മറക്കരുത്​ മരിച്ചു കിടക്കുന്നത്​ നമ്മളാണ്

അനാദിക്കടയിലെ കടം, അടച്ചുറപ്പുള്ള വീട്​, മക്കളുടെ പഠനം, കല്യാണം... പിന്നെ നടന്നു കൊതിതീരാമണ്ണിലേക്ക്​ സമാധാനത്തോടെ മടക്കം -ഇതുപോലുള്ള ചെറിയ വലിയ മോഹങ്ങളും ചേർത്തുപിടിച്ചാണ്​ ഒാരോ പ്രവാസിയും നാടും വീടും വിട്ട്​, കാതങ്ങൾ കടന്ന്​ കടൽതാണ്ടി മരുഭൂമിയിലേക്ക്​ ചേക്കേറുന്നത്​. ഇടുങ്ങിയ മുറികളിലെ അട്ടിക്കട്ടിലിൽ തളർന്നുറങ്ങു​േമ്പാഴും ഉറക്കംവരാതെ കിടക്കു​േമ്പാഴും അവർ കാണുന്ന കിനാക്കളിലെല്ലാം നാടു മാത്രമാണ്​. മാതാപിതാക്കളുടെ മരുന്നിനും കുടുംബാംഗങ്ങളുടെ ഭക്ഷണത്തിനുമുള്ള വകമാത്രമ​ല്ല അവർ തേടിയിരുന്നത്​.

പള്ളികൾക്കും പള്ളിക്കൂടങ്ങൾക്കും വായനശാലകൾക്കും പാലിയേറ്റിവ്​ കേ​ന്ദ്രങ്ങൾക്കും കെട്ടിടങ്ങൾ പടുത്തത്​ പ്രവാസിയുടെ വിയർപ്പും രക്തവും ചേർത്ത ചാന്തിൻകൂട്ടുകൊണ്ടാണ്. പാർട്ടി സമ്മേളനങ്ങൾക്കും ഉത്സവങ്ങൾക്കും നാടിനാഘോഷങ്ങൾക്കും ആയിരം കാതമകലെയിരുന്ന്​ അവർ കൊടിതോരണങ്ങളുയർത്തി. നാടിനെ അത്രമേൽ പ്രണയിക്കയാൽ പ്രളയകാലങ്ങളിൽ വീട്ടുചെലവിന്​ പണമയക്കാതെ പോലുമവർ ദുരിതാശ്വാസ നിധിയിലേക്ക്​ സംഭാവനയയച്ചു. ഇപ്പോൾ ആഗോള ആരോഗ്യ-സാമ്പത്തിക അടിയന്തരാവസ്​ഥയുടെ പശ്ചാത്തലത്തിൽ ജോലി നഷ്​ടപ്പെട്ടും ആരോഗ്യം ക്ഷയിച്ചും നാട്ടിലേക്ക്​ മടങ്ങാൻ ആഗ്രഹിക്കുന്ന അവരെ അന്യരായി കണ്ട്​ അകറ്റിനിർത്തു​േമ്പാൾ റദ്ദുചെയ്യപ്പെടുന്നത്​ നമ്മൾ ഉദ്​ഘോഷിക്കുന്ന നവോത്ഥാനമൂല്യങ്ങൾ തന്നെയാണ്​.

ലോകത്തി​​​​​​െൻറ വിവിധ കോണുകളിൽനിന്നുള്ള മനുഷ്യർ താമസിക്കുകയും സഞ്ചരിക്കുകയും ചെയ്യുന്ന പല ഗൾഫ്​രാജ്യങ്ങളിലും സ്വദേശി ജനസംഖ്യയേക്കാളേറെയുണ്ട്​ ഇന്ത്യക്കാർ. കോവിഡ്​ വ്യാപനത്തെ തുടർന്ന്​ രോഗബാധിതരായവരിലും ഇന്ത്യക്കാരുടെ എണ്ണം കൂടുതലായിരുന്നു. സ്വന്തം ജനതയെന്ന മട്ടിൽ ചേർത്തുപിടിച്ചാണ്​ ഇൗ നാടുകളിലെ ഭരണകൂടങ്ങൾ ചികിത്സാ സൗകര്യങ്ങളൊരുക്കിയത്​. അസുഖ വ്യാപനം അധികരിക്കുന്നതിനുമുമ്പ്​​ നാടണയാൻ പലരും ആഗ്രഹിച്ചിരുന്നെങ്കിലും കോവിഡ്​ പ്രതിസന്ധിയുടെ തുടക്കത്തിൽ ഇന്ത്യയിൽ മുന്നറിയിപ്പില്ലാതെ പ്രഖ്യാപിക്കപ്പെട്ട അശാസ്​ത്രീയ ലോക്​ഡൗണും ആകാശവിലക്കും യാത്രമുടക്കി. ഏറെ വൈകി പരിമിതമായ എണ്ണം വിമാനങ്ങൾ അനുവദിക്കപ്പെടു​േമ്പാഴേക്ക്​ നാടണയാൻ കാത്തിരുന്നവരിൽ ചിലർ പാസ്​പോർട്ടും വിസയും​ വേണ്ടാത്ത ലോകം പുൽകിയിരുന്നു.

കോവിഡിനെക്കാളേറെ നമ്മുടെ സർക്കാറും സ്വന്തം ജനതയും പുലർത്തുന്ന കൂർത്ത അവഗണനയിൽ തട്ടി ഹൃദയധമനികൾ പൊട്ടിയാണ്​ ഒാരോ ദിവസവും പ്രവാസികൾ മരിച്ചുകൊണ്ടിരിക്കുന്നത്​. ചാർ​േട്ടഡ്​ വിമാനങ്ങൾക്ക്​ തടസ്സവാദം തീർത്തും ക്വാറൻറീൻ വാഗ്​ദാനങ്ങളിൽനിന്ന്​ ഒളിച്ചോടിയും കോവിഡ്​ പരിശോധനയുടെ പേരിൽ അനാവശ്യ ആശയക്കുഴപ്പങ്ങൾ തീർത്തും ഒാരോ ദിവസവും ഒരുപാടുപേരെ മരണമുനമ്പിലേക്ക്​ തള്ളിവിടുന്നുണ്ട്​ സർക്കാർ. മറുനാട്ടിൽ മരിച്ചുപോയ മനുഷ്യരുടെ കുടുംബങ്ങൾക്ക്​ ആശ്വാസ നടപടികളൊരുക്കാൻ ഇനി ഒരുനിമിഷംപോലും വൈകിക്കൂടാ.ഭരണകൂടങ്ങളും പൊതുസമൂഹവും പുലർത്തുന്ന ക്രൂരമായ അനാസ്​ഥ തിരുത്തണം, ഇനിയും കുഞ്ഞുങ്ങൾ അനാഥമാകുന്നത്​ തടയണം.

-സവാദ്​ റഹ്​മാൻ