പൊതുജനങ്ങള്‍ക്ക്  റമദാനില്‍ ചലഞ്ച് റേസ്  ഒരുക്കി ദുബൈ എമിഗ്രേഷന്‍

ദുബൈ: ലക്ഷകണക്കിന് ദിര്‍ഹമി​​​െൻറ സമ്മാനങ്ങള്‍ ഒരുക്കി  ദുബൈ എമിഗ്രേഷന്‍ വകുപ്പ് ഈ വര്‍ഷവും പൊതു ജനങ്ങള്‍ക്കായി ‘സാബാ ഖു-ത്തഹ്ത്തി’ അഥവാ   ചലഞ്ച് റേസ്   ബോധവത്​കരണ പ്രശ്നോത്തരി സംഘടിപ്പിക്കുന്നു. ‘നൂര്‍ ദുബൈ’ റേഡിയോ വഴിയാണ് മത്സരമെന്ന്   ദുബൈ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്​സ്​ (ദുബൈ എമിഗ്രേഷൻ)അസി.ഡയറക്ടർ മേജർ ജനറൽ ഉബൈദ് ബിൻ സുറൂർ  വാര്‍ത്ത സമ്മേളനത്തില്‍ അറിയിച്ചു.  അറബി ഭാഷ കൈകാര്യം ചെയ്യുവാന്‍ അറിയുന്ന  ആര്‍ക്കും പരിപാടിയില്‍ പങ്കെടുക്കാം.

വിജയികള്‍ക്ക് ലക്ഷകണക്കിന് ദിര്‍ഹമി​​​െൻറ സമ്മാനങ്ങളും കാറുകളും മറ്റും ലഭിക്കും.  റമദാന്‍ ഒന്ന് മുതലാണ് പരിപാടി തുടങ്ങുന്നത് . ഉച്ചക്ക് 2 മുതല്‍ 3 വരെയാണ് മത്സര സമയം.  മാധ്യമ പ്രവര്‍ത്തകൻ അയൂബ് യുസഫാണ്  അതാരകൻ. മത്സരങ്ങളുമായി ബന്ധപ്പെട്ട കൂടുതൽ വിവരങ്ങൾ  താമസ -കുടിയേറ്റ വകുപ്പി​​​െൻറ സോഷ്യല്‍ മീഡിയ പേജുകളിൽ    പ്രസിദ്ധപ്പെടുത്തും.   2010 -ലെ റമദാൻ മുതൽ നടത്തിവരുന്ന ചലഞ്ച് റേസിൽ  കലാ സാംസ്കാരിക സാമൂഹിക -ശാസ്ത്ര മേഖലകളിലെ അറിവുകളും ഇസ്​ലാമിക ചിന്തകളുമാണ്  ചർച്ച ചെയ്യുന്നത്. 

അറബി ഭാഷയുടെ പ്രചാരണത്തിനും യു.എ.ഇ യുടെ മഹത്തായ സംസ്കാരം  ലോകത്തിന് മുന്നിൽ കൂടുതൽ പരിചിതമാക്കുന്നതിനും പരിപാടി ഏറെ ഉപകരിക്കുമെന്ന് ദുബൈ എമിഗ്രേഷൻ ഡയറക്ടർ ജനറൽ മേജർ ജനറൽ മുഹമ്മദ് അഹ്‌മദ്‌ അൽ മറി പറഞ്ഞു.