ആന്ധ്ര മുഖ്യമന്ത്രിയും യു.എ.ഇ സാമ്പത്തിക മ​ന്ത്രിയും ചർച്ച നടത്തി

ദുബൈ: അത്യാധുനിക സാ​േങ്കതികവിദ്യ, അടിസ്​ഥാന സൗകര്യം, ലോജിസ്​റ്റിക്​സ്​ സേവനം, കൃഷി, വ്യോമയാന പദ്ധതികൾ തുടങ്ങിയവയിൽ കേന്ദ്രീകരിച്ചുള്ള സാമ്പത്തിക^വാണിജ്യ സഹകരരണം ശക്​തിപ്പെടുത്താനുള്ള മാർഗങ്ങളെ കുറിച്ച്​ ആ​​ന്ധ്രപ്രദേശ്​ മുഖ്യമന്ത്രി എൻ. ചന്ദ്രബാബു നായിഡുവും യു.എ.ഇ സാമ്പത്തിക മന്ത്രി സുൽത്താൻ ബിൻ സഇൗദ്​ ആൽ മൻസൂറിയും ചർച്ച നടത്തി. നിലവിലെ സംയുക്​ത വികസന പദ്ധതികളിൽനിന്ന്​ നേട്ടം ലഭിക്കുന്ന സാഹചര്യത്തിൽ പ്രധാനപ്പെട്ട മറ്റു നിരവധി മേഖലകളിൽ സംയുക്​ത നിക്ഷേപം നടത്തുന്നതും പങ്കാളിത്തം കൂടുതൽ വ്യാപിപ്പിക്കുന്നതും ചർച്ചയിൽ  വിഷയമായി. 

യു.എ.ഇയും ഇന്ത്യയും തമ്മിലുള്ള സാമ്പത്തിക^വ്യാപാര കരാറുകളുടെ ശക്​തി സുൽത്താൻ ബിൻ സഇൗദ്​ എടുത്തുപറഞ്ഞു. ഇരു രാജ്യങ്ങൾക്കുമിടയിലെ വ്യാപാരവും നിക്ഷേപവും വർധിപ്പിക്കുന്നതിൽ ഇൗ കരാറുകൾ വലിയ പങ്ക്​ വഹിക്കുന്നതായി അദ്ദേഹം അഭിപ്രായപ്പെട്ടു. 2016ൽ ഇരു രാജ്യങ്ങൾക്കുമിടയിലെ എണ്ണയിതര വ്യാപാരം 3590 കോടി യു.എസ്​ ഡോളറിൽ കൂടുതലായിരുന്നുവെന്നും സാമ്പത്തിക മന്ത്രി കൂട്ടിച്ചേർത്തു. 

ദുബൈയിൽ സാമ്പത്തിക മന്ത്രാലയത്തി​​െൻറ ആസ്​ഥാനത്ത്​ നടന്ന ചർച്ചയിൽ ആ​ന്ധ്രപ്രദേശ്​ ധനകാര്യ-ആസൂത്രണ മന്ത്രി യനമാല രാമ കൃഷുണ്ടു, യു.എ.ഇയി​െല ഇന്ത്യൻ സ്​ഥാനപതി നവ്​ദീപ്​ സിങ്​ സൂരി, യു.എ.ഇ വ്യവസായകാര്യ അസിസ്​റ്റൻറ്​ അണ്ടർ സെക്രട്ടറി അബ്​ദുല്ല അൽഫാൻ, അബൂദബി വികസന ഫണ്ട്​ ഡെപ്യൂട്ടി ഡയറക്​ടർ ജനറൽ ഖലീഫ ആൽ ഖുബൈസി, ഇന്ത്യയി​ലെ യു.എ.ഇ വാണിജ്യ അറ്റാഷെ അഹ്​മദ്​ ആൽ ഫലാഹി തുടങ്ങിയവരും പ​െങ്കടുത്തു.