ദുബൈയിൽ സ്കൂളുകളിലെ നിയന്ത്രണങ്ങൾ നീക്കി; വിവിധ പരിപാടികൾക്ക് അനുമതി

ദുബൈ: കോവിഡ്​ പശ്ചാത്തലത്തിൽ സ്കൂളുകളിൽ ഏർപ്പെടുത്തിയ നിയന്ത്രണങ്ങളിൽ ഇളവനുവദിച്ച്​ ദുബൈ വിദ്യാഭ്യാസ വകുപ്പ്​. തിങ്കളാഴ്ച മുതൽ പാഠ്യേതര പ്രവർത്തനങ്ങൾ, ഫിസിക്കൽ എജുക്കേഷൻ, പഠനയാത്ര, പരിപാടികൾ എന്നിവക്കാണ്​ ദുബൈ വിജ്ഞാന-മാനവ വിഭവശേഷി വകുപ്പ്​ (കെ.എച്ച്​.ഡി.എ) അനുമതി നൽകിയത്​. സ്ഥാപനങ്ങളിലെ കാന്‍റീനുകളും ഭക്ഷണം കഴിക്കുന്ന സ്ഥലങ്ങളും തുറക്കാനും അനുവദിച്ചിട്ടുണ്ട്​.

എമിറേറ്റിലെ എല്ലാ സ്വകാര്യ സ്കൂളുകൾക്കും സർവകലാശാലകൾക്കും അംഗൻവാടികൾക്കും നിർദേശം ബാധകമാണ്​. അതിനിടെ അബൂദബി സ്കൂളുകളിൽ മുഴുവൻ കുട്ടികളും തിങ്കളാഴ്​ച മുതൽ നേരിട്ട്​ ക്ലാസിലെത്തും.

കഴിഞ്ഞയാഴ്ച ആദ്യഘട്ടമായി ചില ക്ലാസുകളിലെ കുട്ടികൾക്ക്​ പ്രവേശനത്തിന്​ അനുമതി നൽകിയിരുന്നു.

യു.എ.ഇ സ്കൂളുകൾ ശൈത്യകാല അവധിക്കുശേഷം തുറക്കുന്നതിന്​ മുന്നോടിയായി ജനുവരി മൂന്നുമുതൽ ദുരന്തനിവാരണ അതോറിറ്റിയും വിദ്യാഭ്യാസ വകുപ്പും വിവിധ നിയന്ത്രണങ്ങൾ ഏർപ്പെടുത്തിയിരുന്നു​.

ഇതിന്‍റെ ഭാഗമായി ദുബൈ, ഷാർജ, റാസൽഖൈമ ഒഴികെയുള്ള എമിറേറ്റുകളിൽ ക്ലാസുകൾ ഓൺലൈനിലേക്ക്​ മാറി. മൂന്നാഴ്ചയായി അബൂദബി, അജ്​മാൻ, ഫുജൈറ, ഉമ്മുൽ ഖുവൈൻ എന്നിവിടങ്ങളിൽ ഓൺലൈനിലാണ്​ നടന്നുവന്നിരുന്നത്​.

പാഠ്യേതര പ്രവർത്തനങ്ങളും കുട്ടികൾ ഇടകലരുന്ന മറ്റു പ്രവർത്തനങ്ങൾക്ക്​ എല്ലാ എമിറേറ്റുകളിലും വിലക്കുണ്ടായിരുന്നു. എന്നാൽ ജനുവരി 24 തിങ്കളാഴ്ച മുതൽ കിന്‍റർഗാർട്ടൻ, ഒന്നുമുതൽ അഞ്ചുവരെ ഗ്രേഡുകാർ, 12ാം ഗ്രേഡ്​ എന്നീ വിദ്യാർഥികൾക്ക്​ നേരിട്ട്​ ക്ലാസുകളിൽ പ്രവേശനം നൽകിത്തുടങ്ങിയിട്ടുണ്ട്​.

ആറുമുതൽ 11 വരെ ഗ്രേഡുകളിലെ വിദ്യാർഥികൾ ഈ സമയത്ത്​ ഓൺലൈൻ പഠനം തുടരുകയായിരുന്നു.

31 തിങ്കളാഴ്ച മുതൽ മറ്റു ക്ലാസുകളിലെ വിദ്യാർഥികളും നേരിട്ട്​ ഹാജരായി തുടങ്ങും.

എന്നാൽ, കുട്ടികളുടെ ഓൺലൈൻ പഠനം തുടരാൻ ആഗ്രഹിക്കുന്ന രക്ഷിതാക്കൾക്ക്​ അതിന്​ അനുമതിയുണ്ട്​.ദുബൈ സ്കൂളുകളിൽ പാഠ്യേതര പ്രവർത്തനങ്ങൾക്കും അനുമതി നൽകിയത്​ ക്ലാസുകൾ പഴയ സജീവതയിലേക്ക്​ തിരിച്ചുവരാൻ സഹായിക്കും. പഠനയാത്രക്ക്​ അനുമതി നൽകിയത്​ എക്സ്​പോ 2020 ദുബൈ അടക്കമുള്ള പരിപാടികളിൽ പ​ങ്കെടുക്കുന്നതിനും സഹായിക്കും. അബൂദബിയിൽ എല്ലാ വിദ്യാർഥികളും ക്ലാസിലെത്തുന്ന ആദ്യ ദിവസം 96 മണിക്കൂറിനിടയിലെ പി.സി.ആർ നെഗറ്റിവ്​ സർട്ടിഫിക്കറ്റ്​ ഹാജരാക്കണമെന്ന നിർദേശമുണ്ട്​.