ദുബൈ എയർപോർട്ട്​ സ്​ട്രീറ്റിൽ പുതിയ മൂന്ന്​ പാലം തുറക്കുന്നു

ദുബൈ: ദുബൈ എയർപോർട്ട്​ സ്​ട്രീറ്റ്​ നവീകരണ പദ്ധതിയുടെ ഭാഗമായി മൂന്ന്​ പുതിയ പാലങ്ങൾ കൂടി തുറക്കുന്നു. ഏപ്രിൽ 27ന്​ പാലങ്ങൾ തുറക്കുമെന്ന്​ റോഡ്​-ഗതാഗത അതോറിറ്റി (ആർ.ടി.എ) ഡയറക്​ടർ ജനറൽ മതാർ ആൽ തായർ അറിയിച്ചു. സുഗമമായ ഗതാഗതത്തിന്​ പുതിയ പാലങ്ങൾ ഏറെ സഹായകരമാകും. എയർപോർട്ട്​ സ്​ട്രീറ്റിൽനിന്ന്​ മറാകിഷ്​ സ്​ട്രീറ്റിലേക്കുള്ള രണ്ടു വരി ടണൽ പാത ജൂലൈയിലും തുറക്കും. പുതുതായി തുറക്കുന്നവയിലെ രണ്ടുവരി പാത പാലം നാദ്​ അൽ ഹമർ സ്​ട്രീറ്റിൽനിന്ന്​ എയർപോർട്ട്​ സ്​ട്രീറ്റിലേക്കുള്ള യാത്ര സുഖകരമാക്കും. 

വാഹനങ്ങൾക്ക്​ ജങ്​ഷനിൽ കാത്തുനിൽക്കാതെ ദുബൈ അന്താരാഷ്​ട്ര വിമാനത്താവള ടെർമിനലിലെത്താവുന്ന റാമ്പ്​ ഉൾപ്പെടെയുള്ളതാണ്​ മറാകിഷ്​-എയർപോർട്ട്​ സ്​ട്രീറ്റ്​ നവീകരണം. ദുബൈ ഏവിയേഷൻ എൻജിനീയറിങ്​ പ്രോജക്​ട്​സ്​ സ്​ഥലത്തേക്കുള്ള (മുൻ എയർഷോ സ്​ഥലം) പാലവും ആർ.ടി.എ തുറക്കും. എയർപോർട്ട്​ സ്​ട്രീറ്റിലെ നാല്​ ജങ്​ഷനുകളിലെയും പാലങ്ങൾ തുറന്നക്കുന്നതോടെ സ്​ട്രീറ്റിൽ മണിക്കൂറിൽ 5000 വാഹനങ്ങൾ ഉൾക്കൊള്ളാൻ സാധിക്കും. ഇത്​ ഗതാഗത സുരക്ഷയും വർധിപ്പിക്കും. 

ദുബൈ അന്താരാഷ്​ട്ര വിമാനത്താവളത്തിലെത്തുന്ന യാത്രക്കാരുടെ എണ്ണത്തിലുള്ള വർധന പരിഗണിച്ചാണ്​ പദ്ധതി നടപ്പാക്കുന്നത്​. 2020ഒാടെ ദുബൈ വിമാനത്താളവത്തിൽ 9.2 കോടി ജനങ്ങൾ എത്തുമെന്ന്​ പ്രതീക്ഷിക്കുന്നതായും മതാർ ആൽ തായർ വ്യക്​തമാക്കി. റാശിദിയ ജങ്​ഷൻ, എയർപോർട്ട്​^നാദ്​ അൽ ഹമർ സ്​ട്രീറ്റ്​സ്​ ജങ്​ഷൻ, മറാകിഷ്​ ജങ്​ഷൻ, കാസാബ്ലാങ്ക സ്​ട്രീറ്റ്​ ജങ്​ഷൻ എന്നിവയുടെ നവീകരണം ഉൾപ്പെട്ടതാണ്​ എയർപോർട്ട്​ പരിഷ്​കരണ പദ്ധതി.