ഇമറാത്തി യുവാവി​െൻറ കാൻസർ  ചികിത്സാ ചെലവ്​ ശൈഖ്​ ഹംദാൻ വഹിക്കും

ദുബൈ: സാമൂഹിക സേവനത്തിനും സന്നദ്ധ പ്രവർത്തനത്തിനും ആഹ്വാനം ചെയ്യുകയല്ല, ജീവിതം കൊണ്ട്​ കാണിച്ചു കൊടുക്കുകയാണ്​ യു.എ.ഇയുടെ നേതൃത്വം. ചികിത്സക്ക്​ വൻ തുക ആവശ്യമുണ്ടെന്ന്​ ഇൻസ്​റ്റാഗ്രാമിലൂടെ അറിയിച്ച യുവാവി​​െൻറ ചെലവ്​ മുഴുവൻ വഹിക്കുമെന്ന്​ ദുബൈ കിരീടാവകാശിയും എക്​സിക്യൂട്ടിവ്​ കൗൺസിൽ അധ്യക്ഷനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂം പ്രഖ്യാപിച്ചു.

ഖലീഫ മുഹമ്മദ്​ റാശിദ്​ ദഅ്​ഫൂസ്​ അൽ മുഹൈറി എന്ന ചെറുപ്പക്കാരനാണ്​ ത​​െൻറ ആരോഗ്യാവസ്​ഥയെക്കുറിച്ച്​ വിവരിച്ച്​ ​ഇൻസ്​റ്റാഗ്രാമിൽ വീഡിയോ പോസ്​റ്റ്​ ചെയ്​തത്​. ചികിത്സ തുടരുകയാണെന്നും 30 ലക്ഷം ദിർഹം ചെലവുവരുമെന്ന്​ കണക്കാക്കുന്നതായും മുഹൈറി പറഞ്ഞു.  ഇതു പോസ്​റ്റ്​ ചെയ്​ത്​ മണിക്കൂറിനകം സംഭവം ശ്രദ്ധയിൽ​പ്പെട്ട ശൈഖ്​ ഹംദാൻ ചികിത്സാ ചെലവ്​ വഹിക്കാൻ സന്നദ്ധത അറിയിക്കുകയായിരുന്നു. അമേരിക്കയിൽ ചികിത്സയിലുള്ള യുവാവ്​ കീമോ തെറാപ്പി ഫലപ്പെടാത്തതിനെ തുടർന്ന്​ ഇൗയിടെ ശ്വാസകോശ ശസ്​ത്രക്രിയക്ക്​ വിധേയനായിരുന്നു.