തയാറെടുപ്പുകൾ പൂർത്തിയാക്കി അധികൃതർ
text_fieldsദുബൈ: യു.എ.ഇ പ്രഖ്യാപിച്ച വിസ നിയമ ലംഘകർക്കുള്ള ഇളവ് ഞായറാഴ്ച മുതൽ ആരംഭിക്കാനിരിക്കെ തയാറെടുപ്പുകൾ പൂർത്തിയാക്കി അധികൃതർ. അപേക്ഷകൾ സ്വീകരിക്കാനും നടപടികൾക്കും എല്ലാ സന്നാഹങ്ങളും ഒരുക്കിക്കഴിഞ്ഞതായി ദുബൈയിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജി.ഡി.ആർ.എഫ്.എ) വൃത്തങ്ങൾ നേരത്തേ വെളിപ്പെടുത്തിയിരുന്നു. ഇളവ് പ്രഖ്യാപിച്ച ഉടൻതന്നെ നടപടിക്രമങ്ങൾ ചർച്ച ചെയ്യുന്നതിനായി വിവിധ എമിറേറ്റുകളിൽ ഉന്നത ഉദ്യോഗസ്ഥരുടെ ഒരു പ്രത്യേക യോഗം ചേർന്നിരുന്നു.
ഇളവ് ഫലപ്രദമായി നടപ്പാക്കുന്നതിനായി ദുബൈയിൽ ജി.ഡി.ആർ.എഫ്.എ ഒരു പ്രത്യേക സംഘത്തെ രൂപവത്കരിക്കുകയും ചെയ്തിരുന്നു. കസ്റ്റമർ ഹാപ്പിനസ് ആൻഡ് ഡിജിറ്റൽ സർവിസസ്, പ്രോ ആക്ടിവ് മീഡിയ കമ്യൂണിക്കേഷൻ, സർവിസസ് ഡെവലപ്മെന്റ് ടീം എന്നിവയുൾപ്പെടെ പ്രത്യേക വർക്കിങ് ടീമുകളെയാണ് രൂപവത്കരിച്ചത്. ഇതുവഴി വിസ ലംഘനക്കാർക്ക് എളുപ്പത്തിൽ അവരുടെ നടപടിക്രമങ്ങൾ പൂർത്തിയാക്കാൻ സാധിക്കും.ദുബൈ എമിറേറ്റിൽ 86 ആമിർ സെന്ററുകളിൽ അപേക്ഷകൾ സ്വീകരിക്കും.
അതോടൊപ്പം ജി.ഡി.ആർ.എഫ്.എയുടെ അൽ അവീറിലെ സെന്ററിലും സൗകര്യമൊരുക്കിയിട്ടുണ്ട്. ആമിർ സെന്ററുകളിൽ രാജ്യത്ത് തുടരാൻ ആഗ്രഹിക്കുന്നവർക്കുള്ള ‘സ്റ്റാറ്റസ് ചേഞ്ച്’ അടക്കമുള്ള എല്ലാ സേവനങ്ങളും എമിറേറ്റ്സ് ഐഡി ഉള്ളവർക്ക് നാട്ടിലേക്ക് മടങ്ങാനുള്ള പെർമിറ്റുമായി ബന്ധപ്പെട്ട സേവനവും ലഭിക്കും. അൽ അവീറിലെ ജി.ഡി.ആർ.എഫ്.എ കേന്ദ്രത്തിലാണ് ഫിങ്കർപ്രിന്റ് പതിപ്പിക്കേണ്ട സേവനങ്ങളും രാജ്യം വിടാൻ ആഗ്രഹിക്കുന്നവർക്കുള്ള പെർമിറ്റുമായി ബന്ധപ്പെട്ട സേവനവും ലഭിക്കുക.
വിസ ഇളവുമായി ബന്ധപ്പെട്ട വിവരങ്ങൾ അറിയാൻ ഔദ്യോഗിക സംവിധാനങ്ങളെ ഉപയോഗിക്കണമെന്നും അധികൃതർ നിർദേശിച്ചിട്ടുണ്ട്. 24 മണിക്കൂറും പ്രവർത്തിക്കുന്ന 8005111 എന്ന കാൾ സെന്റർ ജി.ഡി.ആർ.എഫ്.എ ഇതിനായി ഒരുക്കിയിട്ടുണ്ട്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.