പൊതുഗതാഗതം പൂർണമായും പരിസ്ഥിതിസൗഹൃദമാകും
text_fieldsആർ.ടി.എയുടെ ഇലക്ട്രിക് ബസ്
ദുബൈ: യു.എ.ഇയുടെ സുസ്ഥിരത വർഷത്തോടനുബന്ധിച്ച് പൊതു ഗതാഗത രംഗവും കാർബൺ രഹിതമാക്കുന്ന ‘സീറോ എമിഷൻ പ്ലാൻ 2050’ അവതരിപ്പിച്ച് ദുബൈ റോഡ് ട്രാൻസ്പോർട്ട് അതോറിറ്റി (ആർ.ടി.എ). 2050 ഓടെ പൊതു ഗതാഗത രംഗം പൂർണമായും കാർബൺ മുക്തമാക്കാനാണ് പദ്ധതി.
യു.എ.ഇ ആതിഥ്യം വഹിക്കുന്ന കാലാവസ്ഥ വ്യതിയാന ഉച്ചകോടി (കോപ് 28)യുടെയും നെറ്റ് സീറോ എമിഷൻ 2050 സംരംഭത്തിന്റെയും ഭാഗമായാണ് പുതിയ പദ്ധതി ആർ.ടി.എ ആസൂത്രണം ചെയ്തിരിക്കുന്നത്. ഇതിന്റെ ആദ്യഘട്ടമെന്ന നിലയിൽ 2030 ഓടെ പൊതുഗതാഗത ബസുകളിൽ 10 ശതമാനം ഇലക്ട്രിക്, ഹൈഡ്രജൻ സംവിധാനത്തിലേക്ക് മാറ്റും. 2035ൽ ഇത് 20 ശതമാനമായും 2040ൽ 40 ശതമാനമായും 2045ൽ 80 ശതമാനമായും 2050 ഓടെ 100 ശതമാനവും കാൺബൺ രഹിത ഊർജത്തിലേക്ക് കൊണ്ടുവരാനാണ് ഉദ്ദേശിക്കുന്നത്..
കൂടാതെ 2030ൽ 10 ശതമാനം ടാക്സി കാറുകളും ഇലക്ട്രിക്, ഹൈഡ്രജൻ സംവിധാനത്തിലേക്ക് മാറും. 2035ൽ 50 ശതമാനം വർധിപ്പിച്ച് 2040 ഓടെ 100 ശതമാനത്തിലെത്തിക്കുകയാണ് ലക്ഷ്യം.
സ്കൂൾ ബസുകളിലും ഇതേ രീതി പിന്തുടർന്ന് 2050ൽ 100 ശതമാനവും ഇലക്ട്രിക്, ഹൈഡ്രജൻ ഇന്ധനത്തിലേക്ക് മാറ്റും. 2030 ഓടെ മുൻസിപ്പാലിറ്റിയിൽ നിന്നുള്ള മാലിന്യങ്ങൾ 100 ശതമാനവും പുനരുപയോഗം നടത്താൻ കഴിയുന്ന പ്ലാന്റ് നിർമിക്കാനും പദ്ധതിയുണ്ട്. ഇത് വഴി മാലിന്യങ്ങൾ കുഴിച്ചുമൂടുന്നത് പൂർണമായും ഒഴിവാക്കാനാകും. കൂടാതെ കെട്ടിടങ്ങളിൽ പുനരുപയോഗ ജലത്തിന്റെ ഉപയോഗം 2050ഓടെ 40 ശതമാനമായി വർധിപ്പിക്കും.
ആർ.ടി.എയുടെ ഊർജ, ഗ്രീൻ എകണോമി സംരംഭത്തിലൂടെ 2014 മുതൽ 2022 ഏതാണ്ട് 360 ജിഗാവാട്ട് മണിക്കൂർ വൈദ്യുതിയും 300 മില്യൺ ഗാലൺ ജലവും 88 മില്യൺ ലിറ്റർ ഗാസോലിനും 10 ദശലക്ഷം ലിറ്റർ ഡീസലുമാണ് ലാഭിക്കാനായത്. 4.16 ലക്ഷം ടൺ കാർബൺ പുറന്തള്ളുന്നത് ഒഴിവാക്കുന്നതിന് സമാനമാണിത്. ഇതു വഴി ഏതാണ്ട് 420 ദശലക്ഷം ദിർഹം ലാഭിക്കാനായി.
ആർ.ടി.എയുടെ വിവിധ മേഖലകളും ഏജൻസികളെയും ഉൾപ്പെടുത്തിയാണ് പദ്ധതി വ്യാപിപ്പിക്കുക.
അഞ്ചു വർഷത്തേക്ക് പദ്ധതി നടപ്പിലാക്കുന്നതിനുള്ള സഹായം നൽകാൻ കഴിയുന്ന സ്വകാര്യ മേഖലകളുമായും സഹകരിക്കുമെന്ന് ആർ.ടി.എ ഡയറക്ടർ ജനറലും ചെയർമാനുമായ മത്താർ അൽ തായർ പറഞ്ഞു.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.