സുരക്ഷ: ദുബൈ പൊലീസ്​ മോക്​ഡ്രിൽ തുടങ്ങി

ദുബൈ: എക്​സ്​പോ 2020 ദുബൈയുടെ സുരക്ഷാ മുൻകരുതലി​െൻറ ഭാഗമായി പൊലീസ്​ മോക്​ഡ്രിൽ ആരംഭിച്ചു. ചൊവ്വാഴ്​ച തുടങ്ങിയ പരിശീലനം ബുധനാഴ്​ചയാണ്​ അവസാനിക്കുക. സുരക്ഷാവിഭാഗത്തി​െൻറ സന്നദ്ധതയും തയാറെടുപ്പുകളും പിഴവില്ലാത്തതാണെന്ന്​ ഉറപ്പുവരുത്തലാണ്​ ഇതി​െൻറ ഉദ്ദേശ്യം. നഗരിയുടെ സമീപത്തെ ഭാഗങ്ങളിലെ സുരക്ഷയും പൊലീസ്​ ഉറപ്പുവരുത്തും.

അടുത്ത മാസം ഒന്നിന്​ ആരംഭിക്കുന്ന എക്​സ്​പോയുടെ തയാറെടുപ്പുകൾ യു.എ.ഇ വൈസ്​ പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം കഴിഞ്ഞ ആഴ്​ച നേരി​ട്ടെത്തി പരിശോധിച്ചിരുന്നു. തിങ്കളാഴ്​ച എക്​സ്​പോ നടത്തിപ്പിനുള്ള സുപ്രീം കമ്മിറ്റി അംഗങ്ങൾ പ്രത്യേകം യോഗംചേർന്ന് മുന്നൊരുക്കം വിലയിരുത്തിയിട്ടുണ്ട്​.

യു.എ.ഇ സുവർണ ജൂബിലിയോടൊപ്പം വന്നെത്തുന്ന എക്​സ്​പോ മികച്ച വിജയമാക്കുമെന്ന്​ സുപ്രീം കമ്മിറ്റി ചെയർമാൻ ശൈഖ്​ അഹമ്മദ്​ ബിൻ സഈദ്​ ആൽ മക്​തൂം പറഞ്ഞു. നിർമിതബുദ്ധിയടക്കമുള്ള സുരക്ഷാസംവിധാനങ്ങൾ എക്​സ്​പോക്ക്​ ഒരുക്കിയതായി ദുബൈ പൊലീസ്​ കമാൻഡർ ഇൻ ചീഫ്​ ലഫ്​. ജനറൽ അബ്​ദുല്ല ഖലീഫ അൽ മആരി വ്യക്​തമാക്കി.