ശൈഖ്​ മുഹമ്മദ്​ ബിൻ സായിദും യു.എസ് സുരക്ഷാ ഉപദേഷ്​ടാവും കൂടിക്കാഴ്ച നടത്തി

അബൂദബി: അബൂദബി കിരീടാവകാശിയും സായുധസേന െഡപ്യൂട്ടി സുപ്രീം കമാന്‍ഡറുമായ ശൈഖ്​ മുഹമ്മദ് ബിന്‍ സായിദ്​ യു.എസ്. സുരക്ഷാ ഉപദേഷ്​ടാവ് ജേക്ക് സുള്ളിവനുമായി കൂടിക്കാഴ്ച നടത്തി. വിവിധ മേഖലകളില്‍ യു.എസ്​- യു.എ.ഇ സഹകരണം ശക്തിപ്പെടുത്തുന്നതിനെക്കുറിച്ച്​ ചർച്ച ചെയ്​തു.

യു.എ.ഇ സുരക്ഷാ ഉപദേഷ്​ടാവ് ശൈഖ്​ താനൂന്‍ ബിന്‍ സായിദും കൂടിക്കാഴ്ചയില്‍ സംബന്ധിച്ചു. അബൂദബി അല്‍ ഷാത്തി കൊട്ടാരത്തിലായിരുന്നു കൂടിക്കാഴ്ച. ശൈഖ്​ ഹംദാന്‍ ബിന്‍ മുഹമ്മദ്, അബൂദബി എയര്‍പോര്‍ട്ട് കമ്പനി ചെയര്‍മാന്‍ ശൈഖ്​ മുഹമ്മദ് ബിന്‍ ഹമദ്, ദേശീയ സുരക്ഷാ കൗണ്‍സില്‍ൈഡപ്യൂട്ടി സെക്രട്ടറി ജനറല്‍ അലി ഷംസി, യു.എ.ഇയുടെ യു.എസ്. അംബാസഡര്‍ യൂസുഫ് അല്‍ ഒതൈബ, കിരീടാവകാശിയുടെ അബൂദബി കോടതിയിലെ അണ്ടര്‍ സെക്രട്ടറി മുഹമ്മദ് അല്‍ മസ്‌റൂയി തുടങ്ങിയവരും കൂടിക്കാഴ്ചയില്‍ പങ്കെടുത്തു. മേഖലാസന്ദര്‍ശനത്തി​െൻറ ഭാഗമായി തിങ്കളാഴ്ച യു.എ.ഇ വിട്ട ജേക്ക് സുള്ളിവന്‍, സൗദി അറേബ്യയിലെത്തി കിരീടാവകാശി മുഹമ്മദ് ബിന്‍ സല്‍മാനെ സന്ദര്‍ശിക്കും.

യമനിലെ യു.എസ് നയതന്ത്രപ്രതിനിധി ടീം ലെന്‍ഡര്‍ കിങ്, പശ്ചിമേഷ്യയിലെയും വടക്കേ ആഫ്രിക്കയിലെയും ദേശീയ സുരക്ഷാ കൗണ്‍സിലി​െൻറ കോഓഡിനേറ്റര്‍ ബ്രെറ്റ് മകഗര്‍ക്ക് എന്നിവരും ജേക്കിനെ അനുഗമിക്കുന്നുണ്ട്. ജോ ബൈഡന്‍ യു.എസ്. പ്രസിഡൻറായ ശേഷം സൗദി അറേബ്യ സന്ദര്‍ശിക്കുന്ന മുതിര്‍ന്ന യു.എസ് ഉദ്യാഗസ്ഥനാണ് സുള്ളിവന്‍.

യമനിലെ സ്ഥിതിഗതികള്‍ കൂടുതല്‍ രൂക്ഷമായ സാഹചര്യത്തിലാണ് ജേക്ക് സുള്ളിവ​െൻറ ഗള്‍ഫ് സന്ദര്‍ശനം.