പ്രവാസം, സിനിമ: ഉള്ളുതുറന്ന്​ ബ്ലെസിയും സലീം അഹമ്മദും

ഷാർജ: പ്രവാസികളുടെ ഉള്ളുലച്ച കഥാപാത്രങ്ങളെ വെള്ളിത്തിരയിലെത്തിച്ച രണ്ട്​ പ്രമുഖ സംവിധായകർ ഒരുവേദിയിൽ ഒരുമിച്ചപ്പോൾ സിനിമ പ്രേമികൾക്ക്​ കൗതുകമായി. പത്തേമാരിയുടെ സംവിധായകൻ സലീം അഹമ്മദും ആടുജീവിതം സംവിധായകൻ ബ്ലെസിയുമാണ്​ കമോൺ കേരള വേദിയിൽ ഉള്ളുതുറന്നത്​. ഹിറ്റ്​ എഫ്​.എം ആർ.ജെ ജോൺ ആയിരുന്നു അവതാരകൻ. പ്രേക്ഷകരുടെ ഇഷ്ടം അറിഞ്ഞുള്ള ചോദ്യങ്ങളുമായി ജോണും വേദിയിൽ നിറഞ്ഞുനിന്നു.

പ്രൗഢികൾക്കപ്പുത്ത്​ പ്രവാസത്തിന്‍റെ നോവും വേവും കാണിച്ചുതന്ന കഥാ​പാത്രങ്ങളായിരുന്നു അവരുടെ നജീബും പള്ളിക്കൽ നാരായണനും. പ്രവാസം, സിനിമ തുടങ്ങിയവയെ കുറിച്ച്​ അവർ പ്രേക്ഷകരുമായി സംവദിച്ചു. ഗൾഫ്​ മാധ്യമം ‘കമോൺ കേരള’യിൽ ‘ലൈറ്റ്​ കാമറ ആക്​ഷൻ’ സെഗ്​മെന്‍റാണ്​ സിനിമ പ്രേമികൾക്ക്​ ഹൃദ്യമായ അനുഭവമായത്​.

ബെന്യാമിന്‍റെ നോവലിലെ നജീബും ത​െൻറ സിനിമയിലെ നജീബും വ്യത്യാസമുണ്ടെന്ന്​ ചലച്ചിത്ര സംവിധായകൻ ബ്ലെസി പറഞ്ഞു. ഒരാൾ അനുഭവിച്ചുതീർത്ത യഥാർഥ ജീവിതവും ഭാവന കൂടി ഉൾപ്പെടുത്തിയും പലതും ഉൾപ്പെടുത്താതെയും എഴുതിയ നോവലും അതിൽനിന്ന്​ ഉരുത്തിരിഞ്ഞ തിരക്കഥയും വേറെ വേറെയാണ്​. താൻ എങ്ങോട്ടും പോകുന്നില്ലെന്നും അടിമജീവിതം താൻ സ്വയം തെരഞ്ഞെടുത്തതാണെന്നും നജീബ്​ പുസ്​തകത്തിൽ പറഞ്ഞതിനോട്​ തനിക്ക്​ വിയോജിപ്പുണ്ടായിരുന്നു. യഥാർഥ നജീബുമായി സംസാരിച്ചപ്പോൾ സ്വംശീകരിച്ച കാര്യങ്ങൾ കൂടി സിനിമയിൽ ഉൾപ്പെടുത്തിയിട്ടുണ്ട്​. പലഘട്ടത്തിൽ പല മാനസികാവസ്ഥയിലൂടെ നജീബ്​ കടന്നുപോയിട്ടുണ്ടാകും. എന്നാൽ, നാട്ടിൽ തിരിച്ചെത്താൻ അയാൾ അതിയായി മോഹിച്ചിരുന്നുവെന്നാണ്​ തനിക്ക്​ മനസ്സിലായതെന്ന്​ ബ്ലെസി പറഞ്ഞു. ​

