ദുബൈയിൽ കെ.എം.സി.സിക്ക് സ്വന്തം ആസ്ഥാനം

ദുബൈ: കെ.എം.സി.സിക്ക്​ ദുബൈയിൽ സ്വന്തമായി ആസ്ഥാനം നിർമ്മിക്കുന്നതിന് ദുബൈ സർക്കാർ ഭൂമി നൽകി. ദുബൈയിലെ റാഷിദിയയിലാണ് ഒന്നര ഏക്കർ ഭൂമി അനുവദിച്ചതെന്ന്​ ഇബ്രാഹിം എളേറ്റിൽ വാർത്തസമ്മേളനത്തിൽ അറിയിച്ചു. എം.എ. യൂസഫലിയുടെ ശ്രമഫലമായാണ്​ ഭൂമി ലഭ്യമായത്​. ഇവിടെ കെ.എം.സി.സിയുടെ വലിയ ആസ്ഥാനം സ്ഥാപിക്കും. ദേര അബ്ര, സബക, അൽ ബറഹ, അൽ മംസർ എന്നിവിടങ്ങളിൽ പ്രവർത്തിച്ചുവന്നിരുന്ന കെ.എം.സി.സി ആസ്ഥാനം ഇപ്പോൾ അബുഹയിലെ വാടക കെട്ടിടത്തിലാണ് പ്രവർത്തിക്കുന്നത്​.

സി.ഡി.എ ഡയറക്ടർ അഹമ്മദ് അബ്ദുൽ കരീം ജുൽഫാർ, എം.എ. യൂസഫലി, ദുബൈ നോളെഡ്ജ് ഫണ്ട്‌ എസ്റ്റാബ്ലിഷ്മെന്‍റ്​ സി.ഇ.ഒ അബ്ദുല്ല അൽ അവാർ, വ്യവസായികളായ ഖാദർ തെരുവത്ത്, അബ്ദുല്ല പൊയിൽ, ദുബൈ കെ.എം.സി.സി സി.ഡി.എ ഡയറക്ടർ ബോർഡ്‌ പ്രസിഡന്‍റ്​ ഇബ്രാഹിം എളേറ്റിൽ, ഡയറക്ടർ മാരായ ശംസുദ്ധീൻ ബിൻ മുഹിയിദ്ധീൻ, ഹുസൈനാർ ഹാജി എടച്ചാക്കൈ, ഹംസ തൊട്ടി, വി.ടി മുസ്ഥഫ വേങ്ങര, അഡ്വ. ഇബ്രാഹിം ഖലീൽ എന്നിവർ ഒപ്പുവെക്കൽ ചടങ്ങിൽ സംബന്ധിച്ചതായി എളേറ്റിൽ അറിയിച്ചു.

