'പച്ച കത്താതെ' നാളെ മുതൽ പ്രവേശനമില്ല

ദുബൈ: ആഘോഷ വേളകളിലും പൊതുപരിപാടികളിലും പ​ങ്കെടുക്കണമെങ്കിൽ അൽ ഹൊസൻ ആപ്പിൽ പച്ചനിറം തെളിയണമെന്ന നിബന്ധന​ അബൂദബിയിൽ ചൊവ്വാഴ്​ച മുതൽ നിലവിൽ വരും.

വാക്​സിനെടുത്തവർക്കും കോവിഡ്​ പരിശോധന നടത്തി നെഗറ്റിവാകുന്നവർക്കുമാണ്​ അൽ ഹൊസൻ ആപ്പിൽ ഗ്രീൻപാസ്​ നൽകുന്നത്​.

ഷോപ്പിങ്​ മാൾ, വലിയ സൂപ്പർമാർക്കറ്റുകൾ, ഹോട്ടൽ, പൊതുപാർക്ക്​, ബീച്ച്​, സ്വകാര്യ ബീച്ച്​, സ്വിമ്മിങ്​ പൂൾ, തിയറ്റർ, മ്യൂസിയം, റസ്​റ്റാറൻറ്​, കഫെ, മറ്റ്​ വിനോദകേന്ദ്രങ്ങൾ എന്നിവിടങ്ങളിൽ സുരക്ഷിതമായി കയറാൻ ഗ്രീൻപാസ്​ ഉപയോഗിക്കണമെന്ന്​ ദുരന്ത നിവാരണ സമിതി നേരത്തേ അറിയിച്ചിരുന്നു. 16 വയസ്സിൽ കൂടുതൽ പ്രായമുള്ളവർക്കാണ്​​ ഇത്​ ബാധകമാകുക.

ലുലുവിലും ഗ്രീൻപാസുകാർക്ക്​ മാത്രം പ്രവേശനം

അബൂദബി: ചൊവ്വാഴ്​ച മുതൽ അബൂദബിയിലെ ലുലു ഹൈപ്പർ മാർക്കറ്റുകളിൽ ഗ്രീൻപാസുള്ളവർക്ക്​ മാത്രമേ പ്രവേശനം അനുവദിക്കൂവെന്ന്​ പ്രസ്​താവനയിൽ അറിയിച്ചു.

കോവിഡ്​ പ്രതിരോധ നിർദേശങ്ങൾ കർശനമായി പാലിക്കുന്ന സ്​ഥാപനമെന്ന നിലയിൽ എല്ലാവരുടെയും സുരക്ഷക്കാണ്​​ നടപടി.

ഷോപ്പിങ്ങിന്​ എത്തുന്നവർ പ്രവേശന കവാടത്തിൽ അൽ ഹൊസൻ ആപ്പിൽ ഗ്രീൻ പാസ്​ കാണിക്കണം. ഉപഭോക്താക്കൾക്ക്​ വേഗത്തിൽ നടപടിക്രമങ്ങൾ പൂർത്തിയാക്കി പ്രവേശിക്കാൻ​ സുരക്ഷാ ജീവനക്കാർക്ക്​ പ്ര​ത്യേക പരിശീലനം നൽകിയിട്ടുണ്ടെന്നും ലുലു മാർക്കറ്റിങ്​ ആൻഡ്​ കമ്യൂണിക്കേഷൻ ഡയറക്​ടർ വി. നന്ദകുമാർ വ്യക്തമാക്കി. ​

ലുലുവിലെത്തുന്നവർക്ക്​ സൗജന്യ പി.സി.ആർ ടെസ്​റ്റിന്​ സൗകര്യമൊരുക്കാൻ ആരോഗ്യ സ്​ഥാപനങ്ങളുമായി സഹകരിച്ച്​ പദ്ധതി തയാറാക്കുന്നുണ്ടെന്നും അദ്ദേഹം വ്യക്തമാക്കി.

ഗ്രീൻപാസ്​ ലഭിക്കുന്നവർ

1. വാക്​സിനേഷൻ പൂർത്തിയായവർ:

രണ്ട്​ ഡോസ്​ വാക്​സിനും പൂർത്തീകരിച്ച്​ 28 ദിവസം കഴിഞ്ഞ്​ പി.സി.ആർ ടെസ്​റ്റ്​ നടത്തി നെഗറ്റിവായാൽ ഗ്രീൻ പാസ്​ ലഭിക്കും. 30 ദിവസത്തേക്കാണ്​ പച്ചനിറം കാണുക

2. രണ്ടാമത്തെ​ ഡോസ്​ ലഭിച്ച്​

28 ദിവസം തികയാത്തവർ:

പി.സി.ആർ ടെസ്​റ്റ്​ നടത്തി നെഗറ്റിവായാൽ 14 ദിവസം ഗ്രീൻ പാസ്​

3. ആദ്യ ഡോസ്​ സ്വീകരിച്ചവർ:

രണ്ടാം ഡോസിനായി രജിസ്​റ്റർ ചെയ്​തവർക്ക്​ ഏഴ്​ ദിവസം ഗ്രീൻപാസ്​ (പി.സി.ആർ ടെസ്​റ്റിൽ നെഗറ്റിവാകണം)

4. ആദ്യ ഡോസ്​ സ്വീകരിച്ചവർ:

രണ്ടാമത്തെ ഡോസിനായി

42 ദിവസത്തിനുശേഷമാണ്​ രജിസ്​റ്റർ ചെയ്യുന്നതെങ്കിൽ മൂന്നു ദിവസം ​പച്ച തെളിയും (പി.സി.ആർ ടെസ്​റ്റിൽ നെഗറ്റിവാകണം)

5. വാക്​സിനേഷൻ ഇളവുള്ളവർ:

വാക്​സിനേഷൻ എടുക്കേണ്ടതില്ല എന്ന്​ സർട്ടിഫിക്കറ്റ്​ ലഭിക്കുന്നവർക്ക്​ ഏഴു​ ദിവസം ഗ്രീൻ പാസ്​ (പി.സി.ആർ ടെസ്​റ്റിൽ നെഗറ്റിവാകണം)

6. വാക്​സിൻ സ്വീകരിക്കാത്തവർ:

വാക്​സിൻ സ്വീകരിക്കാത്തവർ ഇളവ്​ സർട്ടിഫിക്കറ്റ്​ നേടിയില്ലെങ്കിൽ മൂന്നു​ ദിവസം പച്ചനിറം (പി.സി.ആർ ടെസ്​റ്റിൽ നെഗറ്റിവാകണം)