മകൾ പന്ത്രണ്ടാംതരം പാസായ ദിവസം പിതാവ് ഷാർജയിൽ​ കുഴഞ്ഞുവീണ്​ മരിച്ചു

ഷാർജ: മകളുടെ സി.ബി.എസ്​.ഇ പന്ത്രണ്ടാം ക്ലാസ്​ പരീക്ഷ ഫലം വന്നതിന്​ പിന്നാലെ പിതാവ്​ ഷാർജയിൽ കുഴഞ്ഞുവീണ്​ മരിച്ചു. കൂത്താട്ടുകുളം വടകര ഒലിയപുരം പാലച്ചുവട്ടിൽ ജോസ്​ വർഗീസാണ്​ (55) മരിച്ചത്​. നാട്ടിൽ വിദ്യാർഥിനിയായ​ മകൾ ഡോണ എലിസബത്ത്​ 96 ശതമാനം മാർക്കോടെ വെള്ളിയാഴ്​ചയാണ് വിജയിച്ചത്​.

ഫലം അറിഞ്ഞതിന്​ പിന്നാലെ സുഹൃത്തുക്കൾക്ക്​ മധുര വിതരണം നടത്തിയിരുന്നു. എന്നാൽ, രാത്രിയോടെ കുഴഞ്ഞുവീഴുകയായിരുന്നു. ഹൃദയാഘാതമാണ്​ മരണകാരണം. ഷാർജ സെൻറ് മേരീസ് യാക്കോബായ സിറിയൻ സൂനോറോ പാത്രിയർക്കൽ കത്തീഡ്രൽ ഇടവകാംഗവും മുൻ ട്രസ്​റ്റിയും ഓഡിറ്ററുമായിരുന്നു.

മൃതദേഹം കുവൈത്ത്​ ഹോസ്​പിറ്റലിൽ. നാട്ടിലെത്തിച്ച്​ സംസ്​കരിക്കുമെന്ന്​ ഇടവക മാനേജിങ്​ കമ്മിറ്റി അറിയിച്ചു. ഭാര്യ: മിനി ജോസ്​. മക്കൾ: ഡിയോൺ ജോർജി ജോസ്​, ഡോണ എലിസബത്ത്​ ജോസ്​.