തിരക്കേറിയ മേഖലകളിൽ യാത്ര സുഗമാക്കാൻ ആർ.ടി.എയുടെ സമഗ്ര പദ്ധതി

ദുബൈ: നഗരത്തിലെ ഗതാഗത തിരക്കേറിയ അഞ്ചു സുപ്രധാന കേന്ദ്രങ്ങളിലെ തിരക്കു കുറക്കാൻ റോഡ്​ ഗതാഗത അതോറിറ്റി (ആർ.ടി.എ)യുടെ സമഗ്ര പദ്ധതി. വിവിധ റോഡുകൾ വീതി കൂട്ടിയും വരികൾ വർധിപ്പിച്ചും റൗണ്ട്​ എബൗട്ടുകൾ സ്​ഥാപിച്ചും 2018 ​​െൻറ ആദ്യ പാദത്തിൽ പദ്ധതി പൂർത്തിയാക്കാനാണ്​ തീരുമാനം.
അൽഖൈൽ റോഡി​ൽ നിന്ന്​ ഷാർജയിലേക്കുള്ള വഴിയിൽ ​ദുബൈമാൾ പാലത്തിനു മുൻപുള്ള മെയ്​ദാൻ റോഡിൽ ഒരു വരി കൂടി വർധിപ്പിക്കുകയാണ്​ തീരുമാനങ്ങളിലൊന്ന്​. അൽഖൈൽ റോഡിന്​ നാലു വരിയാവുന്നതോടെ മണിക്കൂറിൽ കടന്നു പോകുന്ന വാഹനങ്ങളുടെ എണ്ണം 1800 ആവും. ഹെസ്സ ഇൻറർസെക്​ഷനിൽ വാഹനങ്ങൾ ഒരു വരിയായി പോകുന്നതു മൂലമുള്ള ഞെരുക്കം ഒഴിവാക്കാൻ എക്​സിറ്റ്​ വീതി കൂട്ടി രണ്ടു വരിയാക്കും.

മംസാറിലെ റോഡ്​ 46ൽ ഒരു റൗണ്ട്​ എബൗട്ട്​ കൂടി സ്​ഥാപിക്കും. നിലവിൽ വാഹനത്തിരക്കേറിയ വുഹൈദ റോഡ്​ എക്​സിറ്റിനെ ആ​ശ്രയിക്കേണ്ട അവസ്​ഥക്ക്​ മോചനമാവും. വുഹൈദ റോഡിലെ തിരക്ക്​ അൽപമെങ്കിലും കുറയാനും സഹായിക്കും.ശൈഖ്​ സായിദ്​ റോഡിൽ നിന്ന്​  ഷാർജയിലേക്കുള്ള ഭാഗത്ത്​ അൽഖൈൽ റോഡിന്​ സമാന്തരമായ കലക്​ടർ റോഡിൽ ഒരു വരി കൂടി സ്​ഥാപിക്കുന്നതോടെ വാഹനങ്ങളുടെ എണ്ണം മണിക്കൂറിൽ 3000 ആയി ഉയരും.ബിസിനസ്​ ബേ റോഡ്​, അൽ സാദാ റോഡ്​ എന്നിവയുടെ ഇൻറർസെക്​ഷനുകളിലെ സ്​റ്റോറേജ്​ ലെയിനുകൾ വികസിപ്പിക്കുന്നതും വാഹനക്കുരുക്കൾക്ക്​ അയവു വരുത്തും.   അൽ ഖൂസ്​ വ്യവസായ മേഖലയിലെ ത്രിതല ഇൻറർസെക്​ഷനുകളിൽ വരികൾ വർധിപ്പിക്കും. 

ചിലയിടങ്ങളിലായി സർവീസ്​ റോഡുകളും നിർമിക്കും. വാഹന ബാഹുല്യം മൂലം ഗതാഗതക്കുരുക്ക്​ പതിവായ ഇൗ മേഖലയിൽ അവക്ക്​ ശമനമുണ്ടാക്കി സുഗമമായ യാത്രക്ക്​ ഇത്​ അവസരമുണ്ടാക്കും.  ദുബൈയിലെ തിരക്കേറിയ റോഡുകളിലെ യാത്ര സൗകര്യപ്രദമാക്കാൻ ലക്ഷ്യമിട്ടുള്ള ആർ.ടി.എയുടെ സമ​ഗ്ര നയങ്ങളുടെ ഭാഗമായാണ്​ ഇൗ നിർമാണ പ്രവർത്തനങ്ങളെന്ന്​ ആർ.ടി.എ ഡയറക്​ടർ ജനറൽ മത്താർ അൽ തായിർ വ്യക്​തമാക്കി.