മലയാളം മിഷന്‍ പ്രവേശനോത്സവം സംഘടിപ്പിച്ചു

അബുദബി: മലയാളം മിഷന്‍ അബൂദബി മേഖലയുടെ കീഴിലെ സൗജന്യ മലയാള ഭാഷ പാഠന ക്ലാസുകളിലേക്കുള്ള പ്രവേശനോത്സവം സംഘടിപ്പിച്ചു. ‘എവിടെയെല്ലാം മലയാളി അവിടെയെല്ലാം മലയാളം’ എന്ന സന്ദേശവുമായി കേരള സംസ്ഥാന സാംസ്‌കാരിക വകുപ്പി​​​െൻറ കീഴില്‍ രൂപവത്​കരിച്ച മലയാളം മിഷന്‍ ആവിഷ്‌കരിച്ച പാഠ്യപദ്ധതിക്കാണ് കേരള സോഷ്യല്‍ സ​​െൻററില്‍ (കെ.എസ്​.സി) തുടക്കം കുറിച്ചത്.
കണിക്കൊന്ന (സര്‍ട്ടിഫിക്കറ്റ് കോഴ്‌സ്), സൂര്യകാന്തി (ഡിപ്ലോമ), ആമ്പല്‍ (ഹയര്‍ ഡിപ്ലോമ), നീലക്കുറിഞ്ഞി (സീനിയര്‍ ഹയര്‍ ഡിപ്ലോമ) എന്നീ നാല് ഘട്ടങ്ങളായാണ് മലയാള ഭാഷാ പാഠ്യപദ്ധതി നടത്തുന്നത്. കോഴ്‌സ് പൂര്‍ത്തിയാക്കുന്നവര്‍ക്ക് സംസ്ഥാന സര്‍ക്കാറി​​​െൻറ സര്‍ട്ടിഫിക്കറ്റ് നല്‍കും.

മലയാളം മിഷന്‍ അബൂദബി കണ്‍വീനര്‍ പി.വി. പത്മനാഭ​​​െൻറ അധ്യക്ഷതയില്‍ നടത്തിയ പ്രവേശനോത്സവ പരിപാടി കെ.എസ്​.സി പ്രസിഡൻറ്​ എ.കെ. ബീരാന്‍കുട്ടി ഉദ്ഘാടനം ചെയ്തു. ലോക കേരള സഭാംഗം കെ.ബി. മുരളി, ഇന്ത്യ സോഷ്യല്‍ ആൻഡ്​ കൾച്ചറൽ സ​​െൻറർ സാഹിത്യ വിഭാഗം സെക്രട്ടറി ജ്യോതിലാല്‍ ബാലന്‍, അബൂദബി മലയാളി സമാജം കോഒാഡിനേറ്റര്‍ പുന്നൂസ് ചാക്കോ, ഇന്ത്യന്‍ ഇസ്​ലാമിക് സ​​െൻറര്‍ പ്രതിനിധി മുഹമ്മദ് റിഷാദ്, മലയാളം മിഷന്‍ യു.എ.ഇ കമ്മിറ്റി അംഗം വി.പി. കൃഷ്ണകുമാര്‍ എന്നിവര്‍ സംസാരിച്ചു.

ആദ്യ കോഴ്‌സിലേക്കുള്ള പാഠപുസ്തകമായ ‘കണിക്കൊന്ന’ മലയാളം മിഷന്‍ ജോയൻറ്​ കണ്‍വീനര്‍ സിന്ധു ഗോവിന്ദന്‍ മലയാളം അധ്യാപിക നൗഷിദ ഫസലിന് കൈമാറി. കീര്‍ത്തി ഉമേഷ്, ദേവിക രമേശ്, സാമിയ സുരേഷ് എന്നിവർ കവിതകള്‍ ആലപിച്ചു. മലയാളം മിഷന്‍ അബൂദബി മേഖല കോഒാഡിനേറ്റര്‍ സഫറുല്ല പാലപ്പെട്ടി സ്വാഗതവും കെ.എസ്​.സി വനിതാവിഭാഗം കണ്‍വീനര്‍ ഗീതാ ജയചന്ദ്രന്‍ നന്ദിയും പറഞ്ഞു.