തൊഴിലാളികളെ അയക്കൽ: ഫിലിപ്പീൻസ്​-കുവൈത്ത്​ കരാറി​െൻറ കരട് തയാറാക്കിയതായി റിപ്പോർട്ട്

കുവൈത്ത് സിറ്റി: കുവൈത്തിലേക്ക് തൊഴിലാളികളെ അയക്കുന്നതുമായി ബന്ധപ്പെട്ട പുതിയ കരാറി​​െൻറ കരട് ഫിലിപ്പീൻസ്​ തയാറാക്കിയതായി റിപ്പോർട്ട്. ഫിലിപ്പീൻസ്​ തൊഴിൽ മന്ത്രാലയം അണ്ടർ സെക്രട്ടറി കാർലോ അരീലാനോയെ ഉദ്ധരിച്ച് ഫിലിപ്പീൻസ്​ വാർത്താ മാധ്യമങ്ങളാണ് ഇക്കാര്യം റിപ്പോർട്ട് ചെയ്തത്. പുതുക്കിയ തൊഴിൽ കരാർ സംബന്ധിച്ച് ഫിലിപ്പീൻസ്​-കുവൈത്ത് ഔദ്യോഗിക ചർച്ചകൾ അടുത്ത ആഴ്ച നടക്കാനിരിക്കെയാണ് കരട് വ്യവസ്​ഥകൾ തയാറായത്.

 തൊഴിലാളികളുടെ പാസ്​പോർട്ടുകൾ തൊഴിലുടമകൾ പിടിച്ചുവെക്കുന്നതിനെയും അനുമതി കൂടാതെ തൊഴിലാളികളുടെ സ്​പോൺസർഷിപ്​ മാറ്റുന്നതിനെയും പുതിയ കരാർ വിലക്കുന്നുണ്ട്. തൊഴിലാളികൾക്ക് അവരുടെ മൊബൈൽ ഫോണുകൾ കൈവശം വെക്കാൻ അനുമതി നൽകണമെന്നും വ്യവസ്​ഥയിലുണ്ട്.  പുതിയ വ്യവസ്​ഥ പ്രകാരം തൊഴിൽ പീഡനമുൾപ്പെടെ അവകാശ നിഷേധത്തിന് കേസുള്ള സ്​പോൺസർമാർക്ക് തൊഴിലാളികളെ വീണ്ടും ലഭ്യമാക്കാൻ പാടില്ല. ഇക്കാര്യങ്ങൾ അംഗീകരിക്കാൻ കുവൈത്ത് തയാറായിട്ടില്ലെങ്കിൽ ഇപ്പോൾ പ്രഖ്യാപിക്കപ്പെട്ട റിക്രൂട്ടിങ്​ വിലക്ക് നീക്കാൻ സാധ്യമല്ലെന്ന് ഫിലിപ്പീൻസ്​ അണ്ടർ സെക്രട്ടറി പറഞ്ഞു. 

സ്​പോൺസറുടെ പീഡനത്തിനിരയായി ജോലിക്കാരി മരിക്കാനിടയായ സാഹചര്യത്തിലാണ് ഫിലിപ്പീൻസ്​ കുവൈത്തിലേക്ക് തൊഴിലാളികളെ അയക്കേണ്ടതില്ലെന്ന തീരുമാനമെടുത്തത്. വിലക്ക് നീക്കി റിക്രൂട്ട്മ​​െൻറ് പുനഃസ്​ഥാപിക്കുന്നതിനുള്ള ചർച്ചകൾക്കായി കുവൈത്ത്​ സംഘം അടുത്ത ആഴ്ച മനിലയിലേക്ക് പോകുന്നുണ്ട്. കുവൈത്ത് സംഘം എത്തുന്നതി​​െൻറ മുന്നോടിയായാണ് ഫിലിപ്പീൻസ്​ തൊഴിൽ ഉടമ്പടിയുടെ കരട് തായാറാക്കിയത്.