അരലക്ഷത്തോളം പേർക്ക്​ പ്രയോജനകരമാകുന്ന മേയ്​ത്ര-കെ.എം.സി.സി പ്രിവിലേജ്​ കാർഡ്​ നിലവിൽ വന്നു

ദുബൈ: ദക്ഷിണേന്ത്യയിലെ ശ്രദ്ധേയമായ ആതുരസേവന ശൃംഖലകളിലൊന്നായ മേയ്​ത്ര ഹോസ്പിറ്റൽ കെ.എം.സി.സി യു.എ.ഇ ചാപ്​റ്ററുമായി സഹകരിച്ച്​ മേയ്​ത്ര-കെ.എം.സി.സി എൻ.ആർ.ഐ പ്രി​വിലേജ്​ കാർഡ്​ പുറത്തിറക്കി. കെ.എം.സി.സി യു.എ.ഇ ചാപ്​റ്ററിലെ അംഗങ്ങൾക്കും അവരുടെ കുടുംബാംഗങ്ങൾക്കുമടക്കം അരലക്ഷത്തിലേ​റെ പേർക്ക്​ കോഴിക്കോട്​ മേയ്​ത്ര ഹോസ്പിറ്റലിലും അനുബന്ധ ശൃംഖലകളിലും ചികിത്സാ ആനുകൂല്യങ്ങൾ ലഭ്യമാക്കുന്നതാണ്​ പ്രിവിലേജ്​ കാർഡ്​. ദുബൈ ഇന്‍റർനാഷണൽ ഫിനാൻഷ്യൽ സെന്‍ററിൽ (ഡി.ഐ.എഫ്​.സി'യിൽ നടന്ന ചടങ്ങിൽ മേയ്​ത്ര ഹോസ്പിറ്റലിന്‍റെയും കെ.ഇ.എഫ്​ ഹോൾഡിങ്​സിന്‍റെയും ചെയർമാനായ ഫൈസൽ ഇ. കൊട്ടിക്കോളനും യു.എ.ഇ കെ.എം.സി.സി പ്രസിഡന്‍റ്​ പുത്തൂർ റഹ്​മാനും ചേർന്ന്​ ഇതുസംബന്ധിച്ച കരാറിൽ ഒപ്പുവെച്ചു.

തുടക്കത്തിൽ മലബാറിൽ നിന്നുള്ള പ്രവാസികൾക്കും അവരുടെ കുടുംബാംഗങ്ങൾക്കുമാണ്​​ ഈ പ്രി​വിലേജ്​ കാർഡിന്‍റെ പ്രയോജനം ലഭിക്കുകയെങ്കിലും ഘട്ടംഘട്ടമായി കേരളത്തിലെ എല്ലാ ജില്ലകളിലേക്കും മേയ്​ത്രയുടെ മികച്ച ഡോക്ടർമാരുടെയും ആഗോള നിലവാരമുള്ള ചികിത്സാ സൗകര്യങ്ങളുടെയും സേവനം ലഭ്യമാക്കുമെന്ന്​ ഫൈസൽ ഇ. കൊട്ടിക്കോളൻ വാർത്താസമ്മേളനത്തിൽ പറഞ്ഞു. 'മേയ്​ത്രയുടെ ഉന്നത നിലവാരമുള്ള ക്ലിനിക്കൽ സേവനങ്ങൾ എല്ലാവർക്കും ലഭ്യമാക്കുന്നതിനായുള്ള പദ്ധതി മലബാർ ജില്ലകളിലെ തെരഞ്ഞെടുത്ത ആശുപത്രികളുമായി സഹകരിച്ച്​ നടപ്പാക്കുന്നതിന്​ തുടക്കം കുറിച്ചിട്ടുണ്ട്​. ഇത്​ ഘട്ടംഘട്ടമായി തെക്കൻ കേരളത്തി​ലെ ജില്ലകളിലേക്കും വ്യാപിപ്പിക്കും' -അദ്ദേഹം പറഞ്ഞു.

കെ.എം.സി.സി അംഗങ്ങൾക്ക്​ ആധാർ കാർഡോ പാസ്​പോർട്ടോ തിരിച്ചറിയൽ രേഖയായി ഉപയോഗിച്ച്​ അവരുടെയും കുടുംബാംഗങ്ങളുടെയും അംഗത്വം വളരെ എളുപ്പത്തിൽ നിർവഹിക്കാൻ കഴിയും. രജിസ്​ട്രേഷൻ സൗജന്യമാണ്​. രജിസ്​ട്രേഷന്​ വേണ്ടിയുള്ള ഗൂഗ്​ൾ ഫോമിന്‍റെ ലോഞ്ചിങ്​ ഷംസുദ്ദീൻ ബിൻ മൊഹ്​യുദ്ദീനിന്​ കൈമാറി ഫൈസൽ ഇ. കൊട്ടിക്കോളൻ നിർവഹിച്ചു. യു.എ.ഇ കെ.എം.സി.സി സെക്രട്ടറി അൻവർ നഹ, കെ.എം.സി.സി ഭാരവാഹികളായ നിസാർ തളങ്കര, യഹ്​യ തളങ്കര എന്നിവരും പ​ങ്കെടുത്തു.

പ്രിവിലേജ്​ കാർഡംഗങ്ങൾക്ക്​ ഒ.പി. പരിശോധനയിൽ 50 ശതമാനവും ഒ.പി ഇൻവെസ്റ്റിഗേഷനുകളിൽ (പുറത്തുനിന്നുള്ളവ ഉൾപ്പെടില്ല) 25 ശതമാനവും ഹെൽത്ത്​ ചെക്കപ്പുകൾക്ക്​ 15 ശതമാനവും ഇംപ്ലാന്‍റുകൾ, സ്​റ്റെന്‍റുകൾ, കൺസ്യൂമബിളുകൾ, മരുന്ന്​, വിസിറ്റിങ്​ കൺസൾട്ടന്‍റുമാരുടെ സേവനം, പുറത്തുനിന്നിള്ള ഇൻവെസ്റ്റിഗേഷനുകൾ മുതലയാവ ഉൾപ്പെടെയുള്ള ഐ.പി സേവനങ്ങൾക്ക്​ 10 ശതമാനം ഡിസ്കൗണ്ടും മേയ്​ത്ര ഹോസ്പിറ്റലിൽ ലഭ്യമാകും.