താൻ പ്രവാസിയല്ലെന്നും പല മുൻകാല പ്രവാസികളോട്​ സംസാരിച്ചാണ്​ ഒന്നര വർഷമെടുത്ത്​ പത്തേമാരിയുടെ തിരക്കഥ പൂർത്തിയാക്കിയതെന്നും സംവിധായകൻ സലീം അഹമ്മദ്​ പറഞ്ഞു. പത്തുരൂപ കിട്ടിയാൽ മൂന്ന്​ രൂപ പിടിച്ചുവെച്ച്​ ബാക്കി ഏഴാണ്​ അയക്കുന്നതെന്നാണ്​ നാട്ടിലുള്ളവർ കരുതുന്നതെന്നും എന്നാൽ, ഏഴ്​ കിട്ടിയാൽ മൂന്ന്​ കൂടി കടം വാങ്ങിയാണ്​ പത്ത്​ നാട്ടിലയക്കുന്നതെന്നും പള്ളിക്കൽ നാരായണൻ പറയുന്നത്​ ഇത്തരത്തിൽ മുൻ പ്രവാസികൾ അനുഭവത്തിൽനിന്ന്​ പറഞ്ഞതാണ്​. അങ്ങനെ സംസാരിച്ചു മനസ്സിലാക്കിയ എല്ലാ കാര്യങ്ങളും സിനിമയിൽ ഉൾപ്പെടുത്താൻ കഴിഞ്ഞിട്ടില്ലെന്നും സലീം അഹമ്മദ്​ കൂട്ടിച്ചേർത്തു.

കമോൺ കേരള വേദിയിൽ ഗൾഫ്​ മാധ്യമം രജത ജൂബിലി ആഘോഷത്തിന്‍റെ ഭാഗമായി ചീഫ്​ എഡിറ്റർ വി.കെ. ഹംസ അബ്ബാസ്​ കേക്ക്​ മുറിക്കുന്നു. ഗൾഫ്​ മാധ്യമം സി.ഒ.ഒ സക്കരിയ മുഹമ്മദ്, മിഡിൽ ഈസ്റ്റ്​ എഡിറ്റോറിയൽ ഹെഡ്​ ടി.എം. സ്വാലിഹ്, മാധ്യമം ബിസിനസ്​ സൊല്യൂഷൻസ്​ ഗ്ലോബൽ ഹെഡ്​ കെ. മുഹമ്മദ്​ റഫീഖ്, ഗൾഫ്​ മാധ്യമം മിഡിലീസ്റ്റ്​ ഓപറേഷൻസ്​ ഡയറക്ടർ സലീം അമ്പലൻ, മാധ്യമം സി.ഇ.ഒ പി.എം. സ്വാലിഹ്, മോറിക്കാപ് റിസോർട്ട്​ ചെയർമാൻ നിഷിൻ തസ്​ലീം സി.എം, സി.എം.വി ഗോൾഡ്​ പ്രതിനിധി എം. ഷർമിന, ഹൈലൈറ്റ്​ ഗ്രൂപ്​ ചെയർമാൻ പി. സുലൈമാൻ, മാധ്യമം ചീഫ്​ എഡിറ്റർ ഒ. അബ്​ദുറഹ്​മാൻ, ഐഡിയൽ പബ്ലിക്കേഷൻ ട്രസ്റ്റ്​ സെക്രട്ടറി ടി.കെ. ഫാറൂഖ്​, ഹോട്ട്​പാക്ക്​ ​മാനേജിങ്​ ഡയറക്ടറും ചെയർമാനുമായ പി.ബി. അബ്​ദുൽ ജബ്ബാർ, മാധ്യമം സി.ഡി.ഒ ഇംത്യാസ്, ഹൈലൈറ്റ്​ ഗ്രൂപ്​ സി.ഇ.ഒ അജിൽ മുഹമ്മദ് എന്നിവർ സമീപം