റോഡ് സുരക്ഷ കാമ്പയിനുമായി ഷാർജ പൊലീസ്​

ഷാർജ: പോക്കറ്റ് റോഡുകളിൽ നിന്നും മറ്റും പ്രധാന റോഡിലേക്ക് പ്രവേശിക്കുന്നതിനുമുമ്പ് പാതകൾ വ്യക്തമാണെന്ന് ഉറപ്പുവരുത്തണമെന്ന കാമ്പയിനുമായി ഷാർജ പൊലീസ്. പ്രചാരണം ഒരുമാസം നീണ്ടുനിൽക്കും. കഴിഞ്ഞ വർഷത്തെ ട്രാഫിക് സ്​റ്റാറ്റിസ്​റ്റിക്​സ്​ സൂചികയുടെ പഠനത്തെ അടിസ്ഥാനമാക്കിയാണ് പ്രചാരണമെന്ന് ട്രാഫിക് ആൻഡ് പട്രോൾസ് വകുപ്പ് ഡയറക്​ടർ ലെഫ്. കേണൽ മുഹമ്മദ് അല്ലെ പറഞ്ഞു.

ഷാർജ പൊലീസി​െൻറ സോഷ്യൽ നെറ്റ്‌വർക്കിങ്​ സൈറ്റുകളിലും നിരവധി അച്ചടി, ഓഡിയോ, വിഡിയോ മീഡിയകളിലും അറബിക്, ഇംഗ്ലീഷ്, ഉർദു ഭാഷകളിൽ ബോധവത്​കരണ നിർദേശങ്ങൾ പ്രസിദ്ധീകരിക്കുമെന്ന് ലഫ്. കേണൽ അല്ലെ സൂചിപ്പിച്ചു.