വേലക്കാരിയുടെ കൊല: വീട്ടുകാരി  അറസ്​റ്റിൽ

ദുബൈ: അൽ നഹ്​ദയിലെ വില്ലയിൽ വീട്ടുവേലക്കാരി കൊല ചെയ്യപ്പെട്ട സംഭവത്തിൽ സ്​പോൺസറെ ദുബൈ പൊലീസ്​ അറസ്​റ്റു ചെയ്​തു. വീട്ടുവേലക്കാരി കുഴഞ്ഞു വീണെന്നും ആശുപത്രിയിൽ എത്തിക്കാൻ ആംബുലൻസ്​ വേണമെന്നുമറിയിച്ച്​ അറബ്​ പൗരൻ വിളിച്ച ഫോൺ കാൾ മുതലാണ്​ കേസി​​​െൻറ തുടക്കം. സാധാരണ മരണം എന്ന മട്ടിൽ ഒതുക്കാൻ വീട്ടുകാർ ഒതുക്കാൻ ശ്രമിച്ചെങ്കിലും ദേഹത്ത്​ പാടുകളും മുറിവുകളും കണ്ടതോടെയാണ്​ പൊലീസ്​ അന്വേഷണം തുടങ്ങിയത്​. യാതൊരു പങ്കുമില്ലെന്നും വീണപ്പോൾ പറ്റിയ മുറിവാണെന്നുമായിരുന്നു വീട്ടുകാരുടെ വിശദീകരണം. 
കേണൽ അഹ്​മദ്​ ഹുമൈദ്​ അൽ മറിയുടെ നേതൃത്വത്തിൽ നടത്തിയ വിശദ പരിശോധനയിൽ മരണകാരണം തലയിലും ദേഹത്തുമേറ്റ മാരക പരിക്കുകളാണെന്ന്​ വ്യക്​തമായി. തുടർന്ന്​ വീട്ടുകാരിയെ പൊലീസ്​ അറസ്​റ്റു ചെയ്യുകയായിരുന്നു. അടിയേറ്റ്​ വീട്ടിൽ നിന്ന്​ യുവതിയുടെ നിലവിളികൾ കേൾക്കാറു​ണ്ടെന്ന്​ അയൽവാസികളും വെളിപ്പെടുത്തി. അതിനിടെ പിടിയിലായ സ്​ത്രീയുടെ ഭർത്താവ്​ സുഹൃത്തിനയച്ച എസ്​.എം.എസ്​ സന്ദേശമാണ്​ കൊലക്ക്​ പിന്നിൽ ആരാണെന്ന കാര്യം വ്യക്​തമാക്കിയത്​. അവളോട്​ ഇങ്ങിനെ തല്ലരുതെന്ന്​ പലപ്രാവശ്യം പറഞ്ഞിട്ടും കേട്ടില്ലെന്നും ഇപ്പോൾ അടികൊണ്ട്​ വേലക്കാരി മരിച്ചെന്നുമായിരുന്നു ആ സന്ദേശം. എസ്​.എം.എസ്​ ലഭിച്ചയാൾ ഇക്കാര്യം പൊലീസിൽ അറിയിച്ചതോടെ പ്രതി കുറ്റം സമ്മതിക്കുകയായിരുന്നു.