മഹാമാരിയിൽനിന്ന്​ കരകയറാൻ പൊതു–സ്വകാര്യ പങ്കാളിത്തം അനിവാര്യം –ജി.സി.സി മേധാവി

ദുബൈ: ലോകത്തെ പിടിച്ചുലക്കുന്ന മഹാമാരിയിൽനിന്ന്​ കരകയറാൻ ജി.സി.സി രാജ്യങ്ങളിൽ പൊതു-സ്വകാര്യ സംരംഭങ്ങൾ അനിവാര്യമാണെന്ന്​ ഗൾഫ്​ കോഓപറേഷൻ കൗൺസിൽ സെക്രട്ടറി ജനറൽ ഡോ. നായിഫ്​ ഫല അൽ ഹജ്​ അഭിപ്രായപ്പെട്ടു. ദുബൈയിൽ ഫെഡറേഷൻ ഓഫ്​ ജി.സി.സി ചേംബേഴ്​സ്​ മേധാവികളുടെ യോഗത്തിൽ സംസാരിക്കുകയായിരുന്നു അദ്ദേഹം.

ജി.സി.സി രാജ്യങ്ങൾ തമ്മിലുള്ള വ്യാപാരമൂല്യം 2019ൽ 90 ബില്യൻ ഡോളർ കവിഞ്ഞു. എന്നാൽ, പ്രതിസന്ധി മറികടക്കാൻ ഇത്​ പോരാ. 58 ദശലക്ഷത്തിലധികം ആളുകൾ ഇടപെടുന്ന ജി.സി.സി വിപണിയിൽ കൂടുതൽ വ്യാപാരം പ്രോത്സാഹി​പ്പിക്കേണ്ടത്​ ആവശ്യമാണ്​. ഇതിൽ സ്വകാര്യമേഖലയുടെ പങ്ക്​ വലുതാണ്​. സ്വകാര്യമേഖല നേരിടുന്ന വെല്ലുവിളികളും ഏറ്റെടുക്കണം. സാമ്പത്തിക വികസന മേഖലയിൽ ജി.സി.സി നേതാക്കളുടെ സമഗ്ര സഹകരണം വർധിപ്പിക്കണം. സമഗ്രവും നയത​ന്ത്ര​പ്രാധാന്യമുള്ളതുമായ പദ്ധതികൾക്ക്​ മുൻഗണന നൽകണമെന്നും അദ്ദേഹം ചൂണ്ടിക്കാട്ടി. മൂന്നുദിവസമായി നടന്ന യോഗം സമാപിച്ചു.