എം.പി മുഹമ്മദ് കുട്ടി മുസ്​ല്യാർ അൽഐനിൽ നിര്യാതനായി

അൽഐൻ: തിരുന്നാവായ വൈരങ്കോട് വടക്കെ പല്ലാർ മഹല്ല് കമ്മിറ്റി പ്രസിഡൻറും കാട്ടിലങ്ങാടി പി.എം.എസ്.എ പൂക്കോയ തങ്ങൾ യതീംഖാന കമ്മിറ്റി ട്രഷററുമായ എം.പി മുഹമ്മദ് കുട്ടി മുസ്​ല്യാർ(72) അൽഐനിൽ നിര്യാതനായി. സന്ദർശക വിസയിൽ യു.എ.ഇയിൽ എത്തിയ അദ്ദേഹം കഴിഞ്ഞ ആറ് മാസമായി

ദുബൈയിൽ മിർദിഫിൽ മക്കളുടെ കൂടെയായിരുന്നു താമസം. വെള്ളിയാഴ്ച താമസ സ്ഥലത്ത് വെച്ച്​ ക്ഷീണം അനുഭവപ്പെട്ടതിനെ തുടർന്ന് സ്വകാര്യ ഹോസ്പിറ്റലിൽ ചികിത്സ തേടിയെങ്കിലും, നില വഷളായതിനെ തുടർന്ന് അൽഐനിലെ തവാം സർക്കാർ ആശുപത്രിയിലേക്ക് മാറ്റുകയായിരുന്നു. ശനിയാഴ്ച ഉച്ച ഒന്നരയോടെയാണ്​ മരിച്ചത്​. മൈമൂനയാണ് ഭാര്യ. ശുക്കൂർ, സുമയ്യ എന്നിവർ മക്കളാണ്(ഇരുവരും ദുബൈ). ജീമി ഹോസ്പിറ്റൽ മോർച്ചറിയിൽ സൂക്ഷിച്ചിരിക്കുന്ന മൃതദേഹം അബൂദാബി വിമാനത്താവളത്തിൽ നിന്ന്​ തിങ്കളാഴ്ച പുലർച്ചെ എയർ ഇന്ത്യ എക്സ്​പ്രസ്​ വിമാനത്തിൽ നാട്ടിലേക്ക്​ കൊണ്ടുപോകുമെന്നും രാവിലെ ഒമ്പതിന്​ തിരുന്നാവായ വൈരങ്കോട് വടക്കെ പല്ലാർ ജുമാ മസ്ജിദ് ഖബർസ്ഥാനിൽ ഖബറടക്കുമെന്നും ബന്ധുക്കൾ അറിയിച്ചു. കെ.എം.സി.സി, സുന്നീ സെന്‍റർ പ്രവർത്തകരാണ്​ നടപടികൾക്ക്​ നേതൃത്വം നൽകുന്നത്​.

മുഹമ്മദ് കുട്ടി മുസ്​ല്യാരുടെ വേർപാടിൽ അൽഐൻ സുന്നീ യൂത്ത് സെന്റർ, കെ.എം.സി.സി, കാട്ടിലങ്ങാടി പി.എം.എസ്.എ പൂക്കോയ തങ്ങൾ യതീംഖാന അബൂദാബി - ദുബൈ - അൽഐൻ കമ്മിറ്റികൾ, എസ്​.കെ.എസ്​.എസ്​.എഫ്​ അൽഐൻ, കാട്ടിലങ്ങാടി അബൂദാബി കെ.എം.സി.സി, എന്നീ സംഘടനകൾ അനുശോചനം രേഖപ്പെടുത്തി.