ഭക്ഷണത്തിൽ ഉപ്പും എണ്ണയും കുറക്കാൻ പാചകക്കാർക്ക്​ നി​ർദേശം

ദുബൈ: വീട്ടിലായാലും ഹോട്ടലിലായാലും പാചകം ചെയ്യുന്നവരുടെ ശ്രദ്ധക്ക്​. നിങ്ങളുടെ വിഭവങ്ങളിൽ നിന്ന്​ ഉപ്പി​​െൻറയും എണ്ണയുടെയും അളവ്​ കുറച്ചേ തീരൂ. രുചിയും മണവും കൂട്ടാമെന്ന്​ ധരിച്ചാണ്​ ഇവ രണ്ടും എടുത്ത്​ പ്രയോഗിക്കുന്നതെങ്കിലും ഫലം വിപരീതമാണ്​. പൊണ്ണത്തടി, പ്രമേഹം, ഉയർന്ന രക്​തസമ്മർദം തുടങ്ങിയ ആരോഗ്യ പ്രശ്​നങ്ങളിലെല്ലാം മുഖ്യ പ്രതിസ്​ഥാനത്ത്​ ഇവ രണ്ടുമുണ്ട്​. ദുബൈ നഗരസഭയുടെ ഭക്ഷ്യസുരക്ഷാ വിഭാഗം പാചകക്കാർക്കായി സംഘടിപ്പിച്ച ആരോഗ്യകരമായ  ഭക്ഷണം സംബന്ധിച്ച ശിൽപശാലയിൽ മുഖ്യനിർദേശവും ഇതു തന്നെയായിരുന്നു. കടുകോളം ഉപ്പു കുറച്ചാൽ കുന്നോളം മരുന്നുകൾ ഒഴിവാക്കാമെന്ന്​. 

ചേരുവകളിൽ ചെറിയ വ്യത്യാസങ്ങൾ വരുത്തി രുചിയും ആരോഗ്യവും നൽകുന്ന ഭക്ഷണമൊരുക്കാനുള്ള വഴികളാണ്​ ശിൽപശാല ചർച്ച ചെയ്​തതെന്ന്​ ഭക്ഷ്യ സുരക്ഷാ വിഭാഗത്തിലെ ​ജഹൈന ഹസ്സൻ അൽ അലി പറഞ്ഞു. ഉപഭോക്​താക്കളുടെ ആരോഗ്യ കാര്യത്തിൽ പാചകക്കാർക്ക്​ വലിയ പങ്കുവഹിക്കാനുണ്ട്​. ചെറു മാറ്റങ്ങൾ വരുത്തിയാൽ പല ഭക്ഷണങ്ങളുടെയും പോഷകമൂല്യം വർധിപ്പിക്കാനും അവർക്ക്​ കഴിയും.