ശൈഖ് തഹ്‌നൂൻ ലുലു ഗ്രൂപ്പിൽ നൂറ് കോടി ഡോളർ നിക്ഷേപിക്കുമെന്ന്​​ റിപ്പോർട്ട്​

ദുബൈ: അബൂദബി ഭരണ കുടുംബാംഗം ശൈഖ് തഹ്‌നൂൻ ബിൻ സായിദ് അൽ നഹ്‌യാൻ എം.എ. യൂസുഫലിയുടെ ഉടമസ്ഥതിയിലുള്ള ലുലു ഗ്രൂപ്പി ൽ നൂറ് കോടി ഡോളർ (ഏതാണ്ട് 7600 കോടി രൂപ) നിക്ഷേപിച്ചെന്ന്​ റിപ്പോർട്. അബൂദബിയിലെ റോയൽ ഗ്രൂപ്പ് ചെയർമാനാണ് ശൈഖ് തഹ്‌നൂൻ. 20 ശതമാനം ഓഹരിയാണ് ശൈഖ് തഹ്‌നൂ​​െൻറ റോയൽ ഗ്രൂപ്പ്​ സ്വന്തമാക്കിയതെന്ന്​ അന്താരാഷ്​ട്ര മാധ്യമമായ ബ്ലൂംബെർഗ്​ പേര്​ വെളിപ്പെടുത്താത്ത കേന്ദ്രങ്ങളെ ഉദ്ധരിച്ച്​ റിപ്പോർട്ട്​ ചെയ്യുന്നു.

മധ്യപൗരസ്ത്യ ദേശത്തെ ഏറ്റവും വലിയ ഹൈപ്പർമാർക്കറ്റ് ശൃംഖലകളിലൊന്നാണ് ലുലു. റോയൽ ഗ്രൂപ്പിന് മാധ്യമ രംഗം, വിനോദ വ്യവസായം, ധനവിനിമയ സ്ഥാപനങ്ങൾ, റിയൽ എസ്​റ്റേറ്റ് തുടങ്ങിയ വിവിധ മേഖലകളിൽ നിക്ഷേപമുണ്ട്​. ഫസ്​റ്റ്​ അബൂദബി ബാങ്ക് ചെയർമാൻ കൂടിയാണ് ശൈഖ് തഹ്‌നൂൻ.

എന്നാൽ, ഇതുസംബന്ധിച്ച്​ ലുലു ഗ്രൂപ്പ്​ ഒൗദ്യോഗിക വിശദീകരണം പുറത്തുവിട്ടിട്ടില്ല. ഇതേക്കുറിച്ച്​ ഇപ്പോൾ പ്രതികരിക്കുന്നി​ല്ലെന്ന്​ ചീഫ് കമ്യുണിക്കേഷൻ ഓഫിസർ വി. നന്ദകുമാർ പറഞ്ഞു. ഷോപ്പിംഗ് മാളുകൾക്ക്​ പുറമെ ഹോസ്പിറ്റാലിറ്റി, റിയൽ എസ്​റ്റേറ്റ് തുടങ്ങിയ ബിസിനസുകളും ലുലുവിനുണ്ട്. ഏകദേശം 740 കോടി ഡോളറാണ് വാർഷിക വിറ്റുവരവ്. 50,000 ത്തിലധികം ആളുകൾ ജോലി ചെയ്യുന്നു.