100 കോടിയുടെ സമാന്തര റോഡ്​ പദ്ധതി പുരോഗമിക്കുന്നു: ഒന്നാം ഘട്ടം 85 ശതമാനം പൂർത്തിയായി

ദുബൈ: ദുബൈ ഗൊഡോൾഫിൻ ജില്ലയിൽ നടപ്പാക്കുന്ന സമാന്തര റോഡ്​ നവീകരണ പദ്ധതി ഒന്നാം ഘട്ടത്തി​​െൻറ നിർമാണം 85 ശതമാനം പൂർത്തിയായി.  ദുബൈ വാട്ടർ കനാലിന്​ കുറുകെ പണിയുന്ന രണ്ടു പാലങ്ങൾ പൂർത്തിയായതായും അവശേഷിക്കുന്ന മറ്റു ജോലികളെല്ലാം ഇൗ വർഷം അവസാന പാദത്തിൽ പൂർത്തിയാക്കുമെന്നും ആർ.ടി.എ ചെയർമാനും ഡയറക്​ടർ ജനറലുമായ മതാർ അൽ തായിർ അറിയിച്ചു.രണ്ടു ഘട്ടങ്ങളായി 100 കോടി ദിർഹം ചെലവിട്ട്​ നടപ്പാക്കുന്ന പദ്ധതിയുടെ പുരോഗതി വിലയിരുത്താൻ നേരിട്ട്​ സന്ദർശിച്ചശേഷമാണ്​ മത്താർ അൽ തായർ പ്രസ്​താവന ഇറക്കിയത്​. ശൈഖ്​ സായിദ്​ റോഡിൽ ഇൻറർചേഞ്ച്​ ഒന്നും രണ്ടിനുമിടയിലെ വാഹനത്തിരക്ക്​ 15 ശതമാനം  കണ്ട്​ കുറക്കുകയാണ്​ പദ്ധതിയുടെ ലക്ഷ്യം. ബിസിനസ്​ ബേ, ബുർജ്​ ഖലീഫ ജില്ലകളിലേക്ക്​ കൂടുതൽ പ്രവേശന,നിർഗമന മാർഗങ്ങൾ  ഒരുക്കുന്നതാണ്​ പദ്ധതി. ഇൗ രണ്ടു ദിശയിലും മണിക്കൂറിൽ 20,000 വാഹനങ്ങൾക്ക്​ ഇതുവഴി പോകാം. മെയ്​ദാൻ  റോഡി​​െൻറ വാഹനശേഷിയും വർധിക്കും. ശൈഖ്​ സായിദ്​ റോഡിനും അൽ ഖൈൽ റോഡിനുമിടയിലുള്ള യാത്രാസമയം  12 മിനിറ്റിൽ നിന്ന്​ രണ്ടര മിനിറ്റായി കുറയും. 5,665 മീറ്റർ മേൽപ്പാലങ്ങളും 2,445 മീറ്റർ അടിപ്പാതകളും പദ്ധതിയിൽ നിർമിക്കുന്നുണ്ട്​^മതാർ അൽ തായിർ പറഞ്ഞു.

ഒന്നാം ഘട്ടത്തിൽ 57.8 കോടി ദിർഹമാണ്​ ചെലവഴിക്കുന്നത്​. ഒാരോ ദിശയിലും മൂന്നു വരിയുള്ള മൂന്നര കിലോമീറ്റർ മേൽപ്പാലമാണ്​ വാട്ടർ കനാലിന്​ കുറുകെ നിർമിച്ചത്​. ​ഗൊ​േഡാൾഫിൻ കുതിരാലയത്തിന്​ മുകളിൽ അൽ മെയ്​ദാൻ റോഡിൽ  അൽഖൂസ്​ വ്യവസായ മേഖലവരെ പാലത്തിൽ ഒാരോ ദിശയിലും അഞ്ചു വ​രിയുണ്ടാകും. അൽ മെയ്​ദാൻ റോഡ്​^അൽ ഖൈൽ റോഡ്​ ജങ്​ഷൻ മേൽപ്പാലം പണിത്​ നവീകരിക്കും. തിരക്കേറിയ സമയത്തെ ഗതാഗതകുരുക്ക്​ ഒഴിവാക്കാൻ ഇതുവഴി സാധിക്കും.

അൽഖൈൽ റോഡിൽ ഷാർജ ദിശയിൽ അൽ അസായൽ റോഡിലേക്കും ഉൗദ്​ മേത്ത റോഡിലേക്കും രണ്ടുവരി പാലങ്ങൾ പണിയുന്നതും പദ്ധതിയുടെ ഭാഗമാണ്. 1150 മീറ്റർ വരുന്ന നാലു ടണലുകളും നിർമിക്കും.സമാന്തര റോഡ്​ പദ്ധതിയുടെ രണ്ടാം ഘട്ടം 2016ലെ രണ്ടാം പാദത്തിൽ നിർമാണം തുടങ്ങിയിട്ടുണ്ട്​. 33.60 കോടി ദിർഹം ചെലവ്​ വരുന്ന രണ്ടാം ഘട്ടത്തിൽ  അൽമെയ്ദാൻ, ഫൈനാൻഷ്യൽ സ​െൻറർ റോഡുകൾക്കിടയിലെ സമാന്തരപാതകളുടെ പടിഞ്ഞാറ്​ ഭാഗമാണ്​ നവീകരിക്കുക.

ഒാരോ ദിശയിലും മൂന്നു മുതൽ നാലുവരെ വരി പാതകളും സർവീസ്​ റോഡുകളും നിർമിക്കും.  അൽ സാദ, ബുർജ്​ ഖലീഫ ബുലെവാർഡ്​ റോഡുകൾ ചേരുന്ന ഇൻറർസെക്ഷനിൽ  240 മീറ്റർ മേൽപ്പാലം അൽ സാദ, ബിസിനസ്​ ബേ റോഡുകൾ ചേരുന്ന ഇൻറർസെക്ഷനിൽ 535 മീറ്റർ ടണൽ എന്നിവ ഇൗ ഘട്ടത്തിലെ പ്രധാന നിർമാണ പ്രവർത്തികളാണ്​.ശൈഖ്​ സായിദ്​ റോഡിലെ തിരക്ക്​ ലഘൂകരിക്കാനായി ആർ.ടി.എ നിലവിൽ ഏറ്റെടുത്ത പ്രവർത്തികളിൽ അതിപ്രധാനപ്പെട്ടതാണ്​ സമാന്തര റോഡ്​ പദ്ധതി.