക്കല്ലാണെന്നായിരുന്നു ദുബൈ കിരീടാവകാശിയും എക്​സിക്യൂട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം വിശേഷിപ്പിച്ചത്​.

ലോകത്തിലെ ഏറ്റവും ഉയരമുള്ള കെട്ടിടമായ ബുർജ്​ ഖലീഫയേക്കാൾ ഉയരത്തിൽ പറന്ന്​ ശ്രദ്ധനേടിയയാളാണ്​ വിൻസൻറ്​. ദുബൈയിൽ നിരവധി പറക്കലുകൾ നടത്തിയിരുന്നു. ജെറ്റ്​പാക്കുകളും കൃത്രിമ ചിറകുകളും ഉപയോഗിച്ച്​ ആകാശത്തേക്ക്​ പറന്നുയരുന്നവരാണ്​ ജെറ്റ്​മാൻമാർ. മലയാളികൾ അടക്കമുള്ളവർ ദുബൈയിൽ ജെറ്റ്​മാൻ പരിശീലനം നടത്തുന്നുണ്ട്​. പ്രൊഫഷനൽ സ്​കൈഡൈവർ, ജമ്പർ, പരിശീലകൻ തുടങ്ങിയ നിലയിൽ പേരെടുത്തയാളാണ്​ വിൻസി.