സ്​ത്രീ നെയ്​ത്തുകാരുടെ കരവിരുതിൽ തിളങ്ങി മെക്​സികോ പവലിയൻ

ദുബൈ: എക്​സ്​പോ 2020 ദുബൈയിലെ പല രാജ്യങ്ങളുടെയും പവലിയനുകളുടെ ബാഹ്യരൂപഭംഗി ഏവരെയും അതിശയിപ്പിക്കുന്നതാണ്​. യു.എ.ഇ, ഇന്ത്യ, സൗദി അറേബ്യ തുടങ്ങി സന്ദർശകരെ ഇതിനകം വളരെയധികം ആകർഷിച്ച പവലിയനുകൾ അക്കൂട്ടത്തിലുണ്ട്​.

എന്നാൽ, രൂപഭംഗിയിൽ അത്ഭുതപ്പെടുത്തുന്നതിനൊപ്പം നിർമാതാക്കളുടെ പ്രത്യേകതകൊണ്ടും മെക്​സികോ പവലിയൻ വേറിട്ടുനിൽക്കുന്നു. മനോഹരമായ ഇതി​െൻറ ബാഹ്യരൂപം രാജ്യത്തെ 200 സ്​​ത്രീ നെയ്​ത്തുകാരാണ്​ പണിതുയർത്തിയത്​. രാജ്യത്തി​െൻറ സർവമേഖലകളിലും സ്​​ത്രീകൾക്കുള്ള പ്രധാന്യവും സ്​ഥാനവും വെളിപ്പെടുത്തുക എന്ന ഉദ്ദേശ്യത്തോടെയാണ്​ വനിതാ നെയ്​ത്തുകാരെ പദ്ധതി ഏൽപിച്ചത്​. പ്രതീക്ഷിക്കപ്പെട്ടതിനേക്കാൾ രൂപഭംഗിയിൽ സുന്ദരമായാണ്​ ഇതി​െൻറ നിർമാണം പൂർത്തിയായിരിക്കുന്നത്​. പലവിധ വർണങ്ങളിൽ പൂക്കളും ചിത്രങ്ങളും നിറഞ്ഞ രൂപം കാഴ്​ചക്കാരെ പവലിയനിലേക്ക്​ മാടിവിളിക്കുന്നതാണ്​.

മെക്​സികൻ സംസ്​കാരത്തി​െൻറയും പൈതൃകത്തി​െൻറയും യാഥാർഥ്യം ഉൾക്കൊള്ളുന്നതും സമൂഹത്തിലെ സ്ത്രീകളുടെ പ്രധാന പങ്ക് പ്രതിഫലിപ്പിക്കുകയും ചെയ്യുന്നതാണ്​ പവലിയൻ രൂപമെന്ന്​ പവലിയൻ അധികൃതർ പ്രസ്​താവനയിൽ പറഞ്ഞു. മെക്​സികോയിലെ ജാലിസ്കോ മേഖലയിൽനിന്നുള്ള 200 കരകൗശല വിദഗ്​ധരാണ് ഇത്​ നെയ്​തെടുത്തത്. ഈ കലാസൃഷ്​ടി പരമ്പരാഗത മെക്​സികൻ സ്ത്രീകളുടെ കഴിവി​െൻറ പ്രാധാന്യ വെളിപ്പെടുത്തുന്ന പ്രതീകമാണ് -പവലിയൻ കമീഷണർ ജനറൽ മാർത്ത ജറാമിലോ പറഞ്ഞു. ലാറ്റിനമേരിക്കൻ രാജ്യത്തി​െൻറ പവലിയൻ ഇടനാഴികളിൽ ആ നാടി​െൻറ വിഖ്യാതമായ പാരിസ്ഥിതിക വൈവിധ്യവും മനോഹരമായ പ്രകൃതിയും കാണിക്കുന്നതിനായി വലിയ ത്രീഡി സ്ക്രീനുകളിൽ അവതരണങ്ങളും ഒരുക്കിയിട്ടുണ്ട്​.

പവലിയൻ ഹാളിൽ 4000 വർഷങ്ങൾക്ക് മുമ്പുള്ള 'മായ' നാഗരികതയുടെ അടയാളങ്ങളും സന്ദർശകർക്കായി പ്രദർശിപ്പിക്കുന്നുണ്ട്​. മറ്റു പവലിയനുകളിൽനിന്ന് വ്യത്യസ്​തമായ സംവേദനാത്മക അനുഭവം ഇത് സന്ദർശകർക്ക് നൽകുമെന്ന്​ സ്​റ്റാഫ് കോഒാഡിനേറ്റർ ഫ്രാൻസിസ്കോ ഗാർഡുനോ പറഞ്ഞു. മെക്​സികൻ പാചകരീതികളും സുഗന്ധവ്യഞ്​ജനങ്ങളും ആസ്വദിക്കാനും സന്ദർശകർക്ക് ഇവിടെ സാധിക്കുന്നു.