കുട്ടികളുടെ വായനോത്സവത്തിൽ തരംഗമായി' കിഡ്​സ്​ ആഫ്രിക്കാന'

ഷാർജ എക്സ്​പോ സെന്‍ററിൽ നടക്കുന്ന കുട്ടികളുടെ വായനോത്സവത്തിൽ പുതു തരംഗമായി മാറി മസാക കിഡ്​സ്​ ആഫ്രിക്കാന. വന്യമായ നൃത്ത ശൈലി കൊണ്ട്​ കുറഞ്ഞ കാലത്തിനുള്ളിൽ കോടിക്കണക്കിന്​ ആരാധകരുടെ ഹൃദയങ്ങൾ കീഴടക്കി നൃത്ത ലോകത്ത്​ ശക്​തമായ സാന്നിദ്ധ്യമായി മാറുന്ന യുഗാണ്ടൻ നൃത്ത സംഘമാണ്​ മസാക കിഡ്​സ്​ ആഫ്രിക്കാന. ഈ മാസം മൂന്നു മുതൽ ആരംഭിച്ച ഷാർജ കുട്ടികളു​ടെ വായനോത്സവ വേദിയിലാണ്​ കുട്ടിക്കൂട്ടം പകർന്നാടിയത്​.

12ന്​ അവസാനിക്കുന്ന മേളയിൽ ഞായറാഴ്ച വരെ ആഫ്രിക്കൻ കുട്ടിപ്പട്ടാളം ചുവടുവെക്കും. രണ്ടു വയസ്സിന്​ മുകളിലുള്ള കുട്ടികൾ മാത്രമാണ്​​ സംഘത്തിലെ മുഴുവൻ അംഗങ്ങളുമെന്നതാണ്​ ഏറ്റവും വലിയ ആകർഷണം. അതേസമയം, കുട്ടി സംഘമാണെങ്കിലും സമൂഹ മാധ്യമങ്ങളിൽ വലിയ ആരാധക വൃന്ദം തന്നെ സംഘത്തിനുണ്ട്​. കുറഞ്ഞ കാലം കൊണ്ട്​ യൂട്യൂബിൽ മാത്രം 3.45 മില്യൺ വരിക്കാരേയാണ്​ ഇവർ സ്വന്തമാക്കിയത്​​. ഇൻസ്റ്റഗ്രാമിൽ 7.8 മില്യണും ടിക്​ടോക്കിൽ 5.5 മില്യൺ പേരും പിന്തുടരുന്ന ലോകത്തെ ഏറ്റവും വലിയ കുട്ടിനൃത്ത സംഘമാണിവർ​​.

ആഫ്രിക്കൻ വൻകരയിൽ നിന്നുള്ള വെറുമൊരു നൃത്തസംഘം മാത്രമല്ല യഥാർഥത്തിൽ മസാക കിഡ്​സ്​ ആഫ്രിക്കാന. മറിച്ച്​ പ്രതിസന്ധികളെ അവസരങ്ങളാക്കി മാറ്റി ജീവിതത്തിൽ വൻ വിജയം നേടിയ ത്രസിപ്പിക്കുന്ന ഒരു കഥ കൂടി ഇവർക്ക്​ പിന്നിലുണ്ട്​​. മധ്യ യുഗാണ്ടയിലെ മസാക​യെന്ന കുഗ്രാമത്തിൽ നിന്നാണ്​ അക്കഥ ആരംഭിക്കുന്നത്​.

