അജ്മാനിൽ വൻ തീപിടിത്തം; പത്ത് ടാങ്കറുകൾ കത്തിനശിച്ചു

അജ്മാന്‍: അജ്മാനിലുണ്ടായ വൻ തീപിടിത്തത്തിൽ പത്ത് ഡീസൽ ടാങ്കർ ട്രക്കുകൾ കത്തിനശിച്ചു. അജ്മാനിലെ അൽ ജർഫ് വ്യാവസായിക മേഖലയിലാണ് സംഭവം. സംഭവത്തിൽ ആളപായമൊന്നും റിപ്പോർട്ട് ചെയ്തിട്ടില്ല. ജര്‍ഫില്‍ പ്രവര്‍ത്തിക്കുന്ന രണ്ട് കമ്പനികളുടെതാണ് ട്രക്കുകളെന്ന് അജ്മാന്‍ പൊലീസ് അറിയിച്ചു. വ്യാഴാഴ്ച പുലർച്ചെയുണ്ടായ സംഭവത്തെ തുടര്‍ന്ന് രണ്ട് സിവിൽ ഡിഫൻസ് സ്റ്റേഷനുകളിലെ സംഘങ്ങൾ ഒരു മണിക്കൂറിനുള്ളിൽ തീ നിയന്ത്രണ വിധേയമാക്കി. സിവില്‍ ഡിഫന്‍സ് അധികൃതരുടെ പെട്ടന്നുള്ള ഇടപെടല്‍ തീ സമീപ പ്രദേശങ്ങളിലേക്ക് പടരുന്നത് തടയുകയും ചെയ്തു. അപകട കാരണം വ്യക്തമല്ല.

പുലർച്ച 1.40നാണ് അപകടമുണ്ടായതെന്നും ഒരു മണിക്കൂറിനുള്ളിൽ തീ പൂർണ്ണമായും നിയന്ത്രിക്കാൻ കഴിഞ്ഞെന്നും അജ്മാൻ സിവിൽ ഡിഫൻസ് ഡയറക്ടർ ജനറൽ കേണൽ റായ്ദ് ഉബൈദ് അൽ സാബി പറഞ്ഞു. തീപിടിത്തത്തിന്‍റെ കാരണങ്ങൾ കണ്ടെത്താനുള്ള അന്വേഷണങ്ങൾ നടന്നുകൊണ്ടിരിക്കുകയാണെന്നും അദ്ദേഹം കൂട്ടിച്ചേർത്തു.