'പ്രഫ. കെ.എ. സിദ്ദീഖ്​ ഹസൻ അക്ഷരസ്​മൃതി' യു.എ.ഇ തല പ്രകാശനം

ദുബൈ: പ്ര​േബാധനം പ്രസിദ്ധീകരിച്ച 'പ്രഫ. കെ.എ. സിദ്ദീഖ്​ ഹസൻ അക്ഷരസ്​മൃതി'യുടെ യു.എ.ഇ തല പ്രകാശനം ദുബൈയിൽ നടന്നു.

ബിസിനസ്​ ബേയിലെ ആസ്​റ്റർ ഡി.എം ഹെൽത്ത്​ കെയർ കോർപ​റേറ്റ്​ ഒാഫിസിൽ ലളിതമായ ചടങ്ങിലായിരുന്നു പ്രകാശനം. ആസ്​റ്റർ ഡി.എം ഹെൽത്ത്​ കെയർ സാരഥി ഡോ. ആസാദ്​ മൂപ്പൻ, റീജൻസി ഗ്രൂപ്​​ ചെയർമാൻ ശംസുദ്ദീൻ ബിൻ മുഹ്​യുദ്ദീൻ, പേസ്​ ഗ്രൂപ്​ ചെയർമാൻ പി.എ. ഇബ്രാഹിം ഹാജി എന്നിവർ ചേർന്നാണ്​​​ പ്രകാശനം നിർവഹിച്ചത്​. പ്രായോഗിക കാഴ്​ചപ്പാടിനൊപ്പം അസാമാന്യമായ നിശ്ചയദാർഢ്യവും ചേർന്നതാണ്​ പ്രഫ. കെ.എ. സിദ്ദീഖ്​ ഹസ​െൻറ ജീവിതമെന്ന്​ ഡോ. ആസാദ്​ മൂപ്പൻ പറഞ്ഞു.

ഉത്തരേന്ത്യയിലെ ദരിദ്രജനവിഭാഗങ്ങളുടെ ജീവിതത്തിന്​ പുതിയ അർഥം നൽകാനുള്ള പദ്ധതികളുമായി ഇറങ്ങിത്തിരിച്ച ആദ്യ മലയാളി സാമൂഹിക പ്രവർത്തകൻ കൂടിയായിരുന്നു പ്രഫ. സിദ്ദീഖ്​ ഹസനെന്ന്​ പി.എ. ഇബ്രാഹിം ഹാജി അനുസ്​മരിച്ചു.'മാധ്യമം' 'മീഡിയ വൺ' ഉൾപ്പെടെയുള്ള സംരംഭങ്ങൾക്ക്​ തുടക്കം കുറിക്കാൻ മുന്നിൽ നിന്ന പ്രഫ. സിദ്ദീഖ്​ ഹസ​െൻറ ജീവിതം പാഠപുസ്​തകം തന്നെയാണെന്ന്​ ശംഷുദ്ദീൻ ബിൻ മുഹ്​യിദ്ദീൻ പറഞ്ഞു.

മുബാറക്​ അബ്​ദുൽ റസാഖ്​, ടി.കെ. മുഹമ്മദ്​ റഷീദ്​, അഡ്വ. മുഹമ്മദ്​ അസ്​ലം, സാബിർ എ.ബി, മാധ്യമപ്രവർത്തകൻ എം.സി.എ നാസർ എന്നിവർ പ​ങ്കെടുത്തു. പണ്​ഡിതനും പ്രമുഖ വിദ്യാഭ്യാസ, ജീവകാരുണ്യ പ്രവർത്തകനും ആയിരുന്ന പ്രഫ. കെ.എ. സിദ്ദീഖ്​ ഹസ​െൻറ ജീവിതമുദ്രകൾക്കൊപ്പം നൂറുകണക്കിനാളുക​ളുടെ ഓർമകൾ കൂടി ഉൾപ്പെടുന്നതാണ്​​ പ്രബോധനം പ്രത്യേക പതിപ്പ്​.മുന്നൂറിലേറെ പേജുകളിലായി 140 ലേറെ പേരാണ്​ ഒാർമകൾ പങ്കുവെക്കുന്നത്​.