അഫ്​ഗാനിൽനിന്ന്​ നിരവധിപേർ ദുബൈയിലെത്തി

യു.കെ, യൂറോപ്യൻ രാജ്യങ്ങൾ എന്നിവിടങ്ങളി​െല പൗരന്മാരും അഫ്​ഗാൻ സ്വദേശികളുമാണ്​ വിമാനത്തിലുണ്ടായിരുന്നത്​

ദുബൈ: താലിബാൻ അധികാരം പിടിച്ചതിനെ തുടർന്ന്​ അഫ്​ഗാനിസ്​താനിൽനിന്ന്​ നൂറുകണക്കിന്​ ആളുകളെ ദുബൈയിലെത്തിച്ചു. കാബൂളിൽനിന്ന്​ സൈനിക വിമാനത്തിലാണ്​ ഇവരെ എത്തിച്ചത്​. യു.കെ, യൂറോപ്യൻ രാജ്യങ്ങൾ എന്നിവിടങ്ങളി​െല പൗരന്മാരും അഫ്​ഗാൻ സ്വദേശികളുമാണ്​ വിമാനത്തിലുണ്ടായിരുന്നത്​. ദുബൈ വേൾഡ്​ സെൻററിലാണ്​ ഇവരെ എത്തിച്ചത്​. ഇതിനുശേഷം ​കൂടുതൽ ആളെ എത്തിക്കുന്നതിനായി സൈനിക വിമാനം വീണ്ടും അഫ്​ഗാനിലേക്ക്​ തിരിച്ചു. ബുധനാഴ്​ച അഫ്​ഗാൻ പ്രസിഡൻറ്​ അശ്​റഫ്​ ഗനിക്ക്​ യു.എ.ഇ അഭയം നൽകിയിരുന്നു. മാനുഷിക പരിഗണന നൽകിയാണ്​ ഗനിക്ക്​ അഭയം നൽകിയത്​. ഇതിനുപുറമെ ഫ്രഞ്ച്​ പൗരന്മാരെയും അബൂദബിയിൽ എത്തിച്ചിരുന്നു.

സൈനിക വിമാനമായ ഇസഡ്​, ഇസഡ്​ 172വിൽ വൈകീട്ട്​ 3.45നാണ്​ യാത്രക്കാരെ ദുബൈയിൽ എത്തിച്ചത്​.

വനിതകളും കുട്ടികളും വിമാനത്തിൽ ഉണ്ടായിരുന്നു. വൈകാതെ തന്നെ ഇവരെ മറ്റൊരു വിമാനത്തിൽ സ്വന്തം രാജ്യങ്ങളിലേക്ക്​ അയക്കും.

പലരും ലഗേജുകളും സാധനങ്ങളും ഉപേക്ഷിച്ചാണ്​ എത്തിയത്​. വിമാനത്താവളത്തിലെ ജീവനക്കാർ ഇവർക്ക്​ ഭക്ഷണവും മറ്റു​ സംവിധാനങ്ങളും നൽകി. അടിയന്തര സാഹചര്യമായതിനാൽ യാത്രക്കാരെ കോവിഡ്​ പരിശോധനക്ക്​ വിധേയമാക്കുകയോ വാക്​സിനേഷൻ രേഖകൾ ആവശ്യപ്പെടുകയോ ചെയ്​തില്ല.

യു.എ.ഇ വഴി ആയിരക്കണക്കിന്​ പൗരന്മാരെ യു.കെയിൽ എത്തിക്കുമെന്ന്​ യു.എ.ഇയിലെ യു.കെ എംബസി അറിയിച്ചു. ഏഴ്​ വിമാനങ്ങൾ യു.എ.ഇയിൽ നിന്ന്​ യു.കെയിലെത്തി. ഇന്നലെ മാത്രം കാബൂൾ വിമാനത്താവളത്തിൽനിന്ന്​ മൂന്നു​ വിമാനങ്ങൾ യു.എ.ഇയിലെത്തിയെന്നും എംബസി അറിയിച്ചു.