നൂറ അൽ മത്​റൂഷി ആദ്യമായി ​പൊതുവേദിയിൽ

ദുബൈ: യു.എ.ഇയുടെ ബഹിരാകാശ യാത്രികരുടെ രണ്ടാം ബാച്ചിലേക്ക്​ തിരഞ്ഞെടുക്കപ്പെട്ട മുഹമ്മദ്​ മുല്ലയും നൂറ അൽ മത്​റൂഷിയും ആദ്യമായി പൊതുവേദിയിലെത്തി. അഡ്രസ്​ മാളിൽ നടന്ന മുഹമ്മദ്​ ബിൻ റാശിദ്​ സ്​പേസ്​ സെൻററി​െൻറ വാർത്തസമ്മേളനത്തിലാണ്​ ഇരുവരും പ​ങ്കെടുത്തത്​. ഏപ്രിലിലാണ്​ ഇവരുവരെയും അടുത്ത ബഹിരാകാശയാത്രക്ക്​ തിരഞ്ഞെടുത്തതായി പ്രഖ്യാപിച്ചത്​.

28കാരിയായ നൂറ അൽ മത്​റൂഷി ബഹിരാകാശ യാത്രക്ക്​ ഒരുങ്ങുന്ന അറബ്​ ലോകത്തെ ആദ്യ വനിതയാണ്​. ബഹിരാകാശത്ത്​ ആദ്യമെത്തിയ ഹസ്സാഅ്​ അൽ മൻസൂരിയുടെയും സുൽത്താൻ അൽ നിയാദിയുടെയും സഹപ്രവർത്തകരായി ഇവരെ തിരഞ്ഞെടുത്തതി​െൻറ പ്രഖ്യാപനം നടത്തിയത്​ യു.എ.ഇ വൈസ് ​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമായിരുന്നു.

നാലായിരത്തിലേറെ പേർ അപേക്ഷിച്ചതിൽനിന്നാണ്​ പരീക്ഷകൾക്കും പരിശോധനകൾക്കും ശേഷം ഇവർ തിരഞ്ഞെടുക്കപ്പെട്ടത്​.ബഹിരാകാശയാത്ര തനിക്ക്​ കുട്ടിക്കാലത്തെ സ്വപ്​നത്തി​െൻറ സഫലീകരണമാണെന്ന്​ വാർത്തസമ്മേളനത്തിൽ നൂറ അൽ മത്​റൂഷി പറഞ്ഞു. കിൻറർഗാർട്ടനിലെ എ​െൻറ അധ്യാപകൻ കൂടാരം പണിയാൻ ആവശ്യപ്പെടുകയും അത്​ ചന്ദ്രനിലേക്ക് കൊണ്ടുപോകുന്ന ബഹിരാകാശ വാഹനമായി കരുതണമെന്നും പറഞ്ഞു.

ആദ്യമായി ബഹിരാകാശയാത്രക്ക്​ ആഗ്രഹിച്ചത് അന്നാണ്​. അതിനുശേഷം ബഹിരാകാശ യാത്രികയാകാൻ ഏറെ കൊതിച്ചു -അവർ പറഞ്ഞു. വർഷങ്ങളായി എണ്ണ-ഗ്യാസ്​ മേഖലയിൽ പ്രവർത്തിക്കു​േമ്പാഴും ആഗ്രഹം അങ്ങനെ നിന്നു. അത്​ സഫലമായിരിക്കയാണിപ്പോഴെന്നും മത്​റൂഷി പറഞ്ഞു.ഇരു ബഹിരാകാശ യാത്രികരും യു.എ.ഇയിൽ പരിശീലനം നേടുകയാണ്​. നീന്തൽ, സ്​കൂബാ ഡൈവിങ്​, അതിജീവന പരിശീലനങ്ങൾ, സ്​റ്റാമിന വർധിപ്പിക്കൽ, വിമാനം പറത്തൽ ക്ലാസുകൾ, റഷ്യൻ ഭാഷാപഠനം എന്നിവയാണുള്ളത്​​.

ഡിസംബറിൽ ഇരുവരും പരി​ശീലനം പൂർത്തിയാക്കാൻ യു.എസിലെ നാസയിലേക്ക്​ പോകും. യു.എസ്​-യു.എ.ഇ ധാരണപ്രകാരം നാസയുടെ ജോൺസൺ സ്​പേസ്​ സെൻററിലാണ്​ ഇവരുടെ പരിശീലനം. ബഹിരാകാശത്തെ നടത്തം, താമസം തുടങ്ങിയ പ്രയോഗികവും അല്ലാത്തതുമായ പരിശീലനവും ക്ലാസുകളും ഇവിടെ​ ലഭിക്കും.