യാത്രക്കാർ വർധിച്ചു; എക്സ്​പോയിലേക്ക്​ കൂടുതൽ ബസ്​ സർവിസ്​

ദുബൈ: എക്​സ്​പോ അവസാനിക്കാൻ ദിവസങ്ങൾ മാത്രം ബാക്കിനിൽക്കെ, പ്രത്യേക ബസുകളിൽ യാത്ര ചെയ്യുന്ന സന്ദർശകരുടെ എണ്ണത്തിൽ വൻ വർധന. വിവിധ എമിറേറ്റുകളിൽ നിന്നും നഗരത്തിന്‍റെ വിവിധ ഭാഗങ്ങളിൽ നിന്നുമായി പുറപ്പെടുന്ന ബസുകൾ ദിനംപ്രതി 37,500 യാത്രക്കാർ ഉപയോഗപ്പെടുത്തുന്നതായി റോഡ്​ ഗതാഗത അതോറിറ്റി (ആർ.ടി.എ) അറിയിച്ചു.

ഈ സാഹചര്യത്തിൽ സർവിസുകളുടെ എണ്ണം വർധിപ്പിക്കാൻ അധികൃതർ തീരുമാനിച്ചു. തിരക്ക്​ വർധിക്കാൻ ഇനിയും സാധ്യതയുള്ളതിനാൽ എക്​സ്​പോയിലേക്ക് ഏറ്റവും മികച്ച യാത്ര സൗകര്യമൊരുക്കുന്നതിനാണ്​ സർവിസുകൾ വർധിപ്പിച്ചതെന്ന്​ ആർ.ടി.എ ബസ്​ സർവിസ്​ ഡയറക്ടർ മുഹമ്മദ്​ അൽ അലി പറഞ്ഞു.

നേരത്തെ അനുവദിച്ച 157 ബസുകൾക്ക്​ പുറമെ, ഈ ആഴ്ച 31പുതിയ ബസുകൾ കൂടി സർവിസ്​ നടത്തുമെന്നാണ്​ അതോറിറ്റി അറിയിച്ചത്​. ഭൂരിഭാഗം ബസുകളും മുഴുവൻ സീറ്റിലും യാത്രക്കാരുമായാണ്​ നിലവിൽ എക്സ്​പോയിലേക്ക്​ പോകുന്നത്​. നേരത്തെ വൈകുന്നേരങ്ങളിൽ മാത്രമായിരുന്ന തിരക്ക്.​ ഇപ്പോൾ രാവിലെ മുതൽ തുടങ്ങുന്നുണ്ട്​. ബസുകൾക്ക്​ പുറമെ മെട്രോയിലും നല്ല തിരക്ക്​ അനുഭവപ്പെടുന്നുണ്ട്​. ടാക്സികളിലും സ്വന്തം വാഹനങ്ങളിലും എത്തുന്നവരും ഏറെയുണ്ട്​. എക്സ്​പോ നഗരിയിലേക്ക്​ എത്തുന്ന റോഡുകളിൽ തിരക്ക്​ ദൃശ്യമാണ്​.