മലബാര്‍ ഗോള്‍ഡ് ഒമ്പത്​ ഷോറൂമുകൾ കൂടി തുറന്നു

ദുബൈ: വിപുലീകരണത്തി‍െൻറ ഭാഗമായി മലബാര്‍ ഗോള്‍ഡ് ആൻഡ്​ ഡയമണ്ട്സ് ഒമ്പത്​ പുതിയ ഷോറൂമുകള്‍ കൂടി തുറന്നു. ഒറ്റ ദിവസമാണ് യു.എ.ഇയിൽ ആറും​ ഇന്ത്യയിൽ മൂന്നും ഷോറൂമുകൾ ഉദ്ഘാടനം ചെയ്തത്​. ദുബൈ ഗോള്‍ഡ് സൂക്കിൽ മൂന്നും സിറ്റി സെന്‍റർ അൽ സാഹിയ, ഷാർജ ലുലു മുവൈല, ജബൽ അലി ക്രൗൺ മാൾ എന്നിവിടങ്ങളിൽ ഓരോ ഷോറൂമുമാണ്​ തുറന്നത്​. ഇന്ത്യയിൽ ബംഗളൂരുവിലെ എച്ച്.എസ്.ആര്‍ ലേഔട്ട്, ഛത്തീസ്ഗഡിലെ റായ്പൂര്‍, പുണെയിലെ ഹഡപ്സര്‍ എന്നിവിടങ്ങളിലാണ് ഷോറൂമുകള്‍ ആരംഭിച്ചത്​.

ഉപഭോക്​താക്കളുടെ വിശ്വാസ്യതയാണ്​ മലബാറി‍െൻറ വിജയത്തിന്​ പിന്നിലെന്ന്​ ഗ്രൂപ് ചെയര്‍മാന്‍ എം.പി. അഹ​മ്മദ് വ്യക്തമാക്കി. ജി.സി.സിയിലും ഇന്ത്യയിലും വിപുലീകരണ പദ്ധതികളുണ്ട്​. ഗ്രൂപ്പിന് ശക്തമായ സാന്നിധ്യമുള്ള പ്രദേശങ്ങളില്‍ റീട്ടെയില്‍ സാന്നിധ്യം ശക്തിപ്പെടുത്തുന്നത് തുടരും. ബ്രാന്‍ഡിന് ലഭിച്ച സ്വീകാര്യത വിപുലീകരണത്തിന്​ കൂടുതൽ ആത്മവിശ്വാസം പകരുന്നതാണെന്നും അദ്ദേഹം കൂട്ടിചേർത്തു. സ്വർണ വ്യാപാരത്തി‍െൻറ കേന്ദ്രമായ ഗോൾഡ്​ സൂഖിൽ മലബാർ ഗ്രൂപ്പി‍െൻറ സാന്നിധ്യം ശക്​തമാക്കുന്നത്​ സന്തോഷകരമാണെന്ന്​ മലബാര്‍ ഗോള്‍ഡ് ആൻഡ്​ ഡയമണ്ട്സ് ഇന്‍റര്‍നാഷനല്‍ ഓപറേഷന്‍സ് മാനേജിങ് ഡയറക്ടര്‍ ഷംലാല്‍ അഹ്​മദ് പറഞ്ഞു. മഹാമാരിക്കാലത്തിന്​ ശേഷമുള്ള വീണ്ടെടുപ്പി‍െൻറ സമയമാണിതെന്നും എന്നും പോസിറ്റിവ്​ എനർജി നൽകിയ നഗരമാണ്​ ദുബൈ എന്നും അദ്ദേഹം കൂട്ടിച്ചേർത്തു. ഉപഭോക്​താക്കൾക്ക്​ ലോകോത്തര ജ്വല്ലറി അനുഭവമായിരിക്കും പുതിയ ഷോറൂമുകളും സമ്മാനിക്കുകയെന്ന്​ മലബാര്‍ ഗ്രൂപ് വൈസ് ചെയര്‍മാന്‍ കെ.പി. അബ്ദുല്‍ സലാം പറഞ്ഞു.

ദുബൈ ഗോള്‍ഡ് സൂക്കിലെ പുതിയ ഷോറൂമുകള്‍ ഇത്​ര ദുബൈ സി.ഇ.ഒ ഇസ്സാം ഗലദാരി, ഡി.ഇ.ഡി ബിസിനസ് രജിസ്ട്രേഷന്‍ ഡയറക്ടര്‍ ഇന്‍ ബി.ആർ.എല്‍ വലീദ് അബ്​ദുൽ മാലിക് എന്നിവര്‍ ഉദ്ഘാടനം ചെയ്തു. ഇതോടെ ഈ പ്രദേശത്തെ ആകെ ഷോറൂമുകളുടെ എണ്ണം ഏഴായി. ഷാര്‍ജ ലുലു മുവൈലയിലെ മലബാര്‍ ഗോള്‍ഡ് ആൻഡ്​ ഡയമണ്ട്സ് ഷോറൂം മലബാര്‍ ഗ്രൂപ് സീനിയര്‍ ഡയറക്ടര്‍ സി. മായിന്‍ കുട്ടി ഉദ്ഘാടനം ചെയ്തു. ഷാര്‍ജയിലെ സിറ്റി സെന്‍റര്‍ അല്‍ സാഹിയ ഷോറൂമി‍െൻറ ഉദ്​ഘാടനം സിറ്റി സെന്‍റര്‍ സീനിയര്‍ മാള്‍ മാനേജര്‍ മുഹമ്മദ് അല്‍ റയിസ്​ നിർവഹിച്ചു. ജബല്‍ അലി ഷോറൂം മലബാര്‍ ഗ്രൂപ് ചെയര്‍മാന്‍ എം.പി. അഹമ്മദും ഉദ്ഘാടനം ചെയ്തു.