കെ.പി.സി.സി പുനഃസംഘടന മൂന്നാഴ്ചക്കുള്ളിൽ -പ്രസിഡന്‍റ്​ കെ. സുധാകരൻ

ഷാർജ: കെ.പി.സി.സി പുനഃസംഘടനയുമായി ബന്ധപ്പെട്ട നടപടികൾ രണ്ടോ മൂന്നോ ആഴ്ചക്കുള്ളിൽ ഉണ്ടാകുമെന്ന്​ പ്രസിഡന്‍റ്​ കെ. സുധാകരൻ. ഇതുമായി ബന്ധപ്പെട്ടിട്ടുള്ള ചർച്ച ആരംഭിച്ചിട്ടുണ്ടെന്നും അദ്ദേഹം പറഞ്ഞു. ഷാർജയിൽ മാധ്യമങ്ങളോട്​ സംസാരിക്കുകയായിരുന്നു അദ്ദേഹം.

വയനാട്​ ദുരന്തത്തിൽപ്പെട്ടവർക്ക്​ വെറുതെ വാഗ്ദാനം നൽകിയ ശേഷം സർക്കാർ നിരാശരാക്കുകയായിരുന്നു. കഴിഞ്ഞ ദിവസം അവിടെ നടത്തിയ സമരത്തിൽ കോൺഗ്രസ്​ പ്രവർത്തകരെ മർദിച്ച പൊലീസുകാരുടെ മാനസികാവസ്ഥ എന്താണെന്ന്​ ആലോചിച്ചു​ പോകുന്നു.

ആ ഉദ്യോഗസ്ഥരുടെ മാനസികാവസ്ഥയെയാണ്​ വിമർശിക്കപ്പെടേണ്ടത്​. ദുരന്തം നടന്നിട്ട്​ ഇത്രകാലം കഴിഞ്ഞിട്ടും ഒരാൾക്ക്​ പോലും വീട്​ വെച്ച്​ നൽകാൻ സർക്കാറിന്​ കഴിഞ്ഞിട്ടില്ല. അതിനെ മാധ്യമങ്ങൾ എന്താണ്​ വിമർശിക്കാത്തതെന്നും അദ്ദേഹം ചോദിച്ചു.

നിശ്ചലമായി നിൽക്കുന്ന സർക്കാറിനെതിരെ സമരം ചെയ്യുക​യല്ലാതെ പ്രതിപക്ഷമെന്ന നിലയിൽ അവരെ അഭിനന്ദിക്കുകയാണോ വേണ്ടത്​. വയനാട്​ മുണ്ടക്കൈ പുനരധിവാസവുമായി ബന്ധപ്പെട്ട സമരം കോൺഗ്രസ് ഏറ്റെടുക്കും. ചേലക്കര മണ്ഡലത്തിൽ നടന്ന ഉപതെരഞ്ഞെടുപ്പിൽ കോൺഗ്രസിന്‍റെ സംഘടന സംവിധാനത്തിൽ ചെറിയ പോരായ്മകൾ ഉണ്ടായിട്ടുണ്ട്​.

എന്നാൽ, അതിനെ പെട്ടെന്ന്​ മറികടക്കാൻ കഴിഞ്ഞുവെന്നും കെ.പി.സി.സി പ്രസിഡന്‍റ്​ പറഞ്ഞു. കോൺഗ്രസ് അനുകൂല സംഘടനയായ ഇൻകാസ് ഒരുക്കിയ യു.എ.ഇ ദേശീയദിന പരിപാടിയിലും സർക്കാറിനെതിരെ കെ. സുധാകരൻ ശക്തമായ വിമർശനമാണ്​ ഉന്നയിച്ചത്​.

സി.പി.എം അണികൾക്കുപോലും മുഖ്യമന്ത്രി പിണറായി വിജയനിൽ വിശ്വാസം നഷ്ടപ്പെട്ടതായി അദ്ദേഹം പറഞ്ഞു. എങ്ങനെയെങ്കിലും പണമുണ്ടാക്കുക മാത്രമായി മുഖ്യമന്ത്രിയുടെ ലക്ഷ്യം മാറിയിരിക്കുന്നുവെന്ന്​ അദ്ദേഹം കുറ്റപ്പെടുത്തി. സി.പി.എം പ്രാദേശിക കമ്മിറ്റികളിൽപോലും സർക്കാറിന്‍റെ ഭരണപരാജയം വലിയ ചർച്ചയാണ്​. മുഖ്യമന്ത്രിക്കെതിരെയുള്ള ആക്ഷേപങ്ങൾ വളരെ വലുതാണ്​.

എട്ടു വർഷം ഭരിച്ച മുഖ്യമന്ത്രി പിണറായിയുടെ പേരിൽ ഉയർന്ന ഒരു വികസനം ചൂണ്ടിക്കാണിക്കാൻ സി.പി.എമ്മുകാരെ വെല്ലുവിളിക്കുകയാണ്​. ജനങ്ങൾ എതിരാണ്​. പാർട്ടി അണികൾ എതിരാണ്​. അദ്ദേഹത്തിന്​ ഒറ്റ ലക്ഷ്യമേയുള്ളൂ. പണം പണം അതുമാത്രമാണ്​ അദ്ദേഹത്തിന്‍റെ ലക്ഷ്യമെന്നും സുധാകരൻ കുറ്റപ്പെടുത്തി.