പുറത്താക്കിയിട്ടും 'പുറത്താകാതെ' ഇബ്രാഹിം എളേറ്റിൽ

ദുബൈ: മുസ്​ലീം ലീഗിൽ നിന്നും പോഷക സംഘടനയായ കെ.എം.സി.സിയിൽ നിന്നും പുറത്താക്കിയെങ്കിലും 'പുറത്താകാതെ' ഇംബ്രാഹിം എളേറ്റിൽ. അച്ചടക്ക ലംഘനത്തിന്‍റെ പേരിൽ ദുബൈ കെ.എം.സി.സി പ്രസിഡന്‍റ്​ സ്ഥാനത്ത്​ നിന്നുൾപെടെ ലീഗ്​ നേതൃത്വം പുറത്താക്കിയെങ്കിലും കെ.എം.സി.സിയുടെ പേരിൽ വാർത്തസമ്മേളനം സംഘടിപ്പിച്ചതും ഷാർജ പുസ്തകോത്സവത്തിൽ സ്റ്റാൾ ഇട്ടതുമെല്ലാം എളേറ്റിലാണ്​. കഴിഞ്ഞ ദിവസം ദുബൈ കെ.എം.സി.സിക്ക്​ സർക്കാർ ഭൂമി നൽകുന്നതുമായി ബന്ധപ്പെട്ട​ ധാരണ പത്രത്തിൽ ഒപ്പുവെക്കുന്ന ചടങ്ങിലും എളേറ്റിൽ പ​ങ്കെടുത്തു​. കെ.എം.സി.സി സി.ഡി.എ ഡയറക്ടർ ബോർഡ്​ പ്രസിഡന്‍റ്​ എന്ന പേരിലാണ്​ എളേറ്റിൽ കെ.എം.സി.സിയിൽ ഇപ്പോഴും തുടരുന്നത്​. യു.എ.ഇയിൽ സംഘടനകൾക്ക്​ അനുമതി നൽകുന്ന കമ്യൂനിറ്റി ഡവലപ്​മെന്‍റ്​ അതോറിറ്റിയിൽ (സി.ഡി.എ) പ്രസിഡന്‍റായി ഇപ്പോഴും എളേറ്റിലിന്‍റെ പേരാണുള്ളത്​. ഈ കരുത്തിലാണ്​ ഇപ്പോഴും എളേറ്റിൽ കെ.എം.സി.സിയുടെ ഭാഗമായി തുടരുന്നത്​.

ഒക്ടോബർ 15നാണ്​ ഇബ്രാഹിം എളേറ്റിലിനെ അച്ചടക്ക വിരുദ്ധ പ്രവർത്തനത്തിന്‍റെ പേരിൽ സസ്​പെൻഡ്​ ചെയ്തത്​. മുസ്​ലീം ലീഗിന്‍റെയും പോഷക സംഘടനകളുടെയും ഭാരവാഹി സ്ഥാനത്ത്​ നിന്ന്​ അന്വേഷണ വിധേയമായി സസ്​പെൻഡ്​ ചെയ്യുന്നതായി മുസ്​ലീം ലീഗ്​ സംസ്ഥാന കമ്മിറ്റി 'ച​ന്ദ്രിക' ദിന പത്രത്തിലൂടെയാണ്​ അറിയിച്ചത്​. എന്നാൽ, ഇതിന്​ ശേഷവും അബൂഹയിലെ കെ.എം.സി.സി ആസ്​ഥാനത്ത്​ നിത്യ സന്ദർശകനായിരുന്നു എളേറ്റിൽ. ഷാർജ പുസ്തകോത്സവത്തിൽ കെ.എം.സി.സിയുടെ സ്റ്റാൾ ഏറ്റെടുത്ത്​ നടത്തിയ എളേറ്റിൽ അവിടെ സ്ഥിര സാന്നിധ്യമായിരുന്നു. സാദിഖലി തങ്ങൾ ഉൾപെടെയുള്ളവർ പുസ്തകോത്സവത്തിൽ എത്തിയെങ്കിലും എളേറ്റിലുമായി കൂടിക്കാഴ്ച നടത്തിയില്ല. എന്നാൽ, കെ.എം.സി.സിക്ക്​ ദുബൈ സർക്കാർ ഭൂമി നൽകിയതുമായി ബന്ധപ്പെട്ട ധാരണ പത്രം ഒപ്പുവെക്കൽ ചടങ്ങിൽ മറ്റ്​ കെ.എം.സി.സി നേതാക്കൾക്കൊപ്പമാണ്​ എളേറ്റിലും പ​ങ്കെടുത്തത്​. കെ.എം.സി.സി ഡയറക്ടർമാരായ ശംസുദ്ദീൻ ബിൻ മുഹ്​യുദ്ദീൻ, ഹുസൈനാർ ഹാജി എടച്ചാക്കൈ, ഹംസ തൊട്ടി, വി.ടി. മുസ്തഫ വേങ്ങര, അഡ്വ. ഇബ്രാഹിം ഖലീൽ എന്നിവരും പ​ങ്കെടുത്തു. ലുലു ഗ്രൂപ്പ്​ ചെയർമാൻ എം.എ. യൂസുഫലിയുടെ സാന്നിധ്യത്തിലായിരുന്നു ചടങ്ങ്​. ഇതുമായി ബന്ധപ്പെട്ട്​ വിളിച്ച വാർത്ത സമ്മേളനം നടത്തിയത്​ കെ.എം.സി.സിയുടെ ബാനറിന്​ മുൻപിലായിരുന്നു.

