ഒളിമ്പിക്​സ്​ താരങ്ങളും എത്തുന്നു : രാജ്യാന്തര കായിക പരിശീലന കേന്ദ്രമായി ദുബൈ

ദുബൈ: കോവിഡ്​ കാലത്ത്​ സുരക്ഷിത പരിശീലന ഇടങ്ങൾ​ തേടി അന്താരാഷ്​ട്ര ടീമുകൾ യു.എ.ഇയിലേക്ക്​.ഐ.പി.എൽ നടത്തി വിജയിച്ചതി​െൻറ പശ്ചാത്തലത്തിലാണ്​ ഒളിമ്പിക്​സ്​ ടീമുകളും താരങ്ങളുമുൾപ്പെടെ യു.എ.ഇയെ പരിശീലനത്തിനായി തിരഞ്ഞെടുത്തത്​. ആഗോള സ്​പോർട്​സ്​ ഹബായി മാറുന്ന ദുബൈയാണ്​ ഇവരുടെ പ്രധാന ലക്ഷ്യം. സ്​റ്റേഡിയത്തിലേക്ക്​ കാണികളെ അനുവദിക്കാൻ തീരുമാനിച്ചതോടെ രാജ്യത്തെ കായിക മേഖല വൈകാതെ പഴയ പ്രഭാവം തിരിച്ചുപിടിക്കുമെന്നാണ്​ കരുതുന്നത്​.

2022 ഫുട്​ബാൾ ലോകകപ്പിൽ പ​ങ്കെടുക്കുന്ന ഏഴു​ ടീമുകൾ അടുത്ത ദിവസങ്ങളിൽ യു.എ.ഇയിൽ എത്തി പരിശീലനം തുടങ്ങും. 2023 ഏഷ്യൻ കപ്പിനുള്ള ടീമും എത്തും. ഇതിന്​ പുറമെ ഇംഗ്ലണ്ട്​, ജർമനി, ചൈന ഫുട്​ബാൾ ടീമുകളുടെ ശൈത്യകാല ക്യാമ്പുകളും ദുബൈയിലായിരിക്കും. ഇ​സ്രായേലി-അമേരിക്കൻ സൈക്ലിങ്​ സംഘവും പരിശീലനത്തിന്​ യു.എ.ഇയിൽ എത്തുന്നുണ്ട്​. രാജ്യാന്തര ടീമുകൾക്ക്​ പുറമെ ക്ലബുകളും പരിശീലനത്തിന്​ ദുബൈയെ സമീപിച്ചു.കോവിഡ്​ മൂലം അടുത്ത വർഷത്തേക്ക്​ മാറ്റിവെച്ച ടോക്യോ ഒളിമ്പിക്​സിൽ പ​ങ്കെടുക്കേണ്ട ടീമുകളിൽ പലതും പരിശീലനത്തിന്​ ദുബൈയാണ്​ തിരഞ്ഞെടുത്തത്​. ഇതുമായി ബന്ധപ്പെട്ട്​ വിവിധ സ്​പോർട്​സ്​ ഫെഡറേഷനുകളും ദേശീയ ഒളിമ്പിക്​സ്​ കമ്മിറ്റികളും ദുബൈ സ്​പോർട്​സ്​ കൗൺസിലുമായി ബന്ധപ്പെട്ടിട്ടുണ്ട്​.

എല്ലാ പിന്തുണയും സ്​പോർട്​സ്​ കൗൺസിൽ ഉറപ്പുനൽകി. ഇവരുടെ വിസ നടപടികൾ എളുപ്പമാ​ക്കുമെന്നും കായിക സൗകര്യങ്ങളൊരുക്കുമെന്നും സ്​പോർട്​സ്​ കൗൺസിൽ അറിയിച്ചിട്ടുണ്ട്​. യൂറോപ്യൻ രാജ്യങ്ങളിലെ താരങ്ങളാണ്​ പ്രധാനമായും ദുബൈയെ ആശ്രയിക്കാനൊരുങ്ങുന്നത്​. യാത്രസൗകര്യവും സുരക്ഷയുമാണ്​ ഇവരെ കൂടുതൽ ആകർഷിക്കുന്നത്​. രാജ്യം തണുപ്പുകാലത്തിലേക്ക്​ പ്രവേശിക്കുന്നതും ചൂട്​ കുറഞ്ഞതും താരങ്ങൾക്ക്​ ഗുണം ചെയ്യും. ഹംദാൻ സ്​പോർട്​സ്​ കോംപ്ലക്​സ്​, നാദ അൽഷെബ സ്​പോർട്​സ്​ കോംപ്ലക്​സ്​ എന്നിവക്ക്​ പുറമെ മറ്റ്​ സ്​റ്റേഡിയങ്ങളും ക്ലബുകളും കായിക ചികിത്സ കേന്ദ്രങ്ങളും സൈക്ലിങ്​ ട്രാക്കുകളും ഇവർക്ക്​ വിട്ടുനൽകും.

സ്​റ്റേഡിയത്തിൽ 30 ശതമാനം കാണികളെ അനുവദിക്കാൻ കഴിഞ്ഞദിവസം ദുബൈ സ്​പോർട്​സ്​ കൗൺസിൽ തീരുമാനിച്ചിരുന്നു. കഴിഞ്ഞ ആഴ്​ചകളിൽ നടന്ന ചില പരിപാടികൾക്ക്​ കാണികളെ നിശ്ചിത അളവിൽ സ്​റ്റേഡിയത്തിൽ ​പ്രവേശിപ്പിച്ചിരുന്നു. പ്രാദേശിക ടീമുകളുടെ ക്രിക്കറ്റ്​, ബാസ്​കറ്റ്​ബാൾ, ഗോൾഫ്​, പോളോ തുടങ്ങിയ മത്സരങ്ങളിലാണ്​ കാണികളെ പ്രവേശിപ്പിച്ചത്​.