ഹത്ത വികസന പദ്ധതി ആരംഭിക്കാൻ ശൈഖ്​ ഹംദാൻ നിർദേശം നൽകി

ദുബൈ: എമിറേറ്റിലെ മലയോര പ്രദേശമായ ഹത്തയെ വിനോദസഞ്ചാര മേഖലയായി പരിവർത്തിപ്പിക്കുന്ന ഹത്ത വികസന പദ്ധതി ആരംഭിക്കാൻ ദുബൈ കിരീടാവകാശിയും എക്​സിക്യൂട്ടിവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം ഉത്തരവിട്ടു. ദു​ബൈ 2040 അർബൻ മാസ്റ്റർ പ്ലാനി‍െൻറ ഭാഗമായ പദ്ധതി നേരത്തെ പ്രഖ്യാപിക്കപ്പെട്ടിരുന്നു. പദ്ധതിയുടെ മേൽനോട്ടത്തിന്​ സുപ്രീം കമ്മിറ്റി രൂപവത്​കരിക്കാനും ശൈഖ്​ ഹംദാൻ നിർദേശം നൽകി. ഉൾനാടൻ ബീച്ച്​, തടാകം, കേബിൾ വഴിയുള്ള പർവത റെയിൽവേ എന്നിവയടങ്ങുന്ന സംവിധാനങ്ങളുടെ നിർമാണമാണ്​ ഇതിൽ ഉൾപ്പെടുന്നത്​. ഒമാനുമായി അതിർത്തി പങ്കിടുന്ന ഹത്ത നിലവിൽ തന്നെ സാഹസിക സഞ്ചാരികളുടെ പ്രധാന ആകർഷണ കേന്ദ്രമാണ്​. കൂടുതൽ സഞ്ചാരികളെ ആകർഷിക്കുന്ന തരത്തിൽ പ്രദേശത്തെ പരിവർത്തിപ്പിക്കലാണ്​ പുതിയ പദ്ധതിയിലൂടെ ലക്ഷ്യമിടുന്നത്​. ഈ വികസന പദ്ധതികൾക്ക്​ മേൽനോട്ടം വഹിക്കുകയും സമയബന്ധിതമായി പൂർത്തിയാക്കുകയും ചെയ്യലാണ്​ സുപ്രീം കമ്മിറ്റിയുടെ ഉത്തരവാദിത്തം.നിരവധി ഹോട്ടലുകളും 120 കി.മീറ്റർ സൈക്കിൾ പാതയും നിർമിക്കുന്നതും പദ്ധതിയുടെ ഭാഗമാണ്​. സൈക്കിളുകൾക്കും സ്കൂട്ടറുകൾക്കുമുള്ള കമ്പാർട്ട്മെന്‍റ്​ ഉൾപ്പെടുന്ന പുതിയ ബസ് സർവിസ് അവതരിപ്പിക്കാനും പദ്ധതിയുണ്ട്. ഒരു പുതിയ റൈഡ്-ഷെയറിങ്​ സേവനവും ആവശ്യാനുസരണം ബസ് ഈ പ്രദേശത്തേക്ക്​ രൂപപ്പെടുത്തും