നിതിൻ മടങ്ങി; കുഞ്ഞിനെ കാണാതെ

ദുബൈ: സ്വന്തം ദേശത്ത്​ പിറക്കാനുള്ള കുഞ്ഞി​​​െൻറ സ്വാതന്ത്ര്യം ഉറപ്പാക്കി, ആ കുഞ്ഞ്​ പിറക്കും മുൻപേ പിതാവ്​ യാത്രയായി. ദുബൈയിലെ സ്വകാര്യ കമ്പനി എൻജിനീയറും രക്​തദാന കൂട്ടായ്​മകളുടെ സംഘാടകനുമായിരുന്ന കോഴിക്കോട്​ പേരാ​മ്പ്ര സ്വദേശി നിതിൻ ചന്ദ്രൻ (29) ആണ്​ ഹൃദയാഘാതം മൂലം ദുബൈയിൽ മരിച്ചത്​.

​േ​കാവിഡ്​ ലോക്​ഡൗണിൽ വിമാനങ്ങൾ മുടങ്ങിയ ഘട്ടത്തിൽ തന്നെപ്പോലുള്ള ഗർഭിണികൾക്ക്​ നാട്ടിലേക്കുള്ള മടക്ക യാത്രക്ക്​ അവസരമൊരുക്കണമെന്നാവശ്യപ്പെട്ട്​ സുപ്രിംകോടതിയെ സമീപിച്ച ആതിരയാണ്​ ഭാര്യ. യൂത്ത്​ കോൺഗ്രസ്​ അനുഭാവിയായ നിതിൻ കൂടി മുൻകൈയെടുത്താണ്​ കേസിനുവേണ്ടി പരിശ്രമങ്ങൾ നടത്തിയത്​. വിഷയം ‘ഗൾഫ്​ മാധ്യമം’ ഉൾപ്പെടെ പത്രമാധ്യമങ്ങൾ പ്രാധാന്യപൂർവം ചർച്ചയാക്കിയതോടെ ദുബൈയിൽ നിന്നുള്ള ആദ്യ വിമാനത്തിൽ തന്നെ ആതിരയുടെ യാ​ത്ര സാധ്യമാവുകയായിരുന്നു.

ആതിര നാട്ടിലേക്ക്​ മടങ്ങിയ ശേഷവും ലോക്​ഡൗണിൽ പ്രയാസപ്പെടുന്നവർക്ക്​ ഭക്ഷണം എത്തിക്കുവാനും രക്​ത ലഭ്യത കുറവുള്ള ആശുപത്രികളിൽ ദാതാക്കളെ എത്തിക്കുവാനുമുൾപ്പെടെ റിലീഫ്​ പ്രവർത്തനങ്ങൾക്കായി ഒാടി നടക്കുകയായിരുന്നു ഇദ്ദേഹം. മൃതദേഹം നാട്ടിലെത്തിക്കുന്നതിന്​ നടപടി ക്രമങ്ങള്‍ പുരോഗമിക്കുകയാണെന്ന് സുഹൃത്തുക്കള്‍ അറിയിച്ചു.