ലോകകപ്പ്​ ട്രോഫിയുടെ 'വിദേശ യാത്ര'ക്ക്​ ദുബൈയിൽ കിക്കോഫ്​

ദുബൈ: കാൽപന്തിന്‍റെ ആ​രവം ലോകം മുഴുവൻ പടർത്താൻ ലോകകപ്പ്​ ട്രോഫിയുടെ '​വിദേശ പര്യടന'ത്തിന്​ ദുബൈയിൽ കിക്കോഫ്​. ഖത്തറിൽ നടന്ന ട്രോഫി പ്രയാണത്തിനൊടുവിലാണ്​ ഗൾഫ്​ ഉൾപ്പെടെയുള്ള വിദേശ രാജ്യങ്ങളിലേക്കും സ്വർണക്കപ്പ്​ എത്തുന്നത്​. ദുബൈ കൊക്കകോള അരീനയിലെ താരസമ്പന്നമായ വേദിയിൽ ലോകകിരീടത്തിന്​ ആവേശോജ്ജ്വല സ്വീകരണമൊരുക്കി. മുൻ ബ്രസീലിയൻ താരം കക്ക, സ്പാനിഷ്​ ഗോൾ കീപ്പർ ഐകർ കാസിയസ്​ എന്നിവർ ചേർന്ന്​ ട്രോഫി കാണികൾക്ക്​ മുന്നിൽ അവതരിപ്പിച്ചു.

മുൻ ബ്രസീൽ ഇതിഹാസം റൊണാൾഡീഞ്ഞോ, പോർചുഗൽ താരം ലൂയി ഫിഗോ തുടങ്ങിയവരും പ​ങ്കെടുത്തു. ലോകകപ്പ്​ യോഗ്യത നേടിയ 32 രാജ്യങ്ങളിൽ ഉൾപ്പെടെ 51 രാജ്യങ്ങളിൽ സന്ദർശനത്തിന്​ ശേഷം നവംബർ 21ന്​ ഖത്തറിലെ ലോകകപ്പ്​ വേദിയിലേക്ക്​ ട്രോഫി തിരികെയെത്തും. ആദ്യമായാണ്​ യോഗ്യത നേടിയ എല്ലാ രാജ്യങ്ങളിലേക്കും ട്രോഫി പ്രയാണം എത്തുന്നത്​. ലോകകപ്പ്​ സ്വപ്​നങ്ങൾ നെയ്തുകൂട്ടുന്ന യു.എ.ഇക്ക്​ രണ്ടു​ മത്സരങ്ങൾകൂടി ​ജയിച്ചാൽ ഈ ലോകകപ്പിൽ പന്ത്​ തട്ടാം. ശക്തരായ ആസ്​ട്രേലിയയും പെറുവുമാണ്​ യു.എ.ഇയുടെ എതിരാളികൾ. ഖത്തറിൽ നടക്കുന്ന ഈ മത്സരങ്ങളിൽ ജയിച്ച്​ ലോകകപ്പ്​ കളിക്കാമെന്ന പ്രതീക്ഷയിലാണ്​ ഇമാറാത്ത്​. ട്രോഫി പ്രയാണത്തിന്‍റെ തുടക്കത്തിൽതന്നെ പങ്കാളികളാകാൻ കഴിഞ്ഞത്​ അഭിമാന നിമിഷമാണെന്ന്​ കക്ക പറഞ്ഞു.

20 വർഷം മുമ്പുള്ള ആദ്യ ലോകകപ്പ്​ കാലവും കക്ക ഓർത്തെടുത്തു. 2010ൽ താൻ നായകനായിരിക്കെ ലോകകപ്പ്​ ഉയർത്തിയത്​ സ്പാനിഷ്​ താരം ഐകർ കാസിയസ്​ അനുസ്മരിച്ചു.