മിഡിലീസ്റ്റ്​ ചന്ദ്രികയുടെ നടത്തിപ്പുമായി ബന്ധപ്പെട്ട ക്രമക്കേടാണ്​ എളേറ്റിലിന്‍റെ പുറത്താക്കലിൽ കലാശിച്ചത്​. കോടിക്കണക്കിന്​ രൂപയുടെ ക്രമക്കേടിനെ തുടർന്ന്​ ചന്ദ്രികയുടെ പ്രസിദ്ധീകരണം നിർത്തിവെച്ചിരിക്കുകയാണ്​.

സസ്​പെൻഷൻ അംഗീകരിക്കുന്നു -​എളേറ്റിൽ

ദുബൈ: മുസ്​ലീം ലീഗ്​ നേതൃത്വത്തിന്‍റെ സസ്​പെൻഷൻ അംഗീകരിക്കുന്നുവെന്നും എന്നാൽ, ദു​ബൈ കെ.എം.സി.സി സി.ഡി.എ ഡയറക്ടർ ബോർഡിന്‍റെ പ്രസിഡന്‍റ്​ താൻ തന്നെയാണെന്നും ഇബ്രാഹിം എളേറ്റിൽ. ദുബൈയിൽ വാർത്തസമ്മേളനത്തിൽ സംസാരിക്കുകയായിരുന്നു അദ്ദേഹം. ഈ രാജ്യത്തിന്‍റെ നിയമത്തിന്​ അനുസൃതമായി മാത്രമെ സംഘടനക്ക്​ പ്രവർത്തിക്കാൻ കഴിയു. കെ.എം.സി.സി രജിസ്റ്റർ ചെയ്തത് യു.എ.ഇയിലെ​ കമ്യൂനിറ്റി ഡവലപ്​മെന്‍റ്​ അതോറിറ്റിയിലാണ്​. അത്​ പ്രകാരം താൻ തന്നെയാണ്​ ഇപ്പോഴും പ്രസിഡന്‍റ്​. അതിനാൽ കരാറിൽ ഒപ്പുവെക്കാനും വാർത്തസമ്മേളനം വിളിക്കാനും തനിക്കേ കഴിയൂ. മുസ്​ലീം ലീഗ്​ നേതൃത്വത്തെയും നേതാക്കളെയും ബഹുമാനമുണ്ട്​. അവരുമായി ഇപ്പോഴും ബന്ധമുണ്ട്​. ഈ വിഷയത്തിൽ നേതാക്കൾ ഉചിതമായ തീരുമാനമെടുക്കും. അവർ നിർദേശിക്കുന്ന അന്തിമ പരിഹാരം എന്തായാലും അംഗീകരിക്കും. മെംബർഷിപ്പ്​ ക്യാമ്പയിൻ പൂർത്തിയാക്കിയാൽ പുതിയ കമ്മിറ്റി തെരഞ്ഞെടുപ്പ്​ നടക്കും. രക്​തത്തിൽ അലിഞ്ഞുചേർന്നതാണ്​ പ്രസ്ഥാനം. വാർത്തസമ്മേളനം വിളിക്കുമ്പോൾ നേതൃത്വത്തിന്‍റെ അനുവാദം ചോദിക്കുന്ന പതിവ്​ കെ.എം.സി.സിയിൽ ഇല്ലെന്നും അദ്ദേഹം പറഞ്ഞു.