ഇ-സ്കൂട്ടർ, സൈക്കിൾ നിയമ ലംഘനം കണ്ടെത്താൻ റോബോട്ട്​

ദുബൈ: ഇലക്​ട്രിക്​ സ്കൂട്ടർ, സൈക്കിൾ ഉപയോക്​താക്കൾ വരുത്തുന്ന നിയമലംഘനങ്ങൾ കണ്ടെത്താൻ ദുബൈയിൽ റോബോട്ട്​ വരുന്നു. നിരീക്ഷണത്തിനും നിയമലംഘനങ്ങൾ പിടികൂടാനും ഉപയോഗിക്കുന്ന റോബോട്ട്​ മാർച്ച്​ മാസം മുതൽ പരീക്ഷണയോട്ടം ആരംഭിക്കും. നിർമിത ബുദ്ധി ഉപയോഗിച്ച്​ പ്രവർത്തിക്കുന്ന റോബോട്ട്​, ഹെൽമെറ്റ്​ ധരിക്കാതിരിക്കുന്നത്​, നിശ്ചിത സ്ഥലത്തല്ലാതെ സ്​കൂട്ടറുകൾ പാർക്ക്​ ചെയ്യുന്നത്​, ഇ-സ്കൂട്ടറിൽ ഒന്നിലേറെ യാത്രക്കാർ സഞ്ചരിക്കുന്നത്​, കാൽനടക്കാർക്ക്​ മാത്രമായുള്ള ഭാഗങ്ങളിൽ ഇവ റൈഡ്​ ചെയ്യുന്നത്​ എന്നിങ്ങനെ വ്യത്യസ്ത നിയമലംഘനങ്ങൾ കണ്ടെത്തും. 300 ദിർഹം വരെ പിഴ ഈടാക്കുന്ന കുറ്റങ്ങളാണ്​ ഇവയെല്ലാം. നിയമലംഘനങ്ങൾ കണ്ടെത്തിയാൽ ദുബൈ പൊലീസിന്​ വിവരങ്ങൾ പങ്കുവെക്കുകയും വിലയിരുത്തൽ നടത്തുകയും ചെയ്യും.

85 ശതമാനത്തിലധികം കൃത്യതയോടെ നിയമ ലംഘനങ്ങൾ തിരിച്ചറിയാനും 5 സെക്കൻഡുകൾക്കുള്ളിൽ ഡേറ്റ കൈമാറാനും റോബോട്ടിന് കഴിയും. 2 കി.മീറ്റർ വരെ നിരീക്ഷണ സംവിധാനം ഇതിലുണ്ട്​. വിവിധ കാലാവസ്ഥകളിൽ കാര്യക്ഷമമായി പ്രവർത്തിക്കാൻ സാധിക്കുന്ന രീതിയിലാണ്​ റോബോട്ട് രൂപകൽപന ചെയ്തിരിക്കുന്നത്. 1.5 മീറ്ററിനുള്ളിൽ ഏതെങ്കിലും വസ്തുവിനെയോ വ്യക്തിയെയോ തിരിച്ചറിഞ്ഞാൽ റോ​ബോട്ട്​ സഞ്ചരിക്കുന്നത്​ നിർത്തും. റോഡ് ഉപയോക്താക്കളുടെ സുരക്ഷ ഉറപ്പാക്കുന്നതിന്‍റെ ഭാഗമായാണിത്​.

റോബോട്ടിന്‍റെ പരീക്ഷണ ഘട്ടത്തിന്‍റെ തുടക്കം ജുമൈറ-3 ബീച്ച് ഏരിയയിലാണ്​ ആരംഭിക്കുക. പരീക്ഷണത്തിലൂടെ സംവിധാനത്തിന്‍റെ കാര്യക്ഷമതയും ഭാവിയിൽ വിപുലമായ നടപ്പാക്കലിനുള്ള സാധ്യതയെക്കുറിച്ചും പഠിക്കുകയാണ്​ ദുബൈ അധികൃതരുടെ ലക്ഷ്യം. പരീക്ഷണം ആരംഭിക്കുന്നതിനായി റോഡ്‌ ഗതാഗത അതോറിറ്റി(ആർ.ടി.എ) റോബോട്ടിക്‌സ്​, അഡ്വാൻസ്ഡ് ടെക്‌നിക്കൽ സിസ്റ്റം പ്രൊവൈഡറായ ടെർമിനസ് ഗ്രൂപ്പുമായി കരാർ ഒപ്പുവെച്ചു. ദുബൈയിൽ ആർ.ടി.എ ആതിഥേയത്വം വഹിക്കുന്ന ‘മെന’ ട്രാൻസ്‌പോർട്ട് കോൺഗ്രസ്​ ആൻഡ്​ എക്‌സിബിഷൻ-2024 പരിപാടിക്കിടയിലാണ്​ കരാർ ഒപ്പിട്ടത്. ആർ.ടി.എയുമായി പദ്ധതിയിൽ സഹകരിക്കുന്നതിൽ ആഹ്ലാദമുണ്ടെന്ന്​ ടെർമിനസ്​ ഇന്‍റർനാഷനൽ പ്രസിഡന്‍റ്​ ഡോ. ലിങ്​ ചാഹോ പറഞ്ഞു.