മമ്മൂട്ടിയും മോഹൻലാലും ഗോൾഡൻ വിസ സ്വീകരിച്ചു

അബൂദബി: മലയാളത്തി​െൻറ അഭിമാന താരങ്ങളായ മമ്മൂട്ടിയും മോഹൻലാലും യു.എ.ഇയുടെ പത്തുവർഷ ഗോൾഡൻ വിസ സ്വീകരിച്ചു. അബൂദബി സാമ്പത്തിക വികസന വകുപ്പ്​ ആസ്​ഥാനത്ത്​ നടന്ന ചടങ്ങിൽ, വകുപ്പ്​ ചെയർമാൻ മുഹമ്മദ്​ അലി അൽ ഷൊറഫ അൽ ഹമ്മദി ഇരുവർക്കും വിസ കൈമാറി. ചടങ്ങിൽ വ്യവസായി എം.എ. യൂസുഫലിയും സന്നിഹിതനായിരുന്നു.

ഇരുവരും കലാ മേഖലക്ക് നൽകുന്ന സംഭാവന മഹത്തരമെന്ന് പറഞ്ഞ ഷൊറഫ അൽ ഹമ്മദി, കൂടുതൽ പ്രതിഭകളെ യു.എ.ഇയിലേക്ക്​ ആകർഷിക്കുന്നതിന്​ വേണ്ടിയാണ്​ ഗോൾഡൻ വിസ നൽകിവരുന്നതെന്ന്​ വ്യക്​തമാക്കി. വിസ അനുവദിച്ച യു.എ.ഇ സർക്കാറിന്​ നന്ദി അറിയിക്കുന്നതായി മമ്മൂട്ടിയും മോഹൻലാലും പറഞ്ഞു. തങ്ങളെ പ്രോൽസാഹിപ്പിച്ച്​ വളർത്തിയ മലയാളികൾ തന്ന സമ്മാനമാണിതെന്ന് മമ്മൂട്ടി പ്രതികരിച്ചു. വലിയ അം​ഗീകാരവും അഭിമാന നിമിഷവുമാണിതെന്നും സിനിമ വ്യവസായത്തെ സഹായിക്കാമെന്ന അധികൃതരുടെ വാഗ്​ദാനം പ്രതീക്ഷ നൽകുന്നതാണെന്നും മോഹൻലാൽ പറഞ്ഞു. ഗോൾഡൻ വിസക്കായി സഹായിച്ച യൂസുഫലിക്ക് ഇരുവരും നന്ദി അറിയിച്ചു.

ചടങ്ങിൽ അബൂദബദി സാമ്പത്തിക വികസന വകുപ്പ് അണ്ടർ സെക്രട്ടറി റാഷിദ്​ അബ്​ദുൽ കരീം അൽ ബലൂഷി, അബൂദബി റെസിഡൻസ്​ ഓഫീസ്​ അഡ്വൈസർ ഹാരിബ്​ മുബാറക്​ അൽ മഹീരി എന്നിവരും പ​ങ്കെടുത്തു.