മസാക, ആഫ്രിക്കയിലെ ഹൃദയതാളം

ആഭ്യന്തര യുദ്ധവും രോഗങ്ങളും പട്ടിണിയും അനാഥത്വത്തിന്‍റെ നീറുന്ന നോവുകളും ജീവിതത്തെ ദുരിതപൂർണമാക്കിയപ്പോൾ അൽപം ആശ്വാസമെന്ന നിലയിലാണ്​ മസാകയിലെ കുഗ്രാമവസികളായ കുട്ടികൾ ആഫ്രിക്കൻ താളത്തിൽ ചുവടുകൾ വെച്ച്​ തുടങ്ങിയത്​​​. അലങ്കൃതമായി വേദിയോ വർണ ചമയങ്ങളുടെ അകമ്പടിയോ ഇല്ലാതെ നഗ്​നപാദങ്ങളുമായി ഹൃദയതാളത്തിൽ എല്ലാം മറന്നുകൊണ്ട്​ ഇവർ ആടിത്തിമിർക്കുകയായിരുന്നു. മസാകയിലെ സന്നദ്ധ പ്രവർത്തകനും പ്രാദേശിക അധ്യാപകനുമായ കാവുമ ദൗദയാണ് മുഷിഞ്ഞ വസ്ത്രങ്ങളും ഒട്ടിയ വയറുമായി ആഫ്രിക്കയുടെ ഏതോ തുരുത്തിൽ ആരുമറിയാത്ത ജീവിതതാളമായി ഒതുങ്ങുമായിരുന്ന ഈ സംഘത്തെ ലോകത്തിന്‍റെ നെറുകയിൽ എത്തിച്ചത്​​.

2014-ൽ മസാകയിലെ ഗ്രാമത്തിൽ സന്ദർശനത്തിനിടെയാണ്​ കുട്ടികളുടെ നൃത്തം ദൗദയുടെ ശ്രദ്ധയിൽപ്പെടുന്നത്​​.​ സമൂഹ മാധ്യമങ്ങൾ കടന്നു ചെല്ലാത്ത കുഗ്രാമത്തിൽ നിന്ന്​ ഇദ്ദേഹം മൊബൈലിൽ പകർത്തിയ വീഡിയോ ഈ കുരുന്നുകളുടെ ജീവിതം മാറ്റിമറിക്കുകയായിരുന്നു​. ലാഭേച്ഛയില്ലാതെ ​ഇവരുടെ നൃത്തവും പാട്ടും സമൂഹ മാധ്യമങ്ങളിൽ ഇദ്ദേഹം പങ്കുവെച്ചതോടെ അവ അതിവേഗം വൈറലായി. അതിലൂടെ പരസ്പരം ലോകവുമായും സ്വന്തം കഴിവുകൾ കാണാനും പ്രത്യാശ പുലർത്താനും അവരെ പ്രാപ്തരാക്കുകയും ചെയ്തു. ചിതറിക്കിടന്ന കുട്ടിക്കൂട്ടത്തിന്​ സംഘരൂപം നൽകിയതും ദൗദയാണ്​. ഇപ്പോൾ 30 അംഗങ്ങളുള്ള ഒരു നൃത്ത സംഘമാണിത്​. പ്രഫഷണലായി നൃത്തം അഭ്യസിച്ചിട്ടില്ലെങ്കിലും ഇവരുടെ വന്യമായ ശൈലി ലോകം അതിവേഗം ഏറ്റെടുത്തുകഴിഞ്ഞു. ഐക്യ രാഷ്ട്ര സഭ ആസ്ഥാനമായ ന്യൂയോർക്ക്​, വാഷിങ്​ടൺ ഡി.സിയിലെ ലോക ബാങ്ക്​, ഇത്യോപ്യയിലെ ആഫ്രിക്കൻ യൂനിയൻ ആസ്ഥാനം എന്നിവ ഉൾപ്പെടെ ലോകത്തിന്‍റെ വിവിധയിടങ്ങളിൽ മസാക കിഡ്​സ്​ പകർന്നാടിയിട്ടുണ്ട്​. 2021ൽ നിക്ക​ളോഡിയൻ കിഡ്​സ്​ ചോയിസ്​ അവാർഡ്​ ഉൾപ്പെടെ നിരവധി പുരസ്കാരങ്ങളും ഇവരെ തേടിയെത്തി​.