സൈബർ ആക്രമണങ്ങൾ തടയാൻ ക്വാണ്ടം കമ്പ്യൂട്ടർ

ദുബൈ: സൈബർ ആക്രമണങ്ങൾ ചെറുക്കാനുള്ള മുന്നൊരുക്കങ്ങളുടെ ഭാഗമായി യു.എ.ഇ ക്വാണ്ടം കമ്പ്യൂട്ടർ സ്​ഥാപിക്കും. അതിസുപ്രധാന രേഖകൾ ഹാക്കർമാരുടെ കൈവശം ലഭിക്കാതിരിക്കാനാണ്​ നടപടി​.

യു.എ.ഇയിൽ ഇൻറർനെറ്റ്​ ഉപയോക്താക്കളുടെ ഡേറ്റ ​സുരക്ഷിതമാണെങ്കിലും അതിസമർഥരായ ഹാക്കർമാർ സുരക്ഷിതമല്ലാത്ത വിവരങ്ങൾ ചോർത്തിയെടുക്കാനുള്ള സാധ്യത മുന്നിൽകണ്ടാണ്​ നടപടിയെന്ന്​ ക്രിപ്​റ്റോഗ്രഫി ഗവേഷണ കേന്ദ്രം ​മേധാവി ഡോ. നജ്​വ ആറാജ്​ പറഞ്ഞു. സാധാരണ കമ്പ്യൂട്ടറുകളേക്കാൾ പതിൻമടങ്ങ്​ ശക്തമായ ക്വാണ്ടം കമ്പ്യൂട്ടറുകൾ ​ൈസബർ ആ​ക്രമണത്തിന്​ ഉപയോഗിക്കാറുണ്ട്​. സൈബർ സുരക്ഷാ വിഭാഗവും ആക്രമണകാരികളും തമ്മിലെ മത്സരത്തിൽ പിടിച്ചുനിൽക്കൽ അനിവാര്യമാണ്​. അതിന്​ വേണ്ടിയാണ്​ പുതിയ സംവിധാനങ്ങൾ ഒരുക്കുന്നത്​ -അവർ പറഞ്ഞു.

രാജ്യത്ത്​ പല കമ്പനികളും സ്​ഥാപനങ്ങളും സാധാരണ സൈബർ സുരക്ഷാ മാനദണ്ഡങ്ങൾ പോലും പാലിക്കാതെയാണ്​ പ്രവർത്തിക്കുന്നരെന്ന്​ അവർ കുറ്റപ്പെടുത്തി. ആക്രമണങ്ങൾ തടയാൻ ഒാരോരുത്തരും ചെയ്യേണ്ട കാര്യങ്ങൾ പലരും പൂർത്തിയാക്കുന്നില്ല. കണ്ടെത്താൻ പ്രയാസമുള്ള പാസ്​വേഡുകൾ ഉപയോഗിക്കുക, ആഭ്യന്തര കമ്പ്യൂട്ടർ നെറ്റ്​വർക്ക്​ സുരക്ഷിതമാക്കുക എന്നിവ പലരും ശ്രദ്ധിക്കുന്നില്ല. പൊതു-സ്വകാര്യ സ്​ഥാപനങ്ങളും തങ്ങളുടെ ഡേറ്റ സുരക്ഷിതമെന്ന്​ ഉറപ്പുവരുത്തണം.

അല്ലാ​ത്തപക്ഷം വെല്ലുവിളി നിലനിൽക്കുന്നുണ്ട്​ -അവർ വ്യക്തമാക്കി. ലോകത്തെല്ലായിടത്തും നിലവിലുള്ള പ്രതിസന്ധിയാണിതെന്നും ഡോ. നജ്​വ പറഞ്ഞു. കോവിഡ്​ രോഗികളുടെയും ബാങ്ക്​ അക്കൗണ്ടുമായി ബന്ധപ്പെട്ടതുമായ വിവരങ്ങളും ഹാക്കർമാരുടെ ലക്ഷ്യമാകാതിരിക്കില്ലെന്നും ചോദ്യത്തിന്​ മറുപടിയായി അവർ വ്യക്തമാക്കി.

സാധാരണ കമ്പ്യൂട്ടറുകളേക്കാൾ വേഗം കൂടിയ സംവിധാനങ്ങളുള്ള ക്വാണ്ടം കംമ്പ്യൂടിങ്​ സംവിധാനത്തിലൂടെ സൈബർ സുരക്ഷ കൂടുതൽ ഉറപ്പിക്കാനാവും. ആദ്യ പോസ്​റ്റ്​ ക്വാണ്ടം ക്രിപ്​റ്റോഗ്രഫി സോഫ്​റ്റ്​വെയർ ലൈബ്രറി സ്​ഥാപിക്കുമെന്നും അറിയിച്ചിട്ടുണ്ട്​.

ഭാവിയിൽ കൂടുതൽ പദ്ധതികളിലുൾപ്പെടുത്തി സൈബറിടത്തെ സുരക്ഷ ശക്തമാക്കാനുള്ള നടപടികളുമായാണ്​ യു.എ.ഇ സർക്കാർ മുന്നോട്ടുപോകുന്നത്​.

ക്വാണ്ടം കമ്പ്യൂട്ടർ

നിരവധി സൂപ്പർ കമ്പ്യൂട്ടറുകളുടെ പ്രവർത്തന വേഗമാണ്​ ഒരു ക്വാണ്ടം കമ്പ്യൂട്ടറിനുണ്ടാവുക. സാധാരണ കമ്പ്യൂട്ടറുകളിൽ ബിറ്റുകൾ ഉപയോഗിക്കു​േമ്പാൾ ക്വാണ്ടം കമ്പ്യൂട്ടറിൽ ക്യൂബിറ്റുകളാണ്​ ഉപയോഗിക്കുക.

നിലവിലെ കമ്പ്യൂട്ടറുകൾക്ക്​ പരിഹരിക്കാൻ കഴിയാത്ത അതിസങ്കീർണ പ്രശ്​നങ്ങൾ ഇതിലൂടെ കണ്ടെത്താം. നിരവധി രാജ്യങ്ങൾ ഇൗ മേഖലയിൽ വലിയ ഗവേഷണങ്ങൾ അടുത്ത കാലത്തായി നടത്തിയിട്ടുണ്ട്​. ആരോഗ്യം, ബഹിരാകാശ ഗവേഷണം, വ്യവസായം തുടങ്ങിയ മേഖലകളിൽ വലിയ മാറ്റങ്ങൾ ക്വാണ്ടം കമ്പ്യൂട്ടർ സൃഷ്​ടിക്കുമെന്നാണ്​ പ്രവചിക്കപ്പെട്ടത്​. സൈബർ സുരക്ഷയിൽ വിവിധ രാജ്യങ്ങൾ ക്വാണ്ടം കമ്പ്യൂട്ടർ ഉപയോഗപ്പെടുത്തിവരുന്നുണ്ട്​.