മലാല യൂസുഫ്​സായ്​ എക്സ്​പോ സന്ദർശിച്ചു

ദുബൈ: സമാധാന നൊബേൽ ജേതാവും പാകിസ്താനി വനിത വിദ്യാഭ്യാസ പ്രവർത്തകയുമായ മലാല യൂസുഫ്​സായ്​ എക്സ്​പോ 2020ദുബൈ സന്ദർശിച്ചു.

വുമൺസ്​, പാകിസ്താൻ പവലിയനുകൾ സന്ദർശിച്ച മലാല, പെൺകുട്ടികൾ അവരുടെ ശബ്ദത്തിൽ വിശ്വസിക്കുകയും ലോകം ശരിക്കും അവരെ കേൾക്കേണ്ടതുണ്ടെന്നും അഭിപ്രായപ്പെട്ടു. 12.7 കോടിയിലധികം പെൺകുട്ടികൾക്ക്​ ഇപ്പോഴും വിദ്യാഭ്യാസം നിഷേധിക്കപ്പെടുന്നു. ഇത്തരക്കാർക്ക് സുരക്ഷിതവും സൗജന്യവും ഗുണനിലവാരവുമുള്ള സമ്പൂർണ വിദ്യാഭ്യാസം ലഭ്യമാക്കുന്നത്​ വരെ എ‍െൻറ പോരാട്ടം തുടരും. മാറ്റം ആഗ്രഹിക്കുന്നെങ്കിൽ അതിൽ വിശ്വസിക്കണം. ഒരു പെൺകുട്ടിപോലും സ്കൂളിന്​ പുറത്താകാത്ത ദിവസമാണ്​ എ‍െൻറ സ്വപ്നം -വുമൺസ്​ പവലിയനിൽ അവർ പറഞ്ഞു. എക്സ്​പോയുടെ സംഘാടനത്തെ അഭിനന്ദിച്ച മലാല, വുമൺസ്​ പവലിയൻ സന്ദർശിക്കുന്ന ഓരോ പെൺകുട്ടിക്കും പഠിക്കാൻ ഒരു കാര്യമെങ്കിലും ഉണ്ടെന്ന്​ കൂട്ടിച്ചേർത്തു. അടുത്ത കാലത്ത്​ വിവാഹിതയായ മലാലക്കൊപ്പം പങ്കാളി ഷഹ്​സാദ്​ റായും കുടുംബാംഗങ്ങളുമുണ്ടായിരുന